Bikɔmɛli 10 - Nouveau Testament en Ngombe 1961

Pɛtɛlo na Kɔlunelio

¹ Okina momi adaka a Kaisalia, kombe ende Kɔlunelio. Iyo adaka kapitɛni obasoda baItalia.

² Adaka moto oejimeli na lisuma ai Njambe, yo mɛnɛ na bato basusu badenga dinde. Adaka na liikabo ai bato, na angaka Njambe bihole hisusu.

³ Bokina busa, yo anɛ obwɛnji oNjambe a njɔti, bohu mɛnɛ. Obwɛnji akwea na abala na nde bo, Kɔlunelio!

⁴ Iyo amonja oko na bɔ bonɛnɛ, na abala bo, Kumu, mojɔ modi bo? Obwɛnji amosɔmbeja bo, Njambe t’abosake nongo ma’nga mawɛ na likabo liwɛ.

⁵ Edɛye ko, toma loma ndɔsɔ emoto oho Yopa, kombe ende Simona.

⁶ Adi a ndako eSimona, moto yona obɔngejaka biobo bitito. Ndako ende edi a mbongu.

⁷ Yana amana obwɛnji yona obala na nde, Kɔlunelio abea bakɔmɛli bande babae, na soda omɔci oejimeli yona omopakaka bihole bisusu.

⁸ Abajebeja mojɔ mosusu, na abaloma a Yopa.

⁹ Yana ahoa husa, badaka oko a njea. Pɛtɛlo awea a mboba ediko endako a ehole emidi a mojɔ mobo’nga, oko yana abengeaka bo ngando.

¹⁰ Iyo adaka na nja, na adaka na posa bo ayake ekina eka. Yana ko akaleaka bo mia, yo atɔ njɔti.

¹¹ Anɛ Diko bwase, na likina libɔkɛ likatite. Lidaka o esenja enɛnɛ yena epeama a matoka manɛi a mojɔ mobosoloja.

¹² Na tito badaka a tei, tungu jisusu, na tito babolanda na mbulu badiko pongono.

¹³ Aka kɔpi ekabale na nde bo, Pɛtɛlo, angɔ! Iwa na yaka.

¹⁴ Pɛtɛlo ko abala bo, Kumu, pɛpɛ nongo mweka! Mbi nayakakini nongo eka ebe isa eka ebokia.

¹⁵ Aka koko kɔpi emina bo, Isa Njambe asɛnojai eka, wɛ obwaniti boenyamoa.

¹⁶ Moda boa bihole bisato, na libɔkɛ lisɔmbɔ koko oho Diko.

¹⁷ Pɛtɛlo aduka cina enjɔti emina oko na mokakwano a molema monde; na bato baKɔlunelio baya badukaka ndako eSimona, bamea a monɔkɔ mondako oko a ehole emina.

¹⁸ Ibo babea a bohɔjɔ isa Simona yona odi na kombe Pɛtɛlo adi ena.

¹⁹ Na yana alɛkɛ Pɛtɛlo a mojɔ monjɔti, Mwembo mobala na nde bo, Ika, bami basato badukaka wɛ.

²⁰ Ima, tita oho nase na kɛ na bu; yɛ bokakwana, mojɔ bo mbi nabalomi.

²¹ Pɛtɛlo atita, na abala na bato bamina bo, Mbi yona; odukakani oko mbi. Odoini mojɔ moye?

²² Ibo basɔmbeja bo, Okina kapitɛni obasoda, kombe ende Kɔlunelio, asɔbi bwɛnji ai obwɛnji oDiko bo alome ndɔsɔ ewɛ a bosɔ eleho ewɛ; yo adi moto oyongi epele, asumaka Njambe, na adi na gala epele a tei eBaYuda basusu.

²³ Oko boa Pɛtɛlo abasɔ a ndako bo babwɛe ena. Ahoa busa, angɔ na akɛ na bu, na bakma bato baDenga diYopa babapaka a njea.

²⁴ Ahoa koko busa, bamea a Kaisalia. Kɔlunelio abanjaka, na abolea bina’nde na denga dinde disusu.

²⁵ Yana akwea Pɛtɛlo, Kɔlunelio amosɔ, akwa a bibota binde na amosakoa.

²⁶ Pɛtɛlo ko amongɔjɔ, abala bo, Ima mema. Mbi nadi oko moto pɛ.

²⁷ Abalaka yo boa, akwea a tei na atana bato banɛnɛ baboli.

²⁸ Abala na bu bo, Ino ojebakani bo MoYuda adi na mobeko bo atakatana na moto ombota etongo, na atakwea nongo a ndako ende. Njambe ko anejai mbi bo nabwaniti bonyamoa nongo moto, pɛ bolona moto o eka ebokia.

²⁹ Oko boa alomejabi no mbi, mbi nadoi, pɛ boboma nongo kitɛ. Edɛye ko nahɔjɔkɔ no cina elomabi no ndɔsɔ embi.

³⁰ Kɔlunelio abala bo, Masu manɔbi manɛi, oko a ehole yeye, mbi nadakabi a bonga a ndako embi a ehole trois heures. Bundumo, moto yona odaka na bisenja bibolailiai amabi a boso bombi.

³¹ Iyo abalabi bo, Kɔlunelio, Njambe atabosaka monganji mowɛ, na aki bonga bowɛ.

³² Lomeja Simona Pɛtɛlo yona odi oho Yopa, a ndako eSimona nganga obiobo a dɔngɔ dimbongu.

³³ Oko boa mbi nalomejabi wɛ bokpa, na adoi wɛ, okɔi mojɔ mopele. Edɛye so basusu bodi ya a boso boNjambe, a boka ngando jisusu jisi wɛ ai Njambe, bo obale na su.

³⁴ Pɛtɛlo adipoa monɔkɔ na abala bo, Soti mɛnɛ, mbi nacingeaka bo bato basusu badi amɛci a boso boNjambe.

³⁵ Iyo asepaka na moto na moto yona omosumaka na odi na ekɔmɛli ebodongo, a makota masusu.

³⁶ Njambe aloma bwɛnji bonde ai bana baYisalaele, oko Mwako Mopele mobowi, na Yesu Masiya yona odi Kumu obato basusu.

³⁷ Ojebakani no bɛnɛ mojɔ mua mobanga a Galile na bokoja boYoane a mojɔ mobatisimo, na monangana a Yuda esusu.

³⁸ Njambe asuoa Yesu oNasaleta Mwembo Mosɛnɔke na ngulu pongono. Na yo akɛ akadale a ngando na ngando a bokɔ bilomu bipele, na a boheleja bato basusu baya badingoaka na Satana, mojɔ bo Njambe adaka na nde.

³⁹ Iso bodi banjɛnɛki bangando jisusu jikɔ yo a Iikota li BaYuda na a Yelusalema. Ibo bamobakea a mole na bamowa.

⁴⁰ Njambe ko amongɔjɔ a bogwa a busa bomasato, na ajima bo aboloe ai bato na bohu mɛnɛ;

⁴¹ te bato basusu ko, oko banjɛnɛki bama yo hɔ boso, oko so bɛnɛ. Mojɔ bo yana angɔ yo a bogwa, iso boyaka na bomwaka na nde.

⁴² Na abekea so bo botɔndɔe bato Mwako Mopele, na bo bojebejae bato bo Njambe ahɔ oko yo pɛ a boda juji obato, babomɔ na bagwake pongono.

⁴³ Batɔndɔi basusu badi batati bande, na batɔndɔkɔ bo moto na moto yona omojimeaka asɔkɔ boyɛ bojibe a kombe ende.

⁴⁴ Amaka bala Pɛtɛlo bikenge bimina, Mwembo Mosɛnɔke mo’mi kwa oko ai bato basusu baya bahokeaka mwako.

⁴⁵ Oko boa epeeli eMwembo Mosɛnɔke esopea ai bapakano pongono; na bato baejimeli baya badoa na Pɛtɛlo bakamoa bou mɛnɛ a mojɔ momina, mojɔ bo ’bo bɛnɛ badaka BaYuda.

⁴⁶ Baka koko bato bamina bakabale na kɔpi jitongotongo na bakakumejae Njambe.

⁴⁷ Na Pɛtɛlo abala bo, Bato ba ba’si Mwembo Mosɛnɔke o asɔ so bɛnɛ; odi bolemba bo batabatisama a Inadiba nda?

⁴⁸ Iyo ababekea bo babatisame a kombe eYesu Masiya. Na bamongɔɔnɔ bo ayeyoe na bu makina masu.