Bikɔmɛli 28 - Nouveau Testament en Ngombe 1961

A Melita

¹ Apa so njupi boa, boka bo mosanga momina modi na kombe Melita.

² Bato bangando babonjea so na bopele mɛnɛ. Batokana mosa monɛnɛ, na basɔ so bopele, mojɔ bo mbua abanga bokwa, na pio edaka enɛnɛ.

³ Paulo andoa kata enjɛlɛ, na ajibakea a mosa. Njɔ ko amana a mojɔ mopeye emosa, na akoma ebɔ ende.

⁴ Yana anɛ bato bangando njɔ acingi a ebɔ ePaulo, babalana a tei ebu bo, Moto yoyo adi mowoi soti. Aheli a madiba; Iyo ko yona osambejaka ajimiti bo ahele.

⁵ Paulo ko ahɛhɛ ebɔ ende, na njɔ akwa ta mosa; yo mɛnɛ aika nongo epeko.

⁶ Ibo ko bamonja, mojɔ bo badingaka bo mokuku monde modi boBaala, isa bo adi bokwa gbu, oko mogo. Ba’mba ekoka, na banɛ bo aditi nongo na epeko. A mojɔ momina balɛ mokina mojɔ motongo, na babala bo adi okina njambe.

⁷ Kumu omosanga, kombe ende Pubulio, asɔ so bopele, na akɔ so monganji masu masato. Gbie jinde jidaka hulelu na esika emina.

⁸ Sange ’Pubulio adaka asambi na yogo emipulo, na Paulo akɛ bo amonje; anga Njambe, amobakea mɔmɔ, na amoheleja a yogo ende.

⁹ Ama yo kɔ boa, bato batongo bamosanga baya badaka na bego, ba’mi doa oko ai yo, na bahela a bego bibu.

¹⁰ Basepa na su bou mɛnɛ, na yana atamba so a masua, bapa so leka lua lotakaka na su.

¹¹ Boyeyoa ena songe basato. Ngɔngɔ jimina, botamba a masua maAlesandalia maya mamayeyoa a mosanga edidi esusu epio. Kombe emasua edaka Mapasa Bami.

¹² Bosɛmɛ a Sulakusa, na bohwɛ ena masu masato.

¹³ Bongɔ ena na bolekela a Legio. Ahoa koko busa, pwea edonga a sudo. Bodala koko, na bomea a Puteoli na masu mabae.

¹⁴ Botana bato baDenga a ngando emina baya bangɔɔnɔ so bo boyeyoe na bu masu sambo. Bongɔ ena na bobenga Loma.

¹⁵ Bato baDenga oho, yana aka ho mwako mosu, badoa bo balenoane so a Jando eApio, na a Ndako Jisato jiBakɛndɛli.

¹⁶ Paulo, yana abanɛ yo, asakoa Njambe, na apingeja molema monde. Amea so a Loma, bajima bo Paulo adae a ekina ndako na soda omɔci a bomobanea.

Paulo a Loma

¹⁷ Yana anɔ masu masato, Paulo abolea basuku baBaYuda. Yana atitana bo, Paulo abala na bu bo, Baninga, mbi naisopa nongo mobeko mobato isa mobasangwa’su. Bapeani ko a Yelusalema, na bapani a mɔmɔ maBaLoma.

¹⁸ Bakokeleja mojɔ mombi, na bapala bo bacingoe mbi, cina bo bainɛ nongo mojɔ na mbi mua mobwana na mokindo mobogwa.

¹⁹ BaYuda ko baijima. A mojɔ momina mbi nainɛ ekina njea etongo, oko bo nadoe a esambi eKaisala. Mbi ko nitadumbaka bato bahkota limbi mɛnɛ a mojɔ momina.

²⁰ Oko boa napalaki bonɛnɛ na nu, bo nabale na nu mojɔ momina; cina bo nadi a monyɔlɔ mu oko a mojɔ monjingo eYisalaele.

²¹ Ibo bamo-sɔmbeja bo, Iso bositi mikanda miYuda a mojɔ mowɛ, na pɛpɛ nongo moto osu odoi ya a botɔndɔ so, isa a bobala mokina mojɔ mobe mokɔ wɛ.

²² Iso ko bopalaka bo otɔndɔe so mijɔ milɛkɛ wɛ. Bojebaka bo bato balonaka njea eejimeli ye a bisika bisusu.

²³ Bahɔ bokina busa, na bato badoa banɛnɛ a ndako ePaulo. Iyo abanga bobakoja ehuma, na ahakoja oko a ehole emɔkɔ. Abatɔndɔ mwako moBokumu boNjambe. Abaleha na Mibeko miMose na mikanda mibatɔndɔi, na akenga bohekoja milema mihu ai Yesu.

²⁴ Bakina babu bajima mijɔ mibala yo; batongo ko baijima.

²⁵ Oko boa baidaka na molema momɔci, na bayana boa. Paulo ko abala na bu ekenge ye; Mwembo Mosɛnɔke mobala na basangwa’su na soti na monɔkɔ momotɔndɔi Yisaya bo,

²⁶ Kɛ ai bata ba; bala bo, Ô’kani na matoi soti, otacingeani ko; Ônjani na miso soti, otanɛni ko.

²⁷ Mojɔ bo milema mibato ba midi mipipo; Matoi mabu madi na bohoka, Na hadipi miso mabu, Bo batanɛ na miso, na bata’ka na matoi, Bo batacingea a milema mibu, Basaka hekoa ai mbi bo nababelejae.

²⁸ Jebani oko bo, boheleja bu boNjambe bolomami ai bapakano; ibo badi bohokea.

²⁹ Ama yo bala boa, BaYuda ba’mi nangana bonangana na kitɛ enɛnɛ.

³⁰ Paulo ahwɛ a ndako emina hianga bisusu bibae, na asɔkɔ bato basusu baya badoaka ai yo.

³¹ Atɔndɔkɔ mwako moBokumu boNjambe, akojaka ngando jiKumu Yesu Masiya na eci enɛnɛ, pɛpɛ nongo moto omosia.