1 Pɛtɛlo 5 - Nouveau Testament en Ngombe 1961

¹ Mbi nalehaka basuku banu, mojɔ bo nadi mosuku mbi mɛnɛ, na monjɛnɛki omadingoa maMasiya, na sangoli olibondo liekumu yena eboloabí ngɔngɔ.

² Baneani bwela boNjambe bua bodi a tei enu. Dani babanei babu te nongo mojɔ bo edi elomu enu, oko a mojɔ moepaeli, te nongo a mojɔ monjingo elikonja, oko a mojɔ mobingi enu bɛnɛ.

³ Adi no na libondo libato a bobanea, pɛ bosakumejani a boso bobu. Anejani ekoaneli epele ai bwela bosusui

⁴ Na Mobanei Monɛnɛ akadoa, ôsɔni corona eekumu yena etagwa.

⁵ Ino menga pongono, dani na lisuma ai basuku. Kinani elwali enu basusu edae oko molema motitake, moto ai mina’nde moto. Mojɔ bo Njambe alonaka bato baegbo, na akɔkɔ monganji ai baya basatitejaka.

⁶ A mojɔ momina, satitejani cina eebɔ epipo eNjambe, bo angɔjɔe no a ehole ebwanake.

⁷ Kinani Njambe akamoe muna momikakwano minu misusu, mojɔ bo bolɛ bonde bodi oko ai no.

⁸ Sangbindeani; sɛnjɛlɛni. Satana, soki enu, adukaka bato bo aba yake, na ababɛmbɛkɛ na wio o ekɔmɛli egbɔngɔ yona ogbemaka.

⁹ Dani bambilimake a ejimeli enu, na inani na nde. Ojebakani bo baninga banu a ngondo esusu badingoaka boa.

¹⁰ Omaka dingoani ekina ehole, Njambe yona odi na monganji mosusu, yona obea no a tei eMasiya a ekumu ende yena etasia, adi bobɔngeja no yo mɛnɛ, adi bopingeja na bombilimeja no.

¹¹ Bokumu ai yo oko na bosusu. Amen.

¹² Mbi nanjaka Silwano o mwangwa’mbi oejimeli; nasɔnei no mokanda mu mokue oko na ebɔ ende, a boleha no, na a bolɛjɛ no a mojɔ momonganji mosoti moNjambe. Dani bambilimake a monganji momina.

¹³ Denga diBabilo, lia lidi koko lihɔmɔke, libɛjɛkɛ no njɛbɛ, na mwana’mbi Malako koko.

¹⁴ Abɛjɛnɛni na njɛbɛ eepaeli. Yɛ bowi bodae na nu basusu baya badi a tei eMasiya.