Bikɔmɛli 15 - Nouveau Testament en Ngombe 1961

Kitɛ a Denga diAntiokia a Mojɔ moMibeko

¹ Bakina bato badonga a Yelusalema, na bakoja bato baDenga bo, Bamiti lena no ganda o adumbea Mose mobeko, otahelani.

² Paulo na Balanaba baboma na bu kitɛ enɛnɛ, na basoana na bu. Oko boa, bato baDenga bajima bo Paulo na Balanaba na bakina babu bɛnɛ bakɛe a Yelusalema, a bolena mojɔ momina na babwɛnji na basuku baDenga.

³ Bato baDenga babasukeja a njea. Badalaa njea ePoinike na Samalia, na batɔndɔ baninga basusu bo bapakano bahekoa ai Njambe. Ibo basepa bou mɛnɛ na mojɔ momina.

A Yelusalema

⁴ Amea bo a Yelusalema, bato baDenga, na babwɛnji, na basuku baDenga babasɔ bopele. Batɔndɔ ngando jisusu jima kɔ Njambe na bu.

⁵ Bakina bacingami ko baya badaka a libondo liBaPalusi, bangɔ na babala bo, Bato bamina babwani bosɔ embete ebolenaganda, na badi bosɔ eleho bo basume Mibeko miMose.

⁶ Babwɛnji na basuku baDenga batitana a bolɛ mojɔ momina.

⁷ Babomana kitɛ enɛnɛ. Pɛtɛlo ko angɔ ngɔngɔ, na abala na bu bo, Baninga, ojebakani bo Njambe ahɔ okina onu eyou, bo bapakano badi boka Mwako Mopele oko a monɔkɔ mombi mɛnɛ, bo bajime.

⁸ Njambe yona ojebaka milema mibato anejai bapakano monganji monde, na abapi Mwembo Mosɛnɔke o akɔ yo ai so bɛnɛ.

⁹ Isona bo bodi oko amɛci a boso bonde, na yo asɛnojai milema mibu a mojɔ moejimeli.

¹⁰ Oko boa, odingeakani Njambe mojɔ moye? Opalakani bobakea muna a mabɛkɛ mabacingami, na so bɛnɛ na basangwa’su boihɔnɔ muna momina?

¹¹ Iso bojimaka bo bodi bohela oko a mojɔ momonganji moKumu, iso na ho oko njea emɔci.

¹² Bato basusu balikita bayɛyɔ bogo. Bahokea Paulo na Balanaba yana abalaka bo a mojɔ mobimbete na mindumba mikɔ Njambe na bu a tei ebapakano.

¹³ Asieja bo bobala, Yakobo asɔmbeja bo, Baninga, hokeani mbi.

¹⁴ Simona acingea so bo Njambe adoi ai bapakano ehole eboso, bo ahɔe bato a tei ebu a mojɔ mokombe ende.

¹⁵ Bikenge bibatɔndɔi bidi koko na cina emina, mojɔ bo mosɔnɔmɔ bo,

¹⁶ Mbi nâhula ngɔngɔ jimina. A bongɔjɔ koko etondo eDawidi yena ekwi. Ebehi esusu; mbi ko naengɔjɔ koko,

¹⁷ Bo bato batongo baya badi a ngondo baduke Kumu, Na bapakano basusu pongono, mojɔ bo kombe embi edi ai bo.

¹⁸ Kumu abali boa. Iyo akɔi ngando jimina, Na ajeba ngando jimina eyou.

¹⁹ A mojɔ momina, mbi najimaka bo ebɔngiti bo bopukejae bapakano baya bahekoi ai Njambe.

²⁰ Bopele bo bobasɔnee mokanda bo bakie ngando jisusu jia jicingi na bosakoa bobanjambe babokosea, na bɔɔli, na tito baya bagwa na mocibano, na makia.

²¹ Mojɔ bo bato balangaka mikanda miMose a sinagoge masu masusu maSabata. Mose adi na bato a ngando jisusu baya batɔndɔkɔ mijɔ minde, na edaka koko boa a bilulu biehele mɛnɛ.

Mojimo moDenga diYelusalema a Mojɔ moMibeko

²² Oko boa, babwɛnji, na basuku baDenga, na bato basusu baDenga, bajima bo bahɔe bakina babu, a boloma oho Antiokia na Paulo na Balanaba. Bahɔ Yuda (kombe ende etongo Balasaba) na Sila, bato baesako epele a tei ebaninga.

²³ Basɔnɔ mokanda mu na babapa: Njɛbɛ esu babwɛnji, na basuku baDenga, na baninga, ai no baninga bamakota baya badi a Antiokia, a Silia, na Kilikia.

²⁴ Iso boka bo bakina bato basu bakɛ oho ai no, na banɔngeja no, na bakeja no mokakwano a milema. Baikɛ nongo na kpaci esu.

²⁵ A mojɔ momina, iso botitani, na bojimi so basusu bo bohɔe hakina bato basu, na bobalome oho na bina’su Paulo na Balanaba,

²⁶ baya bapi njupi a mojɔ mokombe eKumu osu Yesu Masiya.

²⁷ Oko boa, bolomi Yuda na Sila baya badi botɔndɔ no ngando ji na minɔkɔ mibu bɛnɛ.

²⁸ Mojɔ bo Mwembo Mosɛnɔke mojimi, na so koko, bo botabakea muna motongo ai no, oko mijɔ mia mibwani na nu na soti.

²⁹ Toma kiani tito bamasiko ai banjambe babokosea, na makia, na tito baya bagwaka na mocibano, na bɔɔli. Okasangbindeani a mojɔ mongando jimina, ôkɔni bopele. Dikani bopele.

³⁰ Oko boa baloma bato bamina, na bo bakɛ a Antiokia. Babolea likita liDenga, na babapa mokanda momina.

³¹ Ama bo langa mokanda, ba’mi ko sepa oko na eleho emina.

³² Yuda na Sila badaka batɔndɔi. Ibo baleha baninga na bikenge binɛnɛ, na babapingeja.

³³ Bayeyoa mweka, na bato baDenga babasɔmbeja na bowi ai baya babaloma.

³⁴ Sila ko ajima bo adikae.

³⁵ Paulo na Balanaba na bakina batongo pongono, bayeyoa a Antiokia a bokoja na botɔndɔ mwako moKumu.

Mɔngɔ Momibae moPaulo

³⁶ Yana anɔ makina masu, Paulo abala na Balanaba bo, Kɔ so bosɔmbe koko a ngando jisusu jikɛ so boso a botɔndɔ mwako moKumu, bo bonje ekɔmɛli ebu.

³⁷ Balanaba apala bo Yoane (kombe ende etongo Malako) abapakae.

³⁸ Paulo ko alɛ bo babwaniti bo tomba moto yona oma sika a njea a Pampulia, na aikɛ na bu a elomu.

³⁹ Oko boa badaka na mosoo, na babɔtɔnɔ a mojɔ momina. Balanaba atomba Malako, atamba na nde a masua bo bakɛ a Kupulio.

⁴⁰ Paulo ko ahɔ Sila, na akɛ na nde; na bato baDenga babajongoa bo monganji moKumu modae na bu.

⁴¹ Akɛ a makota maSilia na Kilikia, na apingeja Menga.