Bikɔmɛli 1 - Nouveau Testament en Ngombe 1961

Yesu Ayana oho Diko

¹ Njɛbɛ Teopilo; mokanda moboso mosɔnɔ mbi modaka a mojɔ mongando jisusu jibanga Yesu bokɔ na bokoja,

² oko a busa botombama yo oho Diko, yana apa yo mibeko ai bacingami bande bahɔmɔke oko na Mwembo Mosɛnɔke.

³ Yana asia bodingoa bonde, asaneja ai bo oko mɔ, na bimbete binɛnɛ. Anɛnɛkɛ na bu masu domi-inɛi, na abatɔndɔkɔ mijɔ moBokumu boNjambe.

⁴ Yana adaka yo na bu, ababekea bo batapeta donga a Yelusalema, na bo bambe njikano eSango. Abala na bu bo, Mbi mɛnɛ natɔndɔi no mojɔ momina.

⁵ Mojɔ bo, Yoane abatisa a madiba; ino ko ôbatisamani a Mwembo Mosɛnɔke, oko masu manɔkini manɛnɛ.

⁶ Yana atitana bo a esika emɔci, bamohɔjɔ bo, Kumu, odi bosɔmbeja bokumu ai Yisalaele a ehole ye?

⁷ Iyo abasɔmbeja bo, Mojɔ mobojeba bihole na bididi moditi nongo mojɔ monu; Njambe abikolea na kpaci ende mɛnɛ.

⁸ Ino ko ôsɔni ngulu yana âdoa Mwembo Mosɛnɔke ai no. Na ôdani batati bambi a Yelusalema, a likota lisusu liYuda, a Samalia, oko a suka engondo.

⁹ Abala yo boa, angɔjɔmɔ oho Diko, oko yana anjaka bo. Eyembi emosɔ, na baimonɛ koko.

¹⁰ Akɛkɛ yo boa, oko yana akahoaka bo miso diko, bami babae baya balwaka bisenja bipu bama a dɔngɔ dibu.

¹¹ Ibo babala bo, Ino bami baGalile, okahoakani miso diko boa mojɔ moye? Iyo Yesu yona odaki na nu, yona otombami oho Diko, ahulabi koko boa, o amoni no akɛkɛ oho Diko.

Bacingami Basɔmbɔ a Yelusalema

¹² Ibo badonga a Mono moOlive, na basɔmbɔ a Yelusalema; mosiso momina moditi motutu, oko mwɛngi momongɔ mobusa boSabata pɛ.

¹³ Amea bo oho, bakwea a ndako, oko a ekenge esamaka bo a mboba ediko. Badaka ena oko Pɛtɛlo na Yoane; Yakobo na Andalea; Pilipo na Toma; Balatelemi na Matayo; Yakobo mwana oAlape, Simona Selote, na Yuda mwana oYakobo.

¹⁴ Ibo basusu, na bakina bali, na Malia nange eYesu, na bananango, bayeyoa a bonga na bingi na molema momɔci.

Matia Asangoa Esika eYuda

¹⁵ Pɛtɛlo angɔ bokina busa a likita libaninga, (badaka baboli isa bato mokama na domi-ibae na dea) na abala bo,

¹⁶ Baninga, Mwembo Mosɛnɔke mobala eyou na monɔkɔ moDawidi a mojɔ moYuda yona odaka kɛngi ebato baya bapea Yesu, na mosɔnɔ momina moikputoa nongo.

¹⁷ Mojɔ bo adaka okina osu, na aci-ngamaka na su a elomu ye.

¹⁸ (Moto omina asomba gbie na likonja lisɔ yo a mojɔmobobe bonde. Na yana akwa yo nase, mokuku monde mobatoa oko bobatoa, na sɔpɔ jinde jisusu jimana.

¹⁹ Bato basusu baYelusalema bajeba mojɔ momina, na babakea gbie emina kombe Akeladama; cina ekombe emina edi Gbie eMakia.)

²⁰ Mosɔnɔmɔ a mokanda moNjembo bo, Kina ndako ende edikae mopɔtu, Bo moto atada nongo ena. na Kina moto otongo asangoe elomu ende.

²¹ Bakina bami babanga bocingama na su a ehole ebatisimo eYoane, na bayeyoa na su ehole esusu edaka Yesu a bodala a tei esu,

²² oko a busa botombama yo oho Diko, yana adaka yo a ndanda esu. Oko boa okina momi obu, yona odi monjɛnɛki obongɔ boYesu a bogwa, abwani bocingama na su.

²³ Bameja bato babae, Yosepa, kombe ende etongo Balasaba, na ekina kombe etongo koko Yuseto; na Matia.

²⁴ Na ba’nga bo, Kumu, wɛ yona ojebaka milema mibato basusu, apeja so moto ohɔi wɛ a tei ebu babae

²⁵ bo asangoe elomu eobwɛnji ekina Yuda yana akɛ yo a esika ende.

²⁶ Babɔ kombe emoto na bahɔ oko Matia, na yo akwea hoa a libondo libabwɛnji domi-na-omɔci.