Bikɔmɛli 2 - Nouveau Testament en Ngombe 1961

Bodoa boMwembo Mosɛnɔke

¹ Ibo basusu badaka baboli a esika emɔci a busa boDomi-itano. (Busa boPɛntekɔsta)

² Daka ehula oho Diko bundumo, o pwea epipo mɛnɛ, na elumeja ndako esusu edaka bo.

³ Mojɔ monɛ bo modaka o biemi bimosa bia bikabama a tei, na bibakama a diko dimoto na moto.

⁴ Ibo basusu baluma na Mwembo Mosɛnɔke, na babenga bobala na kɔpi jitongo mijɔ mibapa Mwembo bo babale.

⁵ BaYuda baya badaka na lisuma ai Njambe badaka a Yelusalema a masu mamina, baya bama donga a makota masusu mangondo.

⁶ Yana aka bo daka emina, bato batitana banɛnɛ mɛnɛ, na bayegebana bou, cina bo bakaka moto na moto, a kɔpi ende mɛnɛ.

⁷ Ibo bakamoa na dilese mɛnɛ, na babalana bo, Ikani! Bato baya babalaka, bo basusu te bato baGalile?

⁸ Oko boa, ekaka so moto na moto monɔkɔ monde mɛnɛ cina nda?

⁹ Iso te BaPalutia, BaMadai, BaElama, na bato baya badonga a Mɛsɔpɔtamia, Yuda, Kapadokia, Ponto, Asia,

¹⁰ Pelugia, Pampuha, Ejipito, na makota maLibia oho a dɔngɔ diKulene, na bato baya badonga oho Loma, na BaYuda na bapakano baya bahekoa Bayuda;

¹¹ BaKulete na BaAlabia; na bokaka bato bamina baya batɔndɔkɔ mijɔ miNjambe mibokamoa a kɔpi jisu bɛnɛ.

¹² Ibo basusu bakamoa na dilese, na badaka koko na mokakwano; babalana bo, Cina emina edi bo?

¹³ Bakina batongo ko basɛkɛ oko bosɛkɛ, na babala bo, Balangoi na vino eyene.

Mwako Motɔndɔ Pɛtɛlo

¹⁴ Pɛtɛlo adaka na babwɛnji batongo domi-na-omɔci, na yo angɔ, adipoa monɔkɔ monde, na abala na bu bo, Ino bami baYuda, na no basusu baYelusalema, hokeani mojɔ mobalaka mbi, na eingeani mojɔ mu.

¹⁵ Ibaba balangoiti nongo o alɛkɛ no. Boni. Edi oko neuf heures ehuma pɛ.

¹⁶ Mojɔ mu modi oko mojɔ mobala motɔndɔi Yoele bo,

¹⁷ Njambe abalaka bo, Mbi nasopabi Mwembo mombi Ai bato basusu a masu masuka. Banabami banu na banabali banu bapabí biseko; Menga manu banɛbi mijɔ a njɔti, Na basuku banu batɔbí njɔti.

¹⁸ Mbi nasopabí Mwembo mombi ai bakɔmɛli bambi bami, na Bakɔmɛli bambi bali a masu mamina, na bapabi biseko.

¹⁹ Nanejabí mijɔ mibokamoa ta busa, Na bimbete a ngondo ya nase, Oko makia, na mosa, na modidi momosa.

²⁰ Modika-busa mohindabí, Na songe abongoabí makia, Oko busa bua boKumu bodoakini, Busa bonɛnɛ boekumu.

²¹ Na modabí bo moto na moto yona obeaka a kombe eKumu ahelabí.

²² Ino bami baYisalaele, hokeani mijɔ mi. Ojehakani mojɔ moYesu oNasaleta. Njambe aneja no bo ahɔ moto omina a tei enu, oko na bimbete na mindumba mikɔ Njambe na nde a boso bonu.

²³ Ino ko omotombani na omowejani a mole-mobokea na mɔmɔ mabato babe. Njambe ajeba a bobanga mɛnɛ bo badi bomokaba; mojɔ momina modaka oko a mokano monde.

²⁴ Njambe ko amocingoa a mbɔci jibogwa, na amongɔjɔ, mojɔ bo bogwa boidaka na ngulu a bomopea na bosusu.

²⁵ Mojɔ bo Dawidi abala mojɔ monde bo, Mbi nanɛkɛ Kumu ombi a boso bombi masu masusu; Mojɔ bo adi a dɔngɔ dimbi diebɔ ebami bo ambilimejae mbi.

²⁶ Molema mombi mosepaka a mojɔ momina, na monɔkɔ mombi modi na enanga; Mojɔ motongo koko,—mokuku mombi môyeyoa a esika enjingo.

²⁷ Cina bo otakina mwembo mombi a esika ebogwa, Na otajima bo Yona Mosɛnɔke owɛ apɔe.

²⁸ Onejaini njea jibomɔ, Na molema mombi môda na sepi botɔ, mojɔ bo wɛ odi na mbi.

²⁹ Baninga, kinani nabale na nu a bohu a mojɔ motata osu Dawidi.

³⁰ Iyo agwa na bamopusea; esɛmɔ ende edi oko na su busa bu. Iyo adaka motɔndɔi, na ajebaka bo Njambe amosakea mosako bo abakee okina mwana’nde a mongbɛlɛngɔ mobokumu bonde.

³¹ Iyo abala boa a mojɔ moMasiya. Anɛ na atɔndɔ mojɔ mobongɔ boMasiya a bogwa, yana abala yo bo atayeyoa a esika ebagwake, na bo mokuku monde motapɔ.

³² Oko boa Njambe amongɔjɔ, oko Yesu yo mɛnɛ. Iso basusu bodi banjɛnɛki bamojɔ momina.

³³ Oko boa, adi yo na ekumu a dɔngɔ diebɔ ebami eNjambe, na asi yo Mwembo Mosɛnɔke ai Sango, o akina yo sako, amosopi ai so, o anɛkɛ no na akaka no.

³⁴ Mojɔ bo Dawidi aikwea a Diko yo mɛnɛ. Iyo ko abala bo, Kumu abali na Kumu ombi bo, Da ya a ebɔ embi ebami,

³⁵ Oko adi mbi pɛ bopeta dumba soki jiwɛ a cina jibibota biwɛ.

³⁶ Oko boa, bato basusu badenga diYisalaele babwani bojeba bo Njambe abakea Yesu bo adae Kumu na Masiya, oko yona owa ’no a mole-mobokea.

³⁷ Bikenge bimina bibandea oko a milema, na babala na Pɛtɛlo na babwɛnji batongo bo, Baninga, êkɔ so ndeni?

³⁸ Pɛtɛlo abala na bubo, Hekojani milema minu, na batisamani ino basusu a kombe eYesu Masiya, a mojɔ moboyɛ bojibe jinu, nongo osɛni epeeli eMwembo Mosɛnɔke.

³⁹ Sako ye edi ai no bɛnɛ, na bana banu, na bato basusu baya badi bohali pongono, oko bato basusu babeaka Kumu Njambe osu ai yo.

⁴⁰ Pɛtɛlo abatɔndɔ mijɔ mitongo minɛnɛ, na abaleha bo, Ciani elulu ye engulumake!

⁴¹ Oko boa baya bajima mwako monde babatisama. Busa bomina, etango ebacingami ehɛ na bato koto jisato.

⁴² Ibo badaka na bingi enɛnɛ a mojɔ mobokoja bobabwɛnji, na bakatana na molema momɔci a bobuka molɛmbɛ na a mojɔ mobo’nga.

⁴³ Bato basusu badaka na bɔ a mojɔ mobimbete na mindumba mikɔkɔ babwɛnji.

⁴⁴ Bato basusu baya bajimaka bakatana bopele, na bakabana leka pongono.

⁴⁵ Bangɛjɛ ndako na leka lobu, na bakaba likonja na bato batongo o adaka moto na moto na taka.

⁴⁶ Baikputoa bokwea a tempelo busa na busa na molema momɔci. Babukaka molɛmbɛ a ndako-ndako, na bayakaka mia oko na sepi na bowi a milema.

⁴⁷ Basakoaka Njambe, na badaka na gala epele a tei ebato bangando. Njambe anɛngɛja Denga busa na busa oko na bato baya bahelaka.