1 Timoteo 1 - Nouveau Testament en Ngombe 1961

¹ Mbi Paulo, obwɛnji oMasiya Yesu cina emobeko moNjambe Moheleja osu, na moMasiya Yesu njingo esu, ai Timoteo mwana’mbi osoti a tei eejimeli.

² Yɛ monganji, na wa, na bowi boNjambe Sango na Masiya Yesu Kumu osu bodae na wɛ.

Mijɔ Mibokosea na Mwako Mopele Mosoti

³ Nalɛjɛkɛ wɛ eleho epa mhi wɛ yana akɛ mbi a Makedonia, bo oyeyoe a Ɛpɛsɔ a boleha bakwa bato bo batakoja bokina bokoja botongo,

⁴ na bo batajima masɔ, na kombe jimbotambota pɛ suka, jia jingɔjɔkɔ kitɛ pɛ; jitakɔmejaka elomu eNjambe a mojɔ moejimeli.

⁵ Cina eeleho esu edi oko epaeli yena emanaka a molema mosɛnɔke, na bolɛ bopele, na ejimeli esoti.

⁶ Bakina bato ko balaboa a ngando jimina, na bahekoa a bobala mijɔ mia mipeliti nongo cina.

⁷ Bapa-laka bo badae bakoja baMibeko, na batacineaka ema ebikenge bibalaka bo, na mijɔ mitɔndɔkɔ bo na bopipo.

⁸ Iso bojebaka bo Mibeko midi mipele, isa moto akɔkɔ ngando jia jibwani na Mibeko.

⁹ Bojebaka bo Mibeko miditi a mojɔ mobato baya badi bojo, oko a mojɔ mobato baya bapeliti lisuma, bato balipanga, bato baya bapeliti ejimeli ai Njambe, bato babe, bato babosambolu, na babosɛtɔ, bawoi babasango, na bawoi babanango, na bawoi babato,

¹⁰ bato babɔɔli, bami baya basabejaka na bami, bato baya ba’baka bato oko bo’ba, bakosei, batati babokosea, na ngando jisusu jitongo jia jita-bwanaka na bokoja bosoti

¹¹ boMwako Mopele moekumu eNjambe obojongoa, mua mosɔ mbi a bobanea.

¹² Mbi nasakoaka Masiya Yesu Kumu osu yona opani ngulu, mojɔ bo yo ajima bo nadi na lisuma, na ahɔ mbi a mojɔ moelomu ende;

¹³ oko mbi yona odaka boso moto opɔmbɔli, mbi yona omodingoja na omotangola. Iyo ko akeani wa, mojɔ bo nama kɔ boa cina elibumi na kitɛ.

¹⁴ Na monganji moKumu osu mopetoa bou mɛnɛ ai mbi, na ejimeli na epaeli jia jidi a tei eMasiya Yesu.

¹⁵ Ekenge ye edi soti, na ebwani bo boesɛ na ejimeli esusu, bo Masiya adoa a ngondo a boheleja bato babe. Mbi nadi kumu obato babe;

¹⁶ endele ko, nasɔ wa eNjambe, bo Yesu Masiya apete neja lingbangba linde a tei embi, na bo nadae ekoaneli ai baya badi bomojimea ngɔngɔ, a bosɔ bomɔ bua bodi na bosusu.

¹⁷ Ee, ekumu na lisuma ai Kumu yona odi na bosusu, yona oditi na bogwa, yona otaboloaka na miso, yona odi Njambe omɔci pɛ. Amen.

¹⁸ Mbi nalehaka wɛ Timoteo mwana’mbi na eleho ye; ebwani na bileho bipa batɔndɔi a mojɔ mowɛ boso, bo, lna bila epele.

¹⁹ Pea ejimeli boku na molema mopele pongono. Bakina bato balona mojɔ momina, na bapengoi a njea eejimeli.

²⁰ Umenalo na Alesandele badi a libondo limina. Mbi ko nabahɛngɛi ai Satana bo bacinee na bakine botangola Njambe.