Bikɔmɛli 17 - Nouveau Testament en Ngombe 1961

A Tɛsalɔnike

¹ Banɔ a tei emakota maAmpipoli na Apolonia, na bamea a Tɛsalɔnike. Sinagoge eBaYuda edaka a esika emina.

² Paulo akwea a smagoge o akɔkɔ yo bihole bisusu. Aboma na bu kitɛ a mojɔ mongando jiMisɔnɔ.

³ Abaneja cina eMisɔnɔ, na angameja bo Masiya abwana bodingoa bo angɔe a bogwa. Abala koko bo, Iyo Yesu, oko yona otɔndɔkɔ mbi no, adi Masiya.

⁴ Bakina babu bajima, na bacingama na Paulo na Sila. Bato banɛnɛ baBaEla baya bajimaka Njambe, na bakina bali, basuku bangando, bacingama na bu pongono.

⁵ BaYuda ko badaka na likaka. Ibo babea bakina bami babe bangando. Batitaneja koko bato kanga banɛnɛ mɛnɛ, na bahɛjɛ wokowoko enɛnɛ a ngando. Bahika ndako eYasona, na baduka njea a bomeja Paulo na Sila a boso bobato.

⁶ Baibaboloja ko; oko boa bapea Yasona na bakina bato baDenga, na bakɛ na bu ai bakumu bangando. Babekoa bo, Bato ba babejai ngondo esusu, na bamei oko ya.

⁷ Yasona aba’si a ndako ende; batasumaka nongo mibeko miKaisala, na babalaka bo okina Kumu otongo adi, kombe ende Yesu.

⁸ Bato bangando na bakumu badaka na mokakwano yana aka bo bikenge bimina;

⁹ na bajima bo bacingoe Yasona na bo batongo, oko yana apa bo mikando.

A Belea

¹⁰ Bacingami baloma Paulo na Sila bokpa a Belea na bulu. Yana amea bo oho, bakwea a sinagoge e BaYuda.

¹¹ BaYuda bamina badaka na ekɔmɛli epele mɛnɛ, te nongo na yena eBaYuda baTɛsalɔnike. Babokea Mwako Mopele na posa enɛnɛ, na balanga Mokanda moNjambe busa na busa a bojeba isa ngando jimina jidi boa soti.

¹² Oko boa, bakina babu banɛnɛ bajima; bakina BaEla bajima pongono, na bali banɛnɛ baBaEla baesako epele.

¹³ Yana aka BaYuda baTɛsalɔnike bo Paulo atɔndɔkɔ Mwako moNjambe a Belea pongono, bakɛ oho a bopangoa bato, na a bokeja bato kɛlɛ.

¹⁴ A mojɔ momina, bacingami bayaneja Paulo a njea emadiba-mamukwa; Sila na Timoteo ko badika oko ena.

¹⁵ Bato baya basukeja Paulo bamopaka oko a Atena; basɔ bwɛnji ai Sila na Timoteo bo badoe ai Paulo bokpa, na basɔmbɔ.

A Atena

¹⁶ Yana ambaka Paulo bo a Atena, molema monde mopukaka yana anɛkɛ yo ngando na bilimo botɔ.

¹⁷ Abala na BaYuda a sinagoge, na bato batongo baya bajimaka Njambe. Na abala busa na busa na bato batana yo a jando.

¹⁸ Bakina bato babowɛi, BaEpikulo na BaSotoiko, basoola na nde. Bakina babu babala bo, Moto yo obibalabala apalaka bobala bo? Bakina batongo babala bo, Adi o motɔndɔi obanjambe batongotongo; mojɔ bo abatɔndɔ Mwako moYesu, na mojɔ mobongɔ a bogwa.

¹⁹ Oko boa bamobea, na bakɛ na nde a Mono moAleo, na babala bo, Iso bopalaka bojebe mojɔ mu moyene mokojaka wɛ.

²⁰ Mojɔ bo bopakiti ka mijɔ mibokamoa mibalaka wɛ, na bopalaka bocingee mijɔ mimina.

²¹ (Bato basusu baAtena, na bakɛndɛli bangando emina, badaka oko na posa emɔci pɛ,—oko bobala na boka mokina mojɔ moyene.)

²² Oko boa, Paulo ama a ndanda elibanda liAleo, na abala bo, Ino bami baAtena, mbi nanɛkɛ bo odini na ejimeli ai banjambe bou mɛnɛ.

²³ Mojɔ bo, akɛki mbi adale, na anjaki mbi leka losakoaka no, nabolojai litumbu limɔci lia lidi na mosɔnɔ mu; AI NJAMBE YONA ODI SO PE BOJEBA. Omosakoakani pɛ nongo bomojeba. Oko boa mbi natɔndɔkɔ no mojɔ monde.

²⁴ Njambe adi Kumu oDiko na nase. Iyo akɔ ngondo na leka losusu lua lodi ena. Iyo t’adake a tempelo jipikaka bato na mɔmɔ.

²⁵ Editi nongo elomu emɔmɔ mabato yena edi bomokɔmɛ. Iyo t’atakake nongo eka, mojɔ bo yo mɛnɛ apaka bato basusu bomɔ, na mohuli, na leka losusu.

²⁶ Iyo akɔ makota masusu na botina bomɔci bo badae a bisika bisusu bingondo. Akolea mojɔ mobianga, na mwɛ jibisika bibu.

²⁷ Iyo akɔ boa bo baduke Njambe, na njingo bo bamoduke na bocimacima bo bamobolojae, mojɔ bo adi na su mbuci mɛnɛ.

²⁸ Mojɔ bo bomɔ bosu bodi a tei ende. Bodalaka, na bodi a tei ende. Bakina basɔni banu bɛnɛ babala bo, Iso bodi bana bande.

²⁹ Oko boa, isa bodi bana baNjambe, ebɔngiti bo bolɛe bo Njambe adi na elimo ewɔlɔ, isa palata, isa litai,—leka loluaka bato na bowɛi na bɛtɛ ebu.

³⁰ Njambe adipa miso mande a mojɔ mongando jiehole elibumi limina. Edɛye ko abekeaka bato basusu a ngondo esusu bo bahekojae milema mihu.

³¹ Mojɔ bo, yo ahɛngɛ bokina busa a bosambeja ngondo, esambi ebojo, oko na moto oma yo hɔ. Na angɔjɔ moto omina a bogwa, a boneja So bo mojɔ momina modi soti.

³² Yana aka bo mojɔ mobongɔ bobagwake, bakina basɛkɛ oko bosɛkɛ. Batongo ko babala bo, Bodi boka wɛ koko a mojɔ momina.

³³ Oko boa Paulo abakina.

³⁴ Bakina bami ko bacingama na nde na bajima. Okina obu adaka Dionusio, moto olikita liBaAleo, na mwali omɔci kombe ende Damali, na bakina batongo pongono.