2 Batɛsalɔnike 2 - Nouveau Testament en Ngombe 1961

Bodoa boMasiya

¹ Baninga, a mojɔ mobodoa boKumu osu Yesu Masiya na bobolea bosu ai yo, bongɔɔnɔkɔ no

² bo otasanɔngejani, na bo otakakwanani a milema minu, isa a mojɔ momwembo, isa ekina ebaeli, isa mokina mokanda mobalaka bato bo mosɔnɔmɔ na mbi, bo Busa boKumu bomei.

³ T’ojimeni oko bo moto akosee no nongo mweka. Mojɔ bo bopengoa bonɛnɛ bôpeta da oko Busa bomina bomeakini; na Moto oBobe adi bopeta mana, oko Mwana oMokindo,

⁴ na Soki yona osakumejaka bo anɔi Njambe mɛnɛ, na bo anɔi mijɔ misusu misakoaka bato. Adi boda a tempelo eNjambe, na âsakumeja bo yo adi Njambe.

⁵ Obosaini bo mbi natɔndɔ no mijɔ mimina yana adaka mbi oho ai no?

⁶ Na ojehakani bo mokina mojɔ momo-mbɛjɛkɛ bo asaka mana oko ehole ende ebwanakini.

⁷ Mojɔ bo Ndungu eBobe ekɔkɔ elomu ende oko e dɛye; endele ko, yona omo-mbɛjɛkɛ e dɛye adi bomombɛjɛ oko a ehole ende ebodonga.

⁸ Yona Mobe asa ko amane. Kumu Yesu ko adi bomowa na mohuli momo-nɔkɔ monde, na âmoghokeja na ekumu ehodoa bonde.

⁹ Yona Mobe ko akamana, âda na ngulu esusu eSatana, na âkɔ bimbete, na mindumba Mibokosea

¹⁰ na epulu enɛnɛ ebobe, a mojɔ mobato baya badi bogwa, cina bo balona epaeli eSoti bo bahele.

¹¹ A mojɔ momina, Njambe adi boloma ekina ngulu elaboake a tei ebu bo bajimee oko bokosea.

¹² Oko boa, bato basusu baya baijimea Soti na basepa oko na bobe, bâdumbama oko bodumbama.

¹³ Baninga, Kumu adi na nu ngɛnjɔ; na so bobwani bosakoa Njambe bihole bisusu mojɔ bo Njambe ahɔ no oko a libangake bo oheleni, oko na hosɛnoja boMwembo, na cina eejimeli eSoti.

¹⁴ Iyo abea no na Mwako Mopele mosu oko a mojɔ momina, bo osɛni ekumu eKumu osu Yesu Masiya.

¹⁵ Oko boa baninga, dani bambilimake; peani boku bokoja bosɔ no ai so, isa na monɔkɔ, isa na mokanda.

¹⁶ Yɛ Kumu osu Yesu Masiya yo mɛnɛ, na Njambe Sangwa’su, yona opala so na opa so bogɔmbeja bua bodi na bosusu, na njingo epele oko na monganji monde. Yɛ agɔmbejae milema minu na ambihmejae no a bilomu bisusu bipele, na bikenge bisusu bipele.