Bikɔmɛli 20 - Nouveau Testament en Ngombe 1961

A Makedonia

¹ Iyana asia wokowoko emina, Paulo abolea bato baDenga. Abaleha, aseana na hu, na adonga ena bo akɛe a Makedonia.

² Adala a makota maMakedonia, na apa bacingami bileho binɛnɛ. Ngɔngɔ jimina, akɛ a ngondo eEla.

³ Ayeyoa oho songe basato, na akana bo atambe a masua a bokɛ a Silia. BaYuda ko badumba ndungu a mojɔ monde. A mojɔ momina, ajima bo asɔmbe a njea eMakedonia.

⁴ Bato ba bamopaka a njea oko a Asia; Sopatulo, moto oBelea, mwana ’Pulo; Alisitaluko na Sekundo, bato baTɛsalɔnike; Gayo, moto oDelube, na Timoteo; Tukiko na Tulopino, bato baAsia.

⁵ Ibo basua boso na ba’mba so a Toloa.

⁶ Yana asia masu maMilɛmbɛ mia mipeliti lipetu, botamba a masua a Pilipoi. Bohwɛ a njea masu matano, na bobatana yana asɛmɛ so a Toloa. Bohwɛ masu sambo a esika emina.

A Toloa

⁷ Botitana a busa boNjambe a bobuka molɛmbɛ. Paulo abaleha, mojɔ bo adaka na mokano a bongɔ ena ehuma. Abala ekoka mɛnɛ, oko a tei ebulu.

⁸ Paka jidaka jinɛnɛ a ekenge endako etitana so a mboba ediko.

⁹ Okina mwenga, kombe ende Eutuko, adaka na mobondo a likina lininisa, na yo ahwɛ hiɔ. Adaka diko a mboba ejisato, na yana ayeyoa Paulo a bobala, adinda a hiɔ, akwa nase, na bamondoa oko mogo.

¹⁰ Paulo atita nase, asasunea a diko dinde, amodinga na mɔmɔ mande, na abala bo, Yɛni bobanga! Adi oko mɔ.

¹¹ Asɔmbɔ koko diko, abuka molɛmbɛ, ayaka, na abala koko ekoka, oko a ehole ehoa busa, na ayana.

¹² A mojɔ momwenga ko, bakɛ na nde oko mɔ, na milema mibu migɔmbɔ.

¹³ Iso bosua boso a masua, na botamba a bokɛ a Aso. Mokano mosu modaka bo Paulo atambe na su a esika emina, mojɔ bo yo ajima bo akɛe oho na njea engondo.

¹⁴ Oko boa, yana atana so Paulo a Aso, atamba na su, na bokɛ a Mitulene.

¹⁵ Angɔ so ena, na yana ahoa busa, boyɛli Kio. Ahoa koko busa, bosɛmɛ a Samo. Ahoa koko busa bosɛmɛ a Mileto.

¹⁶ Paulo adaka na mokano bo anɔe Ɛpɛsɔ oko bonɔ, mojɔ bo aipalaka boyeyoa koko a Asia. Apalaka bo akɛe pɛlɛpɛlɛ, bo adae a Yelusalema a busa boDomi-itano isa adi bohɔnɔ.

Eleho ePaulo ai Basuku baDenga diƐpɛsɔ

¹⁷ Amea yo a Mileto, aloma ndɔsɔ ebasuku baDenga diƐpɛsɔ.

¹⁸ Yana amea bo, Paulo abala na bu bo, lno ojebakani ekɔmɛli embi a tei enu bihole bisusu, donga a busa boduboa mbi a Asia.

¹⁹ Nakɔmɛkɛ Kumu na lisuma lmɛnɛ na mbisoli pongono, cina eminɔngɔ minɛ mbi na ndungu jiBaYuda.

²⁰ Ojebakani bo naidimboa botɔndɔ no ngando jia jibwana na nu. Nakojaka no a matitana, na a ndako na ndako pongono.

²¹ Nalehaka BaYuda na BaEla pongono bo bahekoe ai Njambe na ejimeli ai Kumu osu Yesu Masiya.

²² Anjani edɛye; mbi nakɛkɛ a Yelusalema oko a mbɔci jiMwembo, pɛ bojeba mijɔ mia mimbaka mbi oho.

²³ Mwembo Mosɛnɔke ko mojebejaka mbi a ngando na ngando bo minyɔlɔ na minɔngɔ mimbakani oho.

²⁴ Mhi ko nalɛkɛ bo mohelo mombi modi eka engasa mɛnɛ; moditi nongo na yumu a miso mambi. Posa embi edi oko bo namee a suka enjea embi, bo nasiejae elomu esɔ mbi ai Kumu Yesu, elomu ebotɔndɔ Mwako Mopele momonganji moNjambe.

²⁵ Mbi nadala a bisika na bisika a tei enu, a botɔndɔ Mwako Mopele moBokumu boNjambe, na edɛye najebaka bo pɛpɛ nongo okina onu odi bonɛ boso bombi na ikina.

²⁶ A mojɔ momina, mbi natɔndɔkɔ no a bohu busa bu, bo iindo jimakia manu jicingiti na mbi.

²⁷ Mojɔ bo natɔndɔ no mokano moNjambe mosusu mɛnɛ, pɛ bobomba mokina mojɔ.

²⁸ Mwembo Mosɛnɔke mohɔ no habanei babwela a bobɔkɔ Denga diNjambe dia disikoa yo na makia mande mɛnɛ. A mojɔ momina toma sabaneani no bɛnɛ, na baneani bwela bosusu pongono.

²⁹ Najebaka bo mbi nakayana, swa babila badi bokwea a tei enu a bobeja bwela.

³⁰ Na bato badi bongɔ a tei enu bɛnɛ a bokoja mijɔ mibokosea, na bâlaboja bacingami.

³¹ Oko boa toma nganjamani. Pɛ bobosani bo mbi naingwa boleha no basusu na mbisoli, mabulu na mei, bianga bisusu bisato.

³² Edɛye nakmaka no a mɔmɔ maNjambe na ebaeli emonganji monde. Iyo adi na ngulu a bombilimeja no, na adi bopa no lisango linu a tei ebato basusu baya bahɛngɛmɛ ai yo.

³³ Mbi naimboaka likonja linu, isa wɔlɔ, isa palata, isa bisenia.

³⁴ Ojebakani no bɛnɛ bo nakɔkɔ elomu na mɔmɔ mambi mɛnɛ, bo nadihe leka lua lobwanaka na mbi na baya badaka na mbi.

³⁵ Mbi naneja no na ngando ji jisusu bo bobwani bokɔ elomu boa, a bokɔmeja bayɛmbu, na pɛ bobosa nongo bikenge bibala Kumu Yesu bo, Na bopa na bosɔ, enɔi na bopele oko bopa.

³⁶ Asieja yo bobala mijɔ mimina, atita na magbunda, na anga Njambe a tei ebu basusu.

³⁷ Ibo basusu bayea bio, badinga Paulo malɔbɔ na bamobia.

³⁸ Na wa ebu egbasoa cina eekenge ema yo bala, bo batanɛ koko boso bonde na ikina. Ngɔngɔ jimina bamopaka a njea oko a masua.