1 Timoteo 5 - Nouveau Testament en Ngombe 1961

Bileho a Mojɔ Mobali-Babogwa na Basuku

¹ T’olemoe oko na mosuku na bopipo; moleha ko o sangwao. Leha bami batongo o baninga.

² Kina basuku bali badae o bangwao, na bali batongo o ngɛnɛ, oko na lisuma linɛnɛ.

³ Da na lisuma ai bali-babogwa basoti.

⁴ Isa mwali-obogwa adi na bana, isa pape, ibaba badi bopeta cingea bo babwani boda na likabo ai bato babu bɛnɛ, na monganji ai baboti babu. Njambe yo mɛnɛ ajimaka mojɔ momina.

⁵ Mwali-obogwa ko osoti yona opeliti bato, adi na njingo ai Njambe, na angaka Njambe na bulu na mei, na bingeeli na mangɔɔnɔ.

⁶ Mwali-obogwa ko yona odi na posa engando jingondo, nongo adi yo mɔ, adi oko mogwake.

⁷ Toma baleha na bopipo a mojɔ mongando ji, bo batakwa na mijɔ.

⁸ Isa moto atabaneaka bato bande mɛnɛ, na bato badenga dinde mɛnɛ, moto omina angani ejimeli, na anɔi mopakano na bobe.

⁹ Mwali-obogwa amiti nɔ bianga domi-isamano, mwali omomi omɔci pɛ, kombe ende ebwaniti bosɔnɔmɔ a mokanda mobali-babogwa.

¹⁰ Adi boda na esako epele a mojɔ mobikɔmɛli binde bipele, mwali yona obɔkɔ bana, yona odaka na monganji ai bakɛndɛli, yona ososa bibota bibato baDenga, yona okɔmeja bato baya badaka na monɔngɔ, na odaka na bingi a ngando jisusu jipele.

¹¹ Pɛ bojima bali-babogwa baya badi oko baseka pɛ, mojɔ bo posa jibu jikagbasoa, badi bolona Masiya, na bâpala bo balongane koko.

¹² Oko boa bakwaka na mojɔ, cina bo bakinaka ejimeli ebu eboso.

¹³ Mojɔ motongo—adi bo pɛ elomu, balandoaka na ekɔmɛli ebongɛ a ndako ndako. Na baditi oko edada pɛ; badi na bibalabala, na ekpai, na babalaka mijɔ mia Mibɔngiti na bu.

¹⁴ A mojɔ momina, mbi napalaka bo bali-babogwa baya baditi basuku balongane koko, babote bana na babanee ndako jibu. Oko boa, baya badi na su soki batadiha njea a bololea so.

¹⁵ Mojɔ bo bakina balaboa soti a bosusa Satana.

¹⁶ Isa moto oejimeli, kako momi, kako mwali, adi na bali-babogwa baya bacingi na nde, abwani bobakɔmeja. Oko boa Denga ditada na muna mobu, na lidi bokɔmeja bali-babogwa baya badi na taka.

¹⁷ Bato babwani boda na lisuma linɛnɛ ai basuku baDenga baya bakɔkɔ elomu epele, gbo oko ai baya badi na elomu ebotɔndɔ Mwako Mopele, na ebokoja.

¹⁸ Mojɔ bo mokanda moNjambe mobalaka bo, T’okande oko ebombo engɔmbɔ yona ondaka ndongo. Na Mokɔmɛli abwani bosɔ likonja linde.

¹⁹ Bakalanga kombe emosuku oDenga na mokina mojɔ, obwaniti boka mojɔ momina isa batati babae kako basato baditi.

²⁰ Isa bakina bakɔkɔ bobe, toma lemoa na bu a boso bobato basusu, bo batongo babange.

²¹ Mbi nalehaka wɛ a hoso boNjambe, na Masiya Yesu, na babwɛnji baDiko baya bahɔmɔ, bo okɔe ngando jimina na bojo mɛnɛ; da na ekɔmɛli emɔci ai bato basusu amɛci.

²² A mojɔ mobobakea mɔmɔ ai moto, pɛ bokɔ mojɔ momina na pɛlɛpɛlɛ. Pɛ bopanda na moto a bobe bonde. Anganjama bo otada nongo na mojɔ.

²³ T’omwake oko madiba pɛ; odi bomwaka ekenge ekɛkɛlɛkɛ evino a mojɔ mosɔpɔ na bipeko bipekaka na wɛ mandɛli-mandɛli.

²⁴ Jibe jibakina bato jidi a bohu, oko basa-mbakini; jia jibakwa batongo ko jiboloaka oko ngɔngɔ.

²⁵ Bikɔmɛli bipele bidi koko a bohu boa, na bia biditi a bohu biboloa ngɔngɔ.