1 Timoteo 2 - Nouveau Testament en Ngombe 1961

Mojɔ Mobo’nga

¹ Eleho embi eboso edi a mojɔ mobo’nga, bo bingeeli na mangɔɔnɔ na masakoa madae a mojɔ mobato basusu;

² a mojɔ moba-kumu, na bato baya badi na kpaci, bo bodae bogo na bo mohelo mosu modae na bowi, oko na yongi na lisuma ai Njambe.

³ Mojɔ mu modi mopele, na mosepejaka Njambe Moheleja osu.

⁴ Iyo apalaka bo bato basusu bahele, na bo badae na ejebeli eSoti.

⁵ Mojɔ bo Njambe adi omɔci, na mosili adi omɔci a sibano eNjambe na bato, oko moto Masiya Yesu

⁶ yona osapa yo mɛnɛ, lisiko libato basusu. Iyo angameja mojɔ momina a ehole yena ebwana.

⁷ A mojɔ momina, mbi nahɔmɔ bo nadae motɔndɔi na obwɛnji (naba-laka na soti mɛnɛ, te nongo na bokosea) na a bokoja bapakano ejimeli na Soti.

⁸ Napalaka bo bami ba’nge a bisika bisusu, na bangɔjɔe mɔmɔ masɛnɔke, pɛpɛ kɛlɛ, pɛpɛ kitɛ.

⁹ Napalaka koko bo bali baiwae bisenja bia bibɔngi, te nongo na jala, na posa bo basanejae. Babwaniti bobaka swe jimosɛsɛ, isa na manaka na leka loyumu, isa mokina molilo moyumu.

¹⁰ Elwali yena ebwani na bali baejimeli edi oko bikɔmɛli bipele.

¹¹ Mwali adi bohokea bokoja na bowi, na lisuma linɛnɛ.

¹² Mbi nitajimaka bo mwali akojae bami isa bo adae na kpaci ai bo; adi boda oko bogo.

¹³ Mojɔ bo Adama ayoama boso, Ewa ko ngɔngɔ.

¹⁴ Na Adama ailɛngɛmɛ; yona olɛngɛmɛ na yona okwa, oko mwali.

¹⁵ Endele ko, mwali adi bohela na bohota, akayeyoa na ejimeli, na epaeli, na bosɛnɔ, na yongi.