2 Batɛsalɔnike 1 - Nouveau Testament en Ngombe 1961

¹ Paulo na Silwano na Timoteo, a Denga diBaTɛsalɔnike dia didi a tei eNjambe Sangwa’su na Kumu osu Yesu Masiya.

² Yɛ monganji na bowi boNjambe Sango na Kumu Yesu Masiya bodae na nu.

Ejimeli eBatɛsalɔnike

³ Baninga, iso bobwani bosakoa Njambe bihole hisusu a mojɔ monu. Mojɔ momina mohɔngi, cina bo ejimeli enu ekɛkɛ bohɛ bou mɛnɛ, na epaeli enu, moto ai mina’nde moto, ehɛkɛdea pongono.

⁴ A mojɔ momina, so bosakoaka no a Menga maNjambe, a mojɔ molingbangba na ejimeli enu, a tei eminɔngɔ na madingoa masɔkɔ no.

⁵ Mojɔ momina modi embete bo Njambe asambejaka bojo; odingoakani a mojɔ moBokumu boNjambe, na yo abɔngejaka no a mojɔ moBokumu bomina.

⁶ Na Njambe akadingoja baya badingo-jaka no, asambejaka oko bojo,

⁷ na âhemeja so na no baya badi-ngoaka, a busa bômana Kumu osu Yesu oho Diko na bahwɛnji bande bapipo,

⁸ a bokunda likundu na mosa ai baya badi pɛ bojima Njambe, na pɛ bosuma Mwako Mopele moKumu osu Yesu.

⁹ Ibo bâdingoa na bodumba bua bodi na bosusu, na bâda na boso boKumu na ekumu engulu ende, kanga bohali mɛnɛ

¹⁰ yana âdoa yo, bo basɛnɔke bande bamokumejae, na bato basusu baya bajimaka bakamoe a busa bomina (cina bo ojimani tati esu a tei enu).

¹¹ A mojɔ momina, so bongaka bihole bisusu a mojɔ monu, bo Njambe abɔngejae no a mojɔ mobobea bonu; yɛ abɔngejae na ngulu ende mikano minu misusu mipele, na bilomu bisusu biejimeli enu,

¹² bo kombe eKumu osu Yesu Masiya edae na ekumu a tei enu, na bo odaeni na ekumu a tei ende, cina emonganji moNjambe osu naKumu Yesu Masiya.