Bikɔmɛli 14 - Nouveau Testament en Ngombe 1961

A Ikonia

¹ Adaka bo a Ikoma, bakwea bo babae a sinagoge eBaYuda, na bato banɛnɛ mɛnɛ bajima a mojɔ momwako mobu, na BaYuda na BaEla pongono.

² BaYuda ko baya balona bojima, bakeja bapakano kɛlɛ na balumeja milema mibu na bokosea a mojɔ mobaninga.

³ Bayeyoa ko a Ikonia, na batɔndɔ mwako moKumu na eci. Kumu angameja Ebaeli emonganji monde na bimbete na mindumba na mɔmɔ mabu.

⁴ Bato bangando ko badaka na bobɔtɔ. Likina libondo lidaka a dɔngɔ diBaYuda, na libondo litongo a dɔngɔ dibabwɛnji.

⁵ Oko boa, bakina bapakano, na BaYuda, na basuku babu, bakana bo babanɔngejae, na bo babamae matai.

⁶ Paulo na Balanaba ko baka mojɔ momina, na bacia a Lusetulia na Delube, ngando jiLukaonia, na a bisika bitongo oho,

⁷ na batɔndɔ Mwako Mopele oho.

A Lusetulia

⁸ Okina momi adaka a Lusetulia yona obotama na mako mago, pɛ bongɔ, pɛ bodala.

⁹ Momi omina ahokeaka Paulo yana atɔndɔkɔ yo mwako. Paulo acingea bo adaka na ejimeli a bohela a yogo ende.

¹⁰ Oko boa yo amonja linjenje, na abala na nde bo, Ima mema na mako mawɛ mɛnɛ. Iyo angɔ oko bongɔ, na abanga bodala.

¹¹ Yana anɛ emumu ebato mojɔ mokɔ Paulo, babala na kɔpi ebu eIkonia bo, Banjambe batiti ya ai so na elimo ebato.

¹² Babakea Balanaba kombe Zeu, na babakea Paulo kombe Ɛlɛmɛ, cina bo yo adaka na bɛtɛ ebobala.

¹³ A mojɔ momina, nganga otempelo eZeu yena edaka a sokolu engando, adoa na ngɔmbɔ baya balwaka makongo mafulɛlɛ, a modipe momongba mongando. Iyo na bato bangando Pongono, bapala bo babawejae tito o masiko.

¹⁴ Yana ko aka babwɛnji Balanaba na Paulo mojɔ momina, ba’la bisenja bibu, bakwea a ndanda ebato, na babekoa bo,

¹⁵ Ino bami, okɔkɔni mojɔ mu cina eye? Iso bodi oko bato pɛ, o adi no bɛnɛ. Milema misu na nu midi oko amɛci. Iso bodoi ai no na Mwako Mopele bo okineni ngando ji jingasangasa, a bohekoa ai Njambe obomɔ, yona oyoa Diko na nase, na madiba-mamukwa, na leka losusu lua lodi ena.

¹⁶ Bosoboso yo akina makota masusu bo badale a njea jipalaka bo.

¹⁷ Iyo ko aitaka nongo motati. Mojɔ bo yo adaka mobɔkɔli onu. Akɔkɔ bopele, alomaka no mbua badiko, na bididi bibikpeteli bileka, na alumejaka milema minu na sepi.

¹⁸ Nongo abala bo boa, edika mweka pɛ bo bato bangando babawejae tito o masiko.

¹⁹ Bakina BaYuda ko baAntiokia na Ikonia badoa. Ibo bapangoa bato, ba’la Paulo matai, na bamokpakula a sokolu engando, mojɔ bo balɛkɛ bo adi mogo.

²⁰ Bacingami ko bamohika, angɔ koko, na ahula a ngando. Yana ahoa busa, akɛ na Balanaba a Delube.

²¹ Batɔndɔ Mwako Mopele a ngando emina, na bakina bato banɛnɛ bajima. Ngɔngɔ jimina, bahula koko a Lusetulia, a Ikoma, na a Antiokia.

²² Bambilimeja milema mibacigami, na babaleha bo bayeyoe a ejimeli. Babatɔndɔ koko bo bodi bokwea a Bokumu boNjambe oko na minɔngɔ minɛnɛ.

²³ Bahɔ basuku a Menga masusu; ba’nga oko na ekia edia, na babakina a mɔmɔ maKumu ojimeaka bo.

²⁴ Banɔ a tei elikota liPisidia, na bamea a Pampulia.

²⁵ Aseja bo mwako botɔndɔ a Pelugia, bakɛ a Atalia.

²⁶ Batamba a masua a ngando emina a bohula a Antiokia. Mojɔ bo bama hɛngɛmɛ a monganji moNjambe a ngando emina, a mojɔ moelomu enɛnɛ emaka bo kɔ.

²⁷ Yana amea bo, babolea likita liDenga, na babatɔndɔ ngando jisusu jima kɔ Njambe na bu, na bo ama dipoa njea eejimeli ai bapakano.