2 Timoteo 3 - Nouveau Testament en Ngombe 1961

¹ Toma jeba bo ehole eminɔngɔ edabi a masu masuka.

² Mojɔ bo epaeli ebato edabi oko ai bo bɛnɛ; badabi na posa elikonja, bato baegbo na jala, bato babosambolu, bato balipanga ai baboti, pɛ lisuma, bato bapɔmbɔli,

³ bato baya bapeliti nongo epaeli, bato baya bakputojaka sako, bato babiloli, bato baya basumaka oko posa jibu bɛnɛ, bato basanga, soki jibato bapele,

⁴ bato bangabi, bato baelabe baya basakumejaka bo bɛnɛ; na Njambe na bo bɛnɛ, bapa-laka gbo oko bo bɛnɛ.

⁵ Badabi na ekina elimo eejimeli ai Njambe a sokolu, banganabi ko ngulu eejimeli emina.

⁶ Pɛ bopangana nongo na bato baya badi na bikɔmɛli bimina. Mojɔ bo bakina babu bakweaka a tei ebato na poloso, na bapangoaka bali ba yɛmbu baya bangwai muna mojibe jibu, bali baya badingoaka na posa jibe jinɛnɛ,

⁷ baya bakoaka bihole bisusu, pɛ ko bomea a ejebeli eSoti.

⁸ Yane na Yambele baswiana na Mose eyou; bato bamina ko baswianaka na Soti; milema Mibu mipɔi, na ejimeli ebu edi oko ejimeli ebokosea.

⁹ Elomu ebu etabɔngɔ ko, mojɔ bo bato basusu badi bonɛ libunga libu a bohu, o anɛ bo libunga libato ba babae.

¹⁰ Wɛ ko ojebaka na bopele mɛnɛ bokoja bombi, ekɔmɛli embi, mokano mombi, ejimeli embi, lingbangba limbi, epaeli embi, bombɔki bombi,

¹¹ bodingoa na minɔngɔ mimbi, na mijɔ minɛ mbi a Antiokia, a Ikonia na a Lusetulia. Nasɔ bodingoa bonɛnɛ na eci; Njambe ko ahelejani a minɔngɔ mi misusu.

¹² Ee, bato basusu baya bapalaka bosusa Yesu Masiya na soti badi bodingoa.

¹³ Bato babe ko, na bato babokosea badi bohɛ na bobe; badi balaboake bo bɛnɛ, na balabojaka bato batongo pongono.

¹⁴ Wɛ ko yeyoa a ngando jikoa wɛ. Ojijimaka na soti, na ojebaka baya bakoja wɛ.

¹⁵ Olandoa na Mokanda moNjambe oko a bwɛngɛ bowɛ, mua mobwani bopa wɛ bowɛi a mojɔ momohelo cina eejimeli ai Masiya Yesu.

¹⁶ Njambe asɔneja Misɔnɔ misusu na Mwembo monde; Mibwani a mojɔ mobokoja, a mojɔ moboleha, a honeja mabunga, na a bojebeja ngando jisoti,

¹⁷ bo moto yona odi moto oNjambe adae mobɔngɔke, na adae na molilo mosusu a bokɔ bilomu bisusu bipele.