1 Yoane 3 - Nouveau Testament en Ngombe 1961

Bana baNjambe

¹ Anjani ngɛnjɔ enɛnɛ epa Njambe so, bo so bodae na kombe jibana baNjambe. Na bodi bana baNjambe. A mojɔ momina, ngondo Pejebake so, mojɔ bo eimojeba yo.

² Baninga, so bodi bana baNjambe oko e dɛye. Bojebakini elimo esu engɔngɔ; endele ko, bojebaka bo yo akadoa a bohu, so bodabí na elimo ende, mojɔ bo bodi bomonɛ o adi yo.

³ Moto na moto yona odi na njingo emina ai yo, asasɛnojaka o adi yo mosɛnɔke.

⁴ Moto na moto yona okɔkɔ bobe asopaka Mibeko. Bobe bosusu bodi oko bosopa boMibeko.

⁵ Ojebakani bo yo adoa a bodongeja jibe. Bobe boditi nongo a tei ende.

⁶ Moto yona oyeyoaka a tei ende t’akɔke bobe. Yona okɔkɔ bobe amonɛkini na amojebakini.

⁷ Bana bambi, T’ojimeni oko bo moto alabojae no. Yona odi na ekɔmɛli ebodongo adi moto obodongo, o adi yo na bodongo.

⁸ Moto yona okɔkɔ bobe adi moto oSatana, mojɔ bo Satana akɔ bobe a bobanga mɛnɛ, na akɔkɔ bobe oko e dɛye. Cina ebodoa boMwana ’Njambe edi oko bo abejae bilomu biSatana.

⁹ Moto yona obotama na Njambe t’akɔke bobe, mojɔ bo bana baNjambe bayeyoaka a tei ende, na babwaniti bokɔ bobe, mojɔ bo babotama na Njambe.

¹⁰ Bodi bombetea bana baNjambe na bana baSatana oko na mojɔ momina. Moto amiti da na ekɔmɛli ebodongo aditi moto oNjambe, na moto yona odi na mwangwa’nde soki koko boa.

¹¹ Iso bodi bopalana; bwɛnji bosɔ no a bobanga mɛnɛ oko bu.

¹² Bobwaniti boda na ekɔmɛli eKaina, yona odaka moto oSatana na awa mwangwa’nde. Na awa mwangwa’nde mojɔ moye? Mojɔ ke bo bikɔmɛli binde mɛnɛ bidaka bibe, na bia bimwangwa’nde bidaka bipele.

¹³ Baninga, yɛ bokamoani bo ngondo edi na nu soki.

¹⁴ Iso bojebaka bo bomani a bogwa, na bokwei a bomɔ, cina bo bopalaka baninga. Moto amiti pala, adi oko a tei ebogwa.

¹⁵ Moto yona odi na mwangwa’nde soki adi mowoi; na ojebakani bo mowoi apeliti nongo bomɔ bua bodi na bosusu a tei ende.

¹⁶ Bojebaka ngɛnjɔ oko na mojɔ mu, bo yo apa mohelo monde a mojɔ mosu; na so hobwani bopa mihelo misu a mojɔ mobaninga.

¹⁷ Moto akanɛ bo mwangwa’nde adi na taka, yana adi yo mɛnɛ na likonja lingondo, na akadipa molema monde ai yo, ngɛnjɔ eNjambe editi a tei ende.

¹⁸ Bana bambi, ngɛnjɔ esu ebwaniti boda a bikenge bimonɔkɔ pɛ, oko na ekɔmɛli na soti.

¹⁹ Oko boa bodi bojeba bo bodi bana basoti, na bodi bohahaneja milema misu a boso bonde, isamilema misu midumbaka so;

²⁰ mojɔ bo, na Njambe na milema misu, Njambe adi boso; na yo ajebaka ngando jisusu.

²¹ Baninga, isa milema misu mitadumbaka so, boditi nongo na mokakwano a boso boNjambe,

²² na bosɔkɔ ai yo mua mongaka so, cina bo bosumaka Mibeko minde, na bokɔkɔ ngando jia jimosepejaka.

²³ Mobeko monde modi oko bo bojimee kombe eMwana’nde Yesu Masiya, na bo bopalaneni o apa yo so mobeko.

²⁴ Moto yona osumaka Mibeko minde ayeyoaka a tei ende, na yo ayeyoaka a tei emoto omina. Na bojebaka bo ayeyoaka a tei esu oko na Mwembo mopa yo so.