1 Yoane 5 - Nouveau Testament en Ngombe 1961

¹ Moto na moto yona ojimaka bo Yesu adi Masiya abotama na Njambe. Na moto na moto yona odi na ngɛnjɔ ai moboti, adi koko na ngɛnjɔ ai mwana’nde.

² Oko boa bojebaka bo bodi na ngɛnjɔ ai bana baNjambe isa bodi na ngɛnjɔ ai Njambe, na isa bosumaka Mibeko minde.

³ Isa ngɛnjɔ ai Njambe edi, lisuma a Mibeko minde lidi koko. Na Mibeko minde miditi na kpɔkɔsɔ.

⁴ Moto na moto yona obotama na Njambe agbokejaka ngondo; na lilonga lia ligbokejaka ngondo lidi oko ejimeli esu.

⁵ Ogbokejaka ngondo nda? Oko yona ojimaka bo Yesu adi Mwana ’Njambe.

⁶ Edi oko yo, Yesu Masiya, yona odoa na madiba na makia; te na madiba pɛ, oko na madiba na makia pongono.

⁷ Na Mwembo modi motati, mojɔ bo Mwembo modi Soti.

⁸ Batati badi basato, oko Mwembo na madiba na makia; na tati ebu basato edi oko tati emɔci.

⁹ Bokajima tati ebato, tati eNjambe enɔi tati ebato, mojɔ bo tati eNjambe edi tati a mojɔ moMwana’nde.

¹⁰ Moto yona ojimaka Mwana ’Njambe adi na tati emina a tei ende mɛnɛ. Moto yona odi pɛ bojima Njambe, akɔkɔ Njambe mokosei, mojɔ bo atajimaka tati etataka Njambe ai Mwana’nde.

¹¹ Na tati emina edi oko ye, bo Njambe apa so bomɔ bua bodi oko na bosusu; na bomɔ bomina bodi a tei eMwana’nde.

¹² Moto yona odi na Mwana a tei ende adi na bomɔ. Yona ko opeliti Mwana apeliti bomɔ.

Bileho Bisuka

¹³ Mbi nasɔnei no ngando jiji, no baya bajimaka kombe eMwana ’Njambe, bo ojebeni bo odini na bomɔ bua bodi na bosusu.

¹⁴ Na ejimeli esu ai yo edi bo boka’nga mokina mojɔ mua mobwani na bolulea bonde, yo adi boka so.

¹⁵ Na isa bojebaka bo yo ahokeaka mijɔ misusu mingaka so, bojebaka bo bosi mijɔ mingaki so ai yo.

¹⁶ Moto akajeba bo mwangwa’nde akɔkɔ mokina mojɔ mobe mua mobwamti na bogwa, adi bonga Njambe, na yo adi bomopa bomɔ a mojɔ mobato baya bakɔi bobe bua bobwaniti na bogwa. Bokina bobe bodi oko bobe bobogwa; nitabalaka bo moto adi bonga a mojɔ mobobe bomina.

¹⁷ Mijɔ misusu mia miditi mipele midi Mibe; mokina ko moditi bobe bobogwa.

¹⁸ Bojebaka bo moto na moto yona obotama na Njambe t’akɔke bobe. Moto yona obotama na Njambe asabaneaka, na yona Mobe atabakea nongo ebɔ ai yo.

¹⁹ Iso bojebaka bo bodi bana baNjambe, na bo ngondo esusu edi a mɔmɔ mayona Mobe.

²⁰ Bojebaka bo Mwana ’Njambe adoi, na abopi boemgea a bojeba yona oSoti. Na bodi a tei ende yona odi Soti, oko a tei eMwana’nde Yesu Masiya. Iyo adi Njambe oSoti, na bomɔ bua bodi na bosusu.

²¹ Bana bambi, inganjamani a mojɔ mobanjambe babokosea.