2 Timoteo 4 - Nouveau Testament en Ngombe 1961

¹ Mbi nalehaka wɛ a boso boNjambe, na a boso boMasiya Yesu yona odi bosambeja bahelake na bagwake; nalehaka wɛ a mojɔ mobodoa bonde na bokumu bonde.

² Tɔndɔ Mwako Mopele na bingi, isa na pela, isa na ngange. Lemoa na bato; basia, baleha, na pɛ bongwa nongo bokoja.

³ Mojɔ bo ehole ekɛkɛ adoe bo bato batahɔnɔ bohokea bokoja bosoti. Badi boduka bakoja banɛnɛ o apa-laka milema Mibu bɛnɛ, mojɔ bo matoi mabu môda na kalakala a boka mijɔ miyene.

⁴ Batahokea koko mijɔ misoti, na bâhekoa oko a masɔ.

⁵ Wɛ ko, sabekea bihole bisusu. Da na eci a tei ebodingoa. Kɔ elomu emotɔndɔi oMwako Mopele. Kɔ ngando jisusu jia jicingi na elomu ewɛ.

Bolɛ boPaulo a Bogwa

⁶ A mojɔ mombi mɛnɛ, edikai mweka pɛ bo makia mambi masopee o lisiko. Ehole embi eboyana edi hulelu.

⁷ Mbi nani etumba epele. Namei a suka enjea embambano. Nabanei ejimeli.

⁸ E dɛye, likongo libodongo lisɛlingoami a mojɔ mombi; Kumu yona osambejaka na soti, âebakea ai mbi a busa bomina; te nongo ai mbi pɛ, oko ai bato basusu baya badi na posa ebodoa bonde.

Bileho Bisuka

⁹ Kenga bodoa ai mbi ngɔngɔ mweka, mojɔ bo Dema akini mbi.

¹⁰ Iyo adi oko na posa engando jingondo ye, na akɛi a Tɛsalɔnike. Kulusene akɛi a Galatia. Tito akɛi a Dalamatia.

¹¹ Odikai na mbi oko Luka pɛ. Bea Malako; doa na nde pongono, mojɔ bo yo abwani bokɔmeja mbi a elomu.

¹² Nalomi Tukiko a Ɛpɛsɔ.

¹³ Okadoa, doa na kasaka eyai ekina mbi a ndako eKalupo a Toloa, na mikanda pongono; na pɛ bobosa nongo mikanda Mibosɔnɔ.

¹⁴ Alesandele, molui oliboma, anɔngeja mbi bou mɛnɛ. Kumu ko adi bomopa ndese yena ebwani na bikɔmɛli binde.

¹⁵ Toma nganjama wɛ mɛnɛ na moto omina, mojɔ bo adaka na lisoki linɛnɛ a mwako mosu.

¹⁶ A ehole eesambi embi eboso, pɛpɛ nongo moto oyeyoa a dɔngɔ dimbi. Ibo basusu bakina mbi oko bokina. Nangaka bo Njambe aba yɛe mojɔ momina.

¹⁷ Kumu ko adaka ami a dɔngɔ dimbi, na apani ngulu a botɔndɔ Mwako Mopele mosusu, bo bapakano basusu ba’ke. Oko boa nahela a mino magbɔngɔ.

¹⁸ Kumu adi boheleja mbi a ndungu jisusu jibe, na âbanea mbi a mojɔ moBokumu bonde boDiko. Ekumu ai yo oko na bosusu! Amen.

¹⁹ Abɛjɛ Puliseka na Akwila, na denga dionesipolo.

²⁰ Elaseto adikai a Kolinto; nakwa Tulopimo na yogo a Melita.

²¹ Kenga na bopipo a bodoa oko adi edidi epio pɛ bopeta mea. Yubulu abɛjɛkɛ wɛ njɛbɛ, na Pude, na Kulaudia, na baninga basusu babɛjɛkɛ wɛ pongono.

²² Yɛ Kumu adae na mwembo mowɛ. Yɛ monganji moNjambe modae ai no.