2 Timoteo 2 - Nouveau Testament en Ngombe 1961

Eleho ePaulo ai Timoteo

¹ Wɛ ko mwana’mbi, da moto ongulu a mojɔ momonganji mua modi a tei eMasiya Yesu.

² Jebeja bato baejimeli ngando jika wɛ ai mbi a boso bobatati banɛnɛ, bo babwane bokoja bato batongo.

³ Adi wɛ soda mopele oMasiya Yesu, asɔ libondo liwɛ limonɔngɔ.

⁴ Isa moto adi soda, abɔtɔni na bilomu bitongo bingondo, bo ase-pejae kapitɛni onde.

⁵ Na moto yona opotaka mbambano amiti suma Mibeko mimakou, atalonga nongo.

⁶ Moswa ’gbie, yona okɔkɔ elomu, abwani bosɔ libondo liboso limbuma jigbie.

⁷ Toma lɛ mijɔ Mibalaka mbi; Kumu adi bopa wɛ bocinea a mojɔ mongando jisusu.

⁸ Kina bolɛ bowɛ bodae ai Yesu Masiya ombota eDawidi yona ongɔ a bogwa; Mwako Mopele mombi oko mu.

⁹ Mbi nadingoaka o moto mobe, na nadi a minyɔlɔ a mojɔ momina. Ebaeli eNjambe ko editi a minyɔlɔ.

¹⁰ Na mbi nahɔnɔkɔ ngando ji jisusu a mojɔ moBahɔmɔke, ho ’bo pongono basɛ mohelo mua modi ai Masiya Yesu, na ekumu yena edi na hosusu.

¹¹ Ebaeli ye edi soti; isa bogwi na nde, bôhela na nde pongono.

¹² Bokayeyoa na lingbangba, bôkumejama koko na nde. Bokamongana ko, yo adi bongana so.

¹³ Nongo ejimeli ekataka na su, yo t’akputojake nongo sako, mojɔ bo aditi bosa’ngana yo mɛnɛ.

Eleho a Mojɔ Mobakoja Babokosea

¹⁴ Toma lɛjɛ bato ngando jimina, na baleha a boso boNjambe bo batanoana moano a mojɔ mobikenge bikɔpi. Mojɔ momina mobɔngiti, na mobejaka milema Mibato baya bakaka.

¹⁵ Kɔ na ngulu ewɛ esusu bo opasame a boso boNjambe, o moto yona oditi na sɔni a mojɔ moelomu ende, yona odi na bɛtɛ a elomu eEbaeli eSoti.

¹⁶ Toma bɔtɔnɔ ko na bibalabala na kitɛ jingasangasa. Mojɔ bo ngando jimina jidi bolaboja bato a njea jibe,

¹⁷ na bokoja bobu bodi o pola emonio yena ehɛkɛ a boyaka mokuku.

¹⁸ Umenaio na Pileto badi a libondo limina. Ibo bapengoi a njea esoti; babalaka bo bo’ngɔ a bogwa bosia ehele, na babejaka ejimeli ebakina bato.

¹⁹ Pɛ mojɔ; eyoeli-ecina embilimake eNjambe eyeyoaka, yena edi na mosɔnɔ mu, Kumu ajebaka bato bande mɛnɛ. na Yɛ moto na moto yona ongaka a kombe eKumu acie bobe.

²⁰ Ndako enɛnɛ editi na bisɛi biwɔlɔ na palata pɛ. Bikina biyoama na mole na libali pongono. Bikina bidi a mojɔ moelomu epele, na bikina bitongo bidi a mojɔ moelomu engasa.

²¹ Moto akasabanea na bosɛnɔ, na akabɔtɔnɔ na ngando jimina, yo ada esɛi eekumu yena esɛnoi a mojɔ moelomu emoswa’nde, na ebwani na bilomu bisusu bipele.

²² Cia posa jibe jimwenga. Susa na bingi njea ebodongo, ejimeli, epaeli, bowi, na bato baya basakoaka Kumu na milema misɛnɔke.

²³ Toma lona ko bibalabala bingasa na bikitɛ. Ojebaka bo bingɔjɔkɔ oko miano pɛ.

²⁴ Mokɔmɛli ko oKumu abwaniti bonoana moano; adi boda na molema mo yɛmbu ai bato basusu, na bɛtɛ ebokoja, moto olingbangba.

²⁵ Adi boleha baya badi na nde soki oko na bo yɛmbu, na njingo bo Njambe abasɛ dosa bo bajɛbɛ Soti.

²⁶ Oko boa, bakasisoa, badi bohela a elambo eSatana yona obapea masungu bo bakɔe bolulea bonde.