1 Timoteo 6 - Nouveau Testament en Ngombe 1961

¹ Bato basusu baya badi a libuli babwani boda na lisuma ai baswa’bu, bo kombe eNjambe etasamboa, na bokoja bosu pongono.

² Isa baswa’bu badi na ejimeli, babwaniti bobanyamola na mokalo bo badi baninga. Badi bonɔ na bingi a bobakɔmɛ, mojɔ bo bakɔmɛkɛ bato baejimeli baya babwani bosɔ epaeli. Ikoja na leha ngando jimina.

Bileho Bisuka

³ Isa moto akojaka mijɔ Mibokosea, pɛ bojima bikenge bibɔngɔke biKumu osu Yesu Masiya, na bokoja bua bocingi na ekɔmɛli emoto oNjambe,

⁴ moto omina adi oko na egbo; t’ajebake nongo mojɔ. Adi oko na posa emisoo na kitɛ; na ekɔmɛli emina engɔjɔkɔ likaka, na miano, na biloli, na nduki emijɔ,

⁵ na bibalabala a tei ebato baya badi balaboake a milema Mibu; bapeliti nongo mojɔ mosoti, na badingaka bo ejimeli al Njambe edi njea a bokonja likonja.

⁶ Ejimeli ai Njambe ko yena editi na bomboa boleka, ebwani na bokonja bolikonja lmɛnɛ.

⁷ Mojɔ bo bodoaka a ngondo ye boa ngasa, na bokayana, botahɔnɔ botomba eka ernɔci.

⁸ Isa bodi na mia na bisenja, leka lomina lobwani na su.

⁹ Ibaya badi na posa elikonja bakwaka a ndingea, na bataka elambo, na balaboaka na posa jibe jingasa jia jidindejaka bato a bogwa na bodimoa.

¹⁰ Mojɔ bo posa elikonja edi cina ejibe jisusu. Bakina bato balaboi a njea eejimeli oko a mojɔ moposa emina, na basandeaka na ndɛ jiminɔngɔ minɛnɛ.

¹¹ Wɛ ko, moto oNjambe, toma bulɛ ngando jimina. Dala a njea ebodongo, na yongi epele, na epaeli, na lingbangba, na bombɔki.

¹² Ina bila epele eejimeli. Pea bomɔ boku, bomɔ bua botasia. Obeama a mojɔ momina, na otata tati epele a boso bobatati banɛnɛ.

¹³ Nalehaka wɛ a boso boNjambe yona opaka bato basusu bomɔ, na a boso boMasiya Yesu yona otata tati epele a boso boPontio Pilato,

¹⁴ bo osume mobeko, bo moda mowɛ motada na litɔnɔ, pɛpɛ nongo mojɔ, oko a bodoa boKumu osu Yesu Masiya.

¹⁵ Iyona obojongoa, yona odi na ngulu esusu, Koi o baroi, na Kumu obakumu, adi boneja mojɔ momina oko ehole ekabwana.

¹⁶ Iyo pɛ aditi nongo na bogwa; adi a bohu bua bonɔi, bo moto atahɔnɔ bobatama; moto amonɛkini na atahɔnɔ bomonɛ. Ekumu ai yo, na bokumu, oko na bosusu. Amen.

¹⁷ Leha bato baya badi na likonja a ngondo ye bo batasakumeja, na bo batada na ejimeli a makonja maya madi na mokakwano, oko ai Njambe yona opaka so leka na likabo linɛnɛ a bosepeja so.

¹⁸ Baleha bo bakɔe bopele, bo bahɛe na bikɔmɛli bipele, na bo badae na monganji na likabo.

¹⁹ Oko boa badi bobomba likonja liyumua mojɔ moehole ebodoa, a edejai esoti, bo badae na bomɔ bua bodi bomɔ bosoti.

²⁰ Ee Timoteo, banea elomu esɔ wɛ a bobanea. Bulɛ ko bibaeli bibokosea, na bibalabala biejebeli yena editi ejebeli esoti,

²¹ mojɔ bo bakina bato basɔ mijɔ mimina, na balaboa a njea eejimeli. Yɛ monganji moNjambe modae na wɛ.