1 Timoteo 3 - Nouveau Testament en Ngombe 1961

Elomu Ebanjeli na Basuku Badenga

¹ Isa moto apalaka asɛ elomu emonjeli oDenga, apalaka elomu epele; mojɔ momina modi soti.

² Monjeli oDenga ko adi boda na esako epele mɛnɛ, momi omwali omɔci pɛ, moto obowi na molema motitake, moto oyongi epele yona odi na monganji ai bato, na bowɛi a bokoja;

³ te nongo moto obolangoa, isa moto okɛlɛ, oko moto obowi; te nongo moto omiano, isa moto yona odi na posa eli-konja.

⁴ Abwani boda na kpaci a ndako ende mɛnɛ, na bobanea bana bande mɛnɛ, bo badae na lisuma, na ekɔmɛli epele.

⁵ Mojɔ bo, moto amiti hɔnɔ elomu endako ende mɛnɛ, adi bobanea Denga diNjambe na ye?

⁶ Monjeli abwaniti boda mocingami moyene, asaka sɛ bodumba boSatana a mojɔ moegbo ende.

⁷ Abwani boda na gala epele a boso bobato basokolu, bo atasamboa, na bo ata’ta elambo eSatana.

⁸ Basuku baDenga pongono badi boda bato bayongi epele, m nongo bato baminɔkɔ Mibae, isa bato babolangoa, isa bato baya badi na posa elikonja.

⁹ Badi bobanea mijɔ miejimeli a milema misɛnɔke.

¹⁰ Bopele bo bapete meka; na bakapasama na soti, pɛpɛ nongo mojɔ, babwani bokɔ elomu ebasuku baDenga.

¹¹ Bali babu pongono badi boda na yongi epele, te nongo bato babiloli, oko bato babowi na lisuma a ngando jisusu.

¹² Mosuku oDenga abwani boda na mwali omɔci pɛ; badi boda na kpaci ai bana babu, na a ndako jibu bɛnɛ.

¹³ Ibaya bakɔkɔ elomu epele emosuku oDenga badi na esako epele, na bahɛkɛ na eci a ejimeli ai Yesu Masiya.

¹⁴ Nadi na njingo bo nadoe oho ai wɛ ngɔngɔ mweka; endele ko nasɔnei wɛ mijɔ mimi

¹⁵ bo nakayeyoa a bodoa, odi bojeba moda mua mobwani na bato bandako eNjambe, yena edi Denga diNjambe obomɔ, likwe na eyoeli-ecina esoti.

¹⁶ Cina eejimeli esu ai Njambe enɔi bocingea bomoto. Mojɔ momina modi soti mɛnɛ. Iyo asaboloja a mokuku momoto; Mwembo mongameja mojɔ monde; Babwɛnji baDiko bamonɛ; Makota mangondo maka mwako monde; Bato bangondo bamojimea; Asɔmɔ a ekumu eDiko.