1 Pɛtɛlo 4 - Nouveau Testament en Ngombe 1961

¹ Masiya adingoa a mokuku; oko boa sapingejani koko na bolɛ bomina. Mojɔ bo moto yona odingoi a mokuku akini bokɔ bobe,

² bo atasuma koko posa jimokuku a masu maya madikai, oko bolulea boNjambe.

³ Ehole yena edaka no na bikɔmɛli bibapakano esii edɛye; mojɔ bo odakani na lisɔngi, posa jibe, bolangoa, makita mamana, matanga, na bosakoa bobilimo.

⁴ Ibo bakamoaka bo otacingamakani koko na bu a ngando ji jibe, na baloleaka no.

⁵ Bato bamina ko badi bosɔnibeja ai yona odi bosambeja baya badi mɔ na bagwake pongono.

⁶ Mojɔ bo bagwake pongono baka Mwako Mopele oko a mojɔ momina, bo bahele a njea emwembo o adi Njambe, nongo asambama bo o bato a njea emokuku.

⁷ Suka engando jisusu edi hulelu; a mojɔ momina, sangbindeani, na dani na mongangele a mojɔ mobo’nga.

⁸ Mojɔ monɛnɛ modi bo opalaneni na ngɛnjɔ enɛnɛ, mojɔ bo ngɛnjɔ ekundaka jibe kanga jinɛnɛ mɛnɛ.

⁹ Dani na monganji, moto ai mina’nde moto; pɛ bodani na lima.

¹⁰ Sakɔmejani na epeeli esi moto na moto, o bakɔmɛli baya basi monganji moNjambe tungu na tungu.

¹¹ Isa moto atɔndɔkɔ mwako, abwani botɔndɔ oko mijɔ miNjambe. Moto akakɔ ekina elomu, abwani boekɔ na ngulu epaka Njambe, bo Njambe asɛ ekumu na ngando jisusu, cina eYesu Masiya. Ekumu na bokumu ai yo oko na bosusu! Amen.

¹² Baninga, t’okamoeni oko a mojɔ mobodingoa bua bodoi ai no o mosa a bomeka no; moditi mojɔ mobokamoa.

¹³ Sepani ko a mojɔ momina, mojɔ bo osɔkɔni libondo limadingoa maMasiya, bo odaeni koko na sepi na enanga a boboloa boekumu ende.

¹⁴ Bakapɔmbeja no a mojɔ mokombe eMasiya, odini na bojongoa, mojɔ bo Mwembo moekumu, Mwembo moNjambe modi ai no.

¹⁵ Pɛpɛ nongo moto onu ko obwani bosɔ mokindo momowoi, isa mobi, isa moto obikɔmɛli bibe, isa moto onduki emijɔ.

¹⁶ Moto ko akadingoa mojɔ bo adi moto oMasiya, abwaniti boda na sɔni; abwani bokumeja Njambe a mojɔ mokombe emina.

¹⁷ Mojɔ bo ehole ebosambeja Denga diNjambe emei; na esambi ekabanga na su, suka ebato baya batasumaka Mwako Mopele moNjambe êda bo?

¹⁸ Isa moto obodongo adi bohela oko na pasa, mojɔ momoto mobe, na moto yona odi pɛ bojima Njambe, môda bo?

¹⁹ Oko boa, isa bolulea boNjambe bodi bo bato badingoe, badi bokɔ bopele, na badi bopeja miembo mibu a mɔmɔ maMoyoi yona obwani bojimama.