Bikɔmɛli 3 - Nouveau Testament en Ngombe 1961

Mondɔke a Tempelo

¹ Pɛtɛlo na Yoane bakɛ a tempelo a ehole ebo’nga, oko atrois heures.

² Okina momi adaka ena yona obotama mondɔke. Bamotombaka bo bamosambee masu masusu a modipe motempelo mua modaka na kombe Esɛngɔ; na angaka likonja ai bato baya bakweaka a tempelo.

³ Yana anɛ yo bo Pɛtɛlo na Yoane bakɛkɛ akwee a tempelo, aba’nga likonja.

⁴ Pɛtɛlo na Yoane bamonja ngbɛ; na Pɛtɛlo abala bo, Anja so!

⁵ Iyo abanja boa, mojɔ bo adaka na njingo bo bamopɛ ekina eka.

⁶ Pɛtɛlo ko abala bo, Mbi napeliti nongo likonja, pɛpɛ flanka, pɛpɛ pata; endele ko, mbi napaka wɛ oko lia lipeli mbi; a kombe eYesu Masiya oNasaleta, dala!

⁷ Amopea na ebɔ ebami, amongɔjɔ, na yo asɔ ngulu bokpa a mako na a gaga.

⁸ Ama mema, apimboa, abanga bodala, na akwea na bu a tempelo oko na bosakoa ai Njambe.

⁹ Bato basusu bangando bamonɛ akadale na akasakoe Njambe.

¹⁰ Bamombetea, na bajeba bo adi oko moto yona omaka da a modipe motempelo a mojɔ molinga; na bakamoa na bayegebana cina emojɔ mokɔɔmɔ na nde.

¹¹ Iyo ko aipala bokina Pɛtɛlo na Yoane, na bato basusu bapota, na batitana a Eseba eSɔlɔmɔ.

Eleho ePɛtɛlo

¹² Yana anɛ Pɛtɛlo mojɔ momina, abala na bato bo, Ino bami baYisalaele, okamoakani a mojɔ momoto yo cina eye? onjakani so ngbɛ mojɔ moye? Olɛkɛni bo so bodalejai moto yoyo na ejimeli na ngulu esu bɛnɛ?

¹³ Njambe oAbalayama na oIsaka na oYakobo, Njambe obatata basu akumejai Mwana’nde Yesu. Ino omopani a mɔmɔ maPilato, na omolonani a boso bonde, yana ajima Pilato bo amocingoe.

¹⁴ Olonani Yona Mosɛnɔkɛ, Yona oBodongo, na ohɔni bo bacingoe mobengo ai no.

¹⁵ Owani Kumu oBomɔ; Njambe ko amongɔjɔ a bogwa, na so bodi banjɛnɛki bamojɔ momina.

¹⁶ Edi oko kombe ende yena epi moto yoyo ngulu, cina eejimeli a kombe ende; omonɛkɛni na omojebakani no bɛnɛ. Edi oko ejimeli ai Yesu yena epi moto yoyo mokuku monjilake a boso bonu basusu.

¹⁷ Baninga, mbi najebaka bo okɔni mojɔ momina a libumi linu, no bɛnɛ na bakumu banu pongono.

¹⁸ Njambe ko ajebeja mojɔ momina eyou na minɔkɔ mibatɔndɔi basusu, bo Masiya onde adi bodingoa; na mojɔ momina mongami boa.

¹⁹ Oko boa toma jasani dosa; toma hekojani milema, bo jibe jinu jihakoame, bo Kumu alomee no masu mabomɔ boyene,

²⁰ na alome Masiya yona ohɛngɛmɛ a mojɔ monu, oko Yesu.

²¹ Iyo ko adi boyeyoa oho Diko oko a ehole ebohɔngeja ngando jisusu. Njambe atɔndɔ mojɔ momina ehele mɛnɛ na minɔkɔ mibatɔndɔi bande basɛnɔke.

²² Mose yo mɛnɛ abala bo, Kumu Njambe adi bongɔjɔ motɔndɔi ai no a tei ebaninga banu, o adi mbi. Toma hokeani mijɔ misusu mibalabi yo na nu.

²³ Moto na moto yona olonabí bohokea motɔndɔi omina adi bogwa a tei ebato.

²⁴ Samwele, na batɔndɔi basusu batongo baya badoa ngɔngɔ jinde, na babwɛnji koko, bajebeja mojɔ momasu mama.

²⁵ Ino odini bana babatɔndɔi, basangoli baMokongo mobakea Njambe na batata banu, yana abala yo na Abalayama bo, Makota masusu mangondo majongoamabí a mojɔ mobana bawɛ.

²⁶ Njambe angɔjɔ Mwana’nde, na amolomea boso ai no a bojongoa no, na a bobuleja no basusu a jibe jinu.