2 Bakolinto 2 - Nouveau Testament en Ngombe 1961

¹ Mbi najima a molema mombi bo nitadoa koko ai no a bokeja no wa.

² Nakakeja no wa, odi bosepeja mbi nda? oko yona odi na wa a mojɔ mombi?

³ Cina emokanda mosɔnɔ mbi edaka bo bato baya babwani bosepeja mbi a bodoa bombi, batakeja mbi wa. Nalɛ a molema mombi bo odini bosepa no basusu a mojɔ mosepi embi.

⁴ Nasɔnea no boso, na monɔngɔ, na jɔɔlɔ a molema mombi, na mbisoli jinɛnɛ, te bo nakejae no wa, oko bo ojebeni epaeli embi enɛnɛ ai no.

⁵ Isa okina moto anɔngeja batongo, ainɔngeja mbi; anɔngeja oko no bosusu, isa bakina banu banɛnɛ. (Nitapalaka bohɛjɛ mojɔ momina.)

⁶ A mojɔ momoto omina, mokindo mosɔ yo ai banɛnɛ banu mobwani.

⁷ Edɛye, obwanini bohekoa a bokina mojɔ monde, na a bogɔmbeja moto omina, bo asaka dinda a monɔngɔ monde monɛnɛ.

⁸ Oko boa, mbi nangɔɔnɔkɔ no bo omonejaeni koko epaeli enu.

⁹ Nasɔnea no boso a mojɔ momina, bo nameke no, a bojeba isa odini na lisuma a ngando jisusu.

¹⁰ Okakineani moto, mbi namo-kineaka pongono. Mojɔ mokini mbi (isa nakini mokina mojɔ) modi a mojɔ monu, a boso boMasiya,

¹¹ bo bosaka samboa na Satana; mojɔ bo bojebaka poloso ende.

¹² Iyana amea mbi a Toloa a botɔndɔ Mwako Mopele moMasiya, Kumu ahoja njea ai mbi bohu mɛnɛ.

¹³ Molema mombi ko modaka na manji, cina bo nainɛ mwangwa’mbi Tito oho. A mojɔ momina, naseana na bu, na nakɛ a Makedonia.

¹⁴ Mbi nasakoaka Njambe mojɔ bo adalejaka so mondinda na Yesu, na ekumu ende, masu masusu. Na ejebeli ende enanganaka na su a bisika bisusu o soo epele.

¹⁵ Mojɔ bo, so bodi ai Njambe oko soo epele eMasiya, a mojɔ mobato baya bahelaka, na baya bagwaka pongono;

¹⁶ soo ebogwa ai baya bagwaka, na soo ebomɔ ai baya bahelaka. Obwani na ngando jimina nda?

¹⁷ Iso botakɔkɔ bwasa na Ebaeli eNjambe, o akɔkɔ bakina. Bodi bato basoti, baya basɔ elomu emina ai Njambe. Bobalaka a boso boNjambe na a tei eMasiya.