2 Bakolinto 5 - Nouveau Testament en Ngombe 1961

¹ Iso bojebaka bo diako disu diboda ya nase dikagwa, bodi bosɔ ndako mɛnɛ ai Njambe. Etayoama na mɔmɔ mabato, na êyeyoa oko na bosusu oho Diko.

² Bobemaka a diako di, oko na posa bo bobolame atei endako esu oho Diko.

³ Bokada na elwaeli emina, botada nongo mbundu.

⁴ Adi so a diako di, boyeaka, na bodi na milema manji. Editi bo bopalaka bohwa mokuku mu o ahwaka so bisenja. Edi bo bopalaka bo bolwae elwaeli etongo, bo mokuku mobo gwa mokindoe bomɔ.

⁵ Njambe yo mɛnɛ asɛlingoa so a mojɔ momina, na abopa Mwembo o ndanga.

⁶ Oko boa bodi na eci masu masusu. Bojebaka bo boditi na Kumu esika emɔci yana adi so a mokuku mu.

⁷ Mojɔ bo, bodalaka oko na ejimeli, te na njɛnɛ emiso.

⁸ Bodi na eci, na posa esu edi bo bodo-nge a mokuku mu, bo bodae a esika edi Kumu.

⁹ A mojɔ momina, bodukaka njea bo bomosepejae, isa a mokuku mu, isa oho.

¹⁰ Mojɔ bo, iso basusu bodi bo’ma a bohu a boso bomongbɛlɛngɔ moesambi eMasiya, bo moto na moto asɛ ndese ende a mojɔ mobopele, isa a mojɔ mobobe bokɔ yo a mokuku mu.

Ngulu eBabwɛnji

¹¹ Iso bokengaka bojimeja bato, mojɔ bo bonjaka Kumu oko na bɔ. Iso bɛnɛ bodi a bohu a miso maNjambe. Nadi koko na njingo bo ekɔmɛli esu edi bohu a Inilema minu.

¹² Botasalongejaka koko ai no. Bopaka no oko njea ebosepa a mojɔ mosu. Oko boa odini bosɔnibeja ai bato baya basakumejaka a mojɔ mongando jingasa, te ngando jisoti

¹³ Isa bodi na lilale, lidi a mojɔ moNjambe. Isa bodi na yongi epele, edi a mojɔ monu.

¹⁴ Bosusaka njea engɛnjɔ eMasiya; mojɔ bo bojebaka na soti bo omɔci agwea bato basusu; oko boa bato basusu bagwa.

¹⁵ Na yo agwea bato basusu bo mihelo mibato baya badi mɔ, mitaya da ai bo bɛnɛ, oko ai yona obagwea, yona ongɔ koko a bogwa a mojɔ mobu.

¹⁶ A mojɔ momina, iso botajeba koko moto a mokuku pɛ. Bojeba Masiya a mokuku boso; edɛye ko botamojebaka koko boa.

¹⁷ Mojɔ bo, isa moto adi a tei eMasiya, adi moto moyene. Ngando jiyou jisia. Ngando jisusu jidi oko jiyene.

¹⁸ Mojɔ mu mosusu mocingi na Njambe yona ohuleja so ai yo mɛnɛ a tei eMasiya, na abopa elomu ebosiili.

¹⁹ Cina emina edi bo, Njambe yo mɛnɛ adaka a tei eMasiya mosiili ongondo ye ai yo mɛnɛ, pɛ bolanga jibe jibu o nongo, na abopa bwɛnji bobosiili.

²⁰ Oko boa so bodi babwɛnji baMasiya. Njambe alehaka no na ebaeli esu, na so bongɔɔnɔkɔ no a kombe eMasiya bo ojimeni mokongo moNjambe.

²¹ Masiya aijeba nongo bobe; Njambe ko amokɔ bo adae bobe a mojɔ mosu, bo so bodae bodongo boNjambe a tei ende.