2 Bakolinto 11 - Nouveau Testament en Ngombe 1961

¹ Nitapalaka bo ongwaeni bogegele bombi bokba; dani na lingbangba a mojɔ mombi.

² Nadi na likaka a mojɔ monu, na likaka limina lihuli ai Njambe, mojɔ bo mbi nahanga no moki o moseka mosɛnɔke ai muma’nde omɔci, bo napɛ no ai Masiya.

³ Njɔ ko akosea Ewa na poloso ende; na mbi nadi na mokakwano bo milema minu misaka beha boa pongono, na osaka kinani lisuma linu lisɛnɔke ai Masiya.

⁴ Mojɔ bo okina moto akadoa a botɔndɔ mojɔ moYesu otongo,—te yona otɔndɔkɔ so—osɔkɔni moto omina; na osɔkɔni mwembo motongo—te nongo mwembo mosɔ no; na ojimakani mokina mwako motongo—te nongo Mwako Mopele mosɔ no.

⁵ Mbi nalɛkɛ bo naditi nongo ngɔngɔ jibabwɛnji bamina bagala.

⁶ Isa napeliti bɛtɛ ebobala, nadi na ejebeli; naneja no mojɔ momina bohu mɛnɛ a ngando jisusu.

⁷ Mbi natɔndɔ no Mwako Mopele moNjambe, pɛ ko bosɔ nongo likonja a mojɔ momina; yana asatiteja mbi boa a bokumeja no, nakɔ mojɔ mobe?

⁸ Menga matongo madika ngasa mojɔ bo nasɔ likonja ai bo, bo nabwane bokɔmɛ no ngasa.

⁹ Adaka mbi na taka a tei enu nainɔngeja moto bo akɔmejae mbi, mojɔ bo baninga baya badonga oho Makedonia bakɔmejani na leka lotakaka na mbi. Mbi nakɔ bo nitada nongo muna ai no, na nadi bokɔ boa.

¹⁰ Natɔndɔkɔ no na soti eMasiya mɛnɛ yena edi a tei embi, bo mtakma bosakumeja na mojɔ momina a makota masusu maAkaya.

¹¹ Mojɔ moye? Naditi na epaeli ai no? Njambe ajebaka bo nadi na epaeli ai no.

¹² Mbi ko nadi bokɔ o akɔkɔ mbi edɛye, bo nagegeanejae bato baya basakumejaka bo babwani na su.

¹³ Bato bamina badi babwɛnji babokosea, bakɔmɛli baepulu; badi oko na elwaeli pɛ ebabwɛnji baMasiya.

¹⁴ Iso boditi na bokamoa a mojɔ momina, cina bo Satana yo mɛnɛ adi na elwaeli eobwɛnji obohu.

¹⁵ Oko boa, bakɔmɛli bande bakakosea bo badi bakɔmɛli babodongo, bobwaniti bokamoa. Suka ebu êbwana na bikɔmɛli bibu.

¹⁶ Natɔndɔkɔ no koko bo pɛpɛ nongo moto onu obwani bolɛ bo mbi nadi egegele. Okalɛni ko bo nadi egegele, asɔni mbi o egegele, bo mbi nasakumejae pongono.

¹⁷ Abalaka mbi boa, nitabalaka na ebaeli eKumu; nabalaka oko na bogegele, cina eejimeli embi bo nabwani bosakumeja.

¹⁸ Bato banɛnɛ basakumejaka na ngando jingondo; oko boa mbi koko nadi bosakumeja.

¹⁹ Adi no bato babowɛi no bɛnɛ, otangwani bigegele.

²⁰ Moto akapika no babuli, akayaka leka lonu losusu, akasamboja no, akada na egbo, akaboma maso manu, otalonani moto omina.

²¹ Nadi na sɔni a bobala na nu bo mbi naihɔnɔ bokɔ boa. Pɛ mojɔ; isa bato bamina basakumejaka, mbi nadi bosakumeja pongono. (Nabalaka o egegele!)

²² Isa bo badi BeEbele, mbi nadi MoEbele pongono, isa bo badi BaYisalaele, mbi nadi MoYisalaele pongono; isa bo badi bana baAbalayama, mbi nadi mwana oAbalayama pongono.

²³ Isa bo badi bakɔmɛli baMasiya, esingaiti mbi. (Nabalaka o moto olilale.) Mbi nakɔ bilomu bmɛnɛ; nakwea a blɔkɔ bihole binɛnɛ; batuani nji pɛ njɛngi; napa njupi bihole binɛnɛ;

²⁴ BaYuda batua mbi nji bihole bitano, nji domi-isato na libwa, nji domi-isato na libwa.

²⁵ Batuani na miba-kake bihole bisato. Ba’la mbi matai ehole emɔci. Nasopea na masua bihole bisato. Nadaka dusu limɔci a madiba-mamukwa oko a boliko.

²⁶ Nakɛ mɛngɔ minɛnɛ. Napa njupi a dua, napa koko njupi a mojɔ momibengo; napa njupi a mojɔ mobato bahkota limbi mɛnɛ, na a mojɔ mobapakano pongono; napa njupi a ngando, na njupi a lisobe; napa njupi a madiba-mamukwa, na njupi a mojɔ mobaninga babokosea.

²⁷ Nadaka na bilomu na minɔngɔ bou mɛnɛ, pɛ bohwɛ na bulu, oko na nja, na ekangola bou mɛnɛ, na bikia bihole binɛnɛ, na pio na mbundu pongono.

²⁸ Te nongo ngando jimina pɛ; nadi na muna a molema mombi tu busa a mojɔ moMenga masusu.

²⁹ Okina akapeka, mbi napekaka pongono. Okina akakwa, molema mombi mongoaka oko bongoa.

³⁰ Isa nadi bosakumeja, nasakumeja oko a mojɔ mongando jia jinejaka boyɛmbu bombi.

³¹ Njambe, Sange ’Kumu Yesu yona odi na bojongoa oko na bosusu, ajebaka bo nitakosaka.

³² Adaka mbi oho Damaseke, gouverneur ongando, mokɔmɛli oAleta yona odaka kumu, adukeja mbi a ngando esusu eDamaseke bo apee mbi.

³³ Mbi ko nahela a mɔmɔ mande; banɔjɔ mbi a linanisa na basoloja mbi a mongba mongando a tei eekɔlɔ.