Bikɔmɛli 21 - Nouveau Testament en Ngombe 1961

Suka Emɔngɔ moPaulo

¹ Aseana so na bu, botamba a masua, na bokɛ bojo oko a Kosa. Yana ahoa busa, bosɛmɛ a Lodo; angɔ so ena, bomea a Patala.

² Botana masua ena maya makanaka boleka oho Piinike. Oko boa botamba a masua mamina na bokɛ.

³ Anɛ so mosanga kombe Kupulio, bomokina a dɔngɔ diebɔ ebali, na bonɔ oko a Silia. Bosɛmɛ a Tula, mojɔ bo masua madaka na leka a mojɔ mongando emina.

⁴ Botana bacingami ena, na boyeyoa na bu masu sambo. Ibo babala na Paulo oko na Mwembo bo atakɛ a Yelusalema.

⁵ Yana asia masu masu a esika emina, bongɔ koko a bokɛ a njea esu. Ibo basusu badoa a bosukeja so a njea. Bodonga a ngando, na yana amea so a mbongu, botita na magbunda, na bonga Njambe.

⁶ Aseana so na bu, botamba koko a masua, na bo basɔmbɔ a ngando.

⁷ Angɔ so a Tula, bosɛmɛ a Potolemai, na mɔngɔ mosu a madiba-mamukwa mosia boa.

⁸ Ahoa busa, bongɔ ena na bomea a Kaisalia. Bokwea a ndako ePilipo, motɔndɔi oMwako Mopele, na boda na nde. Iyo adaka okina obasuku baDenga sambo.

⁹ Adaka na bana-bali banɛi; baipaka jeba nongo momi, na bapaka biseko.

¹⁰ Ayeyoa so ena makina masu, okina motɔndɔi, kombe ende Agabo, ahula a Yuda na atana so ena.

¹¹ Iyo atomba kamba ePaulo, na amokanda mɔmɔ na mako. Abala bo, Mwembo Mosɛnɔke mobalaka bo BaYuda badi bokanda moswa okamba ye mbɔci boa a Yelusalema, na bâmopa a mɔmɔ mabapakano.

¹² Aka so mojɔ momina, iso na bacingami bangando emina bongɔɔnɔ Paulo bo atakɛ a Yelusalema.

¹³ Paulo ko asɔmbeja bo, Oyeakani na ombɛjɛkɛni molema mombi mojɔ moye? Mbi nadi na mosɛlingo, te a mojɔ mombɔci pɛ; nadi koko na mosɛlingo a mojɔ mobogwa pongono a Yelusalema, a mojɔ mokombe eKumu Yesu.

¹⁴ Aipala bohokea so. Oko boa bokina bobala na ekenge ye, Yɛ modae o apalaka Kumu.

Paulo a Yelusalema

¹⁵ Yana asia masu mamina, bokanda leka losu na bokɛ a Yelusalema.

¹⁶ Bakina baemgami baKaisalia bapaka so a njea, a boneja so ndako eMenasona, bo bohwɛe a esika ende. Iyo adaka mocingami moyou, moto oKupulio.

¹⁷ Amea so a Yelusalema, bato baDenga basɔ so na sepi.

¹⁸ Yana ahoa busa, Paulo akɛ na su ai Yakobo, na basuku baDenga basusu badaka ena.

¹⁹ Paulo ababɛjɛ njɛbɛ, na abatɔndɔ ngando jisusu jima kɔ Njambe a tei ebapakano a mojɔ moelomu ende.

²⁰ Ibo basakoa Njambe yana aka bo mojɔ momina, na babala na Paulo bo, Moninga, onɛkɛ bo BaYuda bajimaka pongono, koto na koto, na ibo basusu badi na bingi a mojɔ moMibeko.

²¹ Ibo ko bakaka bo wɛ okojaka BaYuda baya badi a makota mabapakano bo bakine ngando jiMose. Bakaka bo obalaka bo babwaniti bolena bana babu ganda, na bo bakme bikɔmɛli bibatata.

²² A mojɔ momina, iso bôkɔ bo? Badi boka soti bo omei ya. Bopele bo okɔe oko mojɔ mobalaka so na wɛ.

²³ Bodi na bato banɛi ya baya babɛli bɛli.

²⁴ Cingama na bu bo osasɛnojae na bu, na ôbapa likonja a bonwɛ swɛ jibu. Oko boa badi bojeba bo ngando jikaka bo a mojɔ mowɛ jidi oko bokosea. Badi bojima koko bo ekɔmɛli ewɛ edi na lisuma a Mibeko.

²⁵ A mojɔ mobapakano baya bajimaka, iso bolena mojɔ momina eyou, na bosɔnɔ mokanda bo bakie tito bamasiko bakabaka bato ai banjambe babokosea, na makia, na tito baya bagwaka na mocibano, na bɔɔli.

²⁶ Oko boa, yana ahoa busa, Paulo akɛ na bato bamina, asasɛnoja, na akwea na bu a tempelo bo ajebejae ehole ebosukeja masu mabosɛnoja, na a bopa epeeli a mojɔ mobu basusu.

BaYuda Bapea Paulo

²⁷ A suka emasu mamina sambo, BaYuda baAsia batana Paulo a tempelo. Bakeja bato basusu kɛlɛ a mojɔ momina, na bapea Paulo.

²⁸ Babekoa bo, Bami baYisalaele, kɔmejani so! Anjani moto yoyo; akojaka bato a bisika bisusu bo balone bato basu, na Mibeko, na esika yeye pongono. Mojɔ motongo koko, akwejai BaEla a tempelo, na asambojai esika ye esɛnɔke.

²⁹ (Cina bo bama nɛ Tulopmo, moto oƐpɛsɔ, yona opakaka Paulo, na badingaka bo Paulo amokweja a tempelo.)

³⁰ Ejoki edaka a ngando esusu, na bato basusu badoa mobonda, na bapea Paulo. Bamogbula sokolu na badipa midipe mitempelo.

³¹ Yana adukaka bo njea bo bamowoe, kapitɛni obasoda aka bo ngando esusu eYelusalema edi na wokowoko.

³² Oko boa yo abea basaloja na basoda bokpa, na apota na bu oho adaka bato. Yana anɛ bo kapitɛni na basoda, bakina botua Paulo.

³³ Kapitɛni adoa, amotembea, na apa monɔkɔ bo bamokande na minyɔlɔ mibae. Ahɔjɔ koko kombe ende na mojɔ moma yo kɔ.

³⁴ Bato baemumu ko babekoa, bakina mojɔ momɔci, batongo mojɔ motongo. Oko boa yo aihɔnɔ bokokeleja mojɔ na soti cina edaka, na apa monɔkɔ bo bakɛe na nde a esika ebasoda.

³⁵ Amea yo a ebutelo, basoda bamolwa oko bolwa cina ekɛnjɔ ebato;

³⁶ mojɔ bo engbondo ebato edaka ngɔngɔ jinde na babekoaka bo, Mowani!

³⁷ Yana abenga bo bokwea na Paulo a tei endako ebasoda, yo abala na kapitɛni bo, Napalaka nabale na wɛ mokina mojɔ. Kapitɛni asɔmbeja bo, Wɛ okaka kɔpi eBaEla?

³⁸ Wɛ, te MoEjipito yona ongɔjɔ bato bila oko na masu ma, na akɛ a lisobe na bilombe koto jinɛi?

³⁹ Paulo abala bo, Mbi nadi MoYuda, moto oTalusia oho Kilikia. Mbi nadi sɔmi ongando enɛnɛ. Kinani nabale na bato.

⁴⁰ Ajima yo bo Paulo abale, yo ama a ebutelo, ahɛhɛ ehɔ ende ai bato. Ibo bayɛyɔ bowi, na abanga bobala na bu a kɔpi eBaEbele bo.