Bikɔmɛli 18 - Nouveau Testament en Ngombe 1961

Paulo a Kolinto

¹ Ngɔngɔ jimina, Paulo adonga a Atena, na akɛ a Kolinto.

² Atana okina MoYuda oho, kombe ende Akwila, moto oPonto. Iyo na mwali onde Pilisila bama donga a Italia, cina emobeko modumba Kulaudio bo BaYuda basusu badonge a Loma. Apanda na bu limbaci,

³ na ada a ndako ebu, mojɔ bo elomu ende na elomu ebu edaka amɛci; bakɔkɔ bisenja bipipo bihema, na bakɔ elomu ebu oko ena.

⁴ Paulo apa bileho a smagoge a masu maSabata masusu, a bojimeja BaYuda na BaEla pongono.

⁵ Yana ahula Sila na Timoteo a Makedonia, Paulo atɔndɔ Mwako Mopele na hingi enɛnɛ, na ajebeja BaYuda bo Yesu adi Masiya.

⁶ Ibo ko badaka na nde soki, na bamotangola oko botangola. Oko boa yo ahɛhɛ hisenja binde, abala na bu bo, Yɛ makia manu madae a melo minu bɛnɛ; mbi naditi na lindo jimina. Edɛye, mbi nadi bokɛ oko ai bapakano.

⁷ Abakina boa, na akɛ a ndako emoto, kombe ende Tito Yuseto; moto omina adaka na lisuma ai Njambe, na ndako ende etutea smagoge.

⁸ Kulusipo, mosuku osinagoge, na bato bandako ende basusu, bajimea Kumu. BaKolinto koko banɛnɛ baya baka Paulo bajima na babatisama.

⁹ Kumu abala na Paulo a njɔti na bulu bo, Yɛ bobanga; bala oko bobala, pɛ boda bogo.

¹⁰ Mbi nadi na wɛ; pɛpɛ nongo moto odi bobakea ebɔ ai wɛ a bobeneja wɛ, mojɔ bo mbi nadi na bato banɛnɛ a ngando ye.

¹¹ Oko boa ayeyoa ena yanga emɔci na songe basamano, a bokoja bato Ebaeli eNjambe.

¹² Yana adaka Galio gouverneur eAkaya, BaYuda basusu bangɔ na bapea Paulo, na bakɛ na nde a esambi.

¹³ Babala bo, Moto yoyo alabojaka bato bo basakoe Njambe na njea yena ebɔngiti na Mibeko.

¹⁴ Paulo adipoa monɔkɔ monde a bobala; Galio ko abala na BaYuda a ehole emina bo, Ino BaYuda, akɔki no doa na mokina mojɔ soti, mokina mojɔ mobe, ka nabwani bohokea no.

¹⁵ Edi ko oko kitɛ a mojɔ mobikenge, na kombe, na Mibeko minu; anjani mojɔ momina no bɛnɛ; mbi naloni bosambeja ngando jimina.

¹⁶ Na ababengana a esambi.

¹⁷ Ibo basusu bapea Sosotene, mowɛi osinagoge, na bamotua a boso bondako eesambi. Galio ko ailɛ nongo mojɔ momina.

Suka eMɔngɔ moPaulo Momibae

¹⁸ Paulo ayeyoa koko masu manɛnɛ a Kolinto. Yana aseana yo na bacingami ngɔngɔ, atamba a masua na Pilisila na Akwila, na akɛ a Silia. Adaka yo a Kenkulea, alena swe jinde a mojɔ moekina bɛli.

¹⁹ Yana asɛmɛ bo a Ɛpɛsɔ, yo abakina oko ena. Iyo ko akwea yo mɛnɛ a sinagoge na aboma kitɛ na BaYuda.

²⁰ Ibo bamonga bo ayeyoe na bu; yo ko aijima.

²¹ Abala na bu bo, Njambe akajima, nadi bohula koko ai no. Aseana na bu boa na atamba a masua a Ɛpɛsɔ.

²² Asɛmɛ yo a Kaisalia, aduboa, abɛjɛ bato baDenga na anɔ oko a Antiokia.

Mɔngɔ moPaulo Momisato

²³ Ayeyoa Paulo mweka a Antiokia, angɔ koko, na akɛ a ngando na ngando a makota maGalatia na Pelugia, na ambilimeja bacingami basusu.

Apolo

²⁴ Okina MoYuda adoa a Ɛpɛsɔ, kombe ende Apolo, moto oAlesandaha. Iyo adaka na bɛtɛ ebobala, na ajeba mokanda moNjambe na bopele mɛnɛ.

²⁵ Iyo ama koa njea eKumu; atɔndɔ na akoja mijɔ miYesu na bingi enɛnɛ a molema monde. Iyo ko ajeba oko batisimo eYoane pɛ.

²⁶ Abanga botɔndɔ mwako na eci a sinagoge. Pilisila na Akwila ko, yana amoka bo, bamotomba na bamocingea yo njea eNjambe na soti.

²⁷ Yana akana yo bo akɛe a Akaya, bato baDenga bamokɔmeja, na basɔnea bacingami oho mokanda bo bamosɛ bopele. Amea yo oho, akɔmeja bou mɛnɛ bato baya bama jima oko na monganji moNjambe,

²⁸ mojɔ bo agbokeja BaYuda na bibaeli binde a boso bobato basusu, na abaneja a Mokanda moNjambe bo Yesu adi Masiya.