1 Pɛtɛlo 3 - Nouveau Testament en Ngombe 1961

¹ Ino bali pongono, toma sumani bami banu; oko boa isa bakina babu batajimaka Ebaeli, badi bohekoa cina emoda mobali babu, nongo adi bo pɛ boka Ebaeli,

² yana anɛkɛ bo moda monu mosɛnɔke molisuma.

³ Molilo monu mobwaniti boda molilo mosokolu, ebakeli eswe na bolwa boleka lowɔlɔ na bisenja.

⁴ Molilo monu mobwani boda a tei, mua mobombami a molema, oko mwembo mo yɛmbu mobowi; molilo momina motabeha, na modi na yumu enɛnɛ a miso maNjambe.

⁵ Bali basɛnɔke baehele baya bajima Njambe basalila boa, na basuma bami babu.

⁶ Sala asuma Abala-yama boa, na amobea kumu onde. Ino odini bana bande, okakɔni bopɛlɛ, pɛpɛ nongo mokakwano, pɛpa nongo bɔ.

⁷ Ino bami pongono, toma dani na bolɛ ai Bali banu. Dani na lisuma ai bo, mojɔ bo badi ba yɛmbu. Ino na bo pongono odini basangoli bamonganji mobomɔ. Kɔni boa bo mokina mojɔ mosaka bindaneja bingeeli binu.

Ekɔmɛli eBato baMasiya

⁸ Mojɔ motongo; dani no basusu na molema momɔci, na peye na epaeli ai baninga, na wa, na bombɔki.

⁹ Bakakɔ no bobe, t’osɔnibejaeni oko bobe; bakalolea no, Tosɔnibejaeni oko na biloli. Sɔmbejani oko na bojongoa. Obeamani bo okɔeni boa, bo osangoeni bojongoa.

¹⁰ Mojɔ bo, Isa moto apalaka mohelo, Isa apalaka bonɛ masu mapele, Yɛ akine bobala bobe na yemi ende, Na bokosea na biposo bimonɔkɔ monde.

¹¹ Yɛ abulɛe bobe oko bobulɛ, bo akɔe bopele; Yɛ aduke na akimane bowi.

¹² Mojɔ bo miso maNjambe manjaka bato babodongo, Na matoi mande mahokeaka bo’nga bobu. Boso boKumu ko bolonaka baya bakɔkɔ bobe.

¹³ Isa odini na bingi a mojɔ mobopele, odi bonɔngeja no nda?

¹⁴ Nongo okadingoani a mojɔ mobodongo, sepani a mojɔ momina. T’odaeni oko na bɔ a mojɔ mobu, pɛpɛ nongo mokakwano.

¹⁵ Bakeani Masiya o Kumu a tei emilema minu. Isa moto adi bokokeleja no a mojɔ monjingo yena edi a tei enu, dani na mosɛlingo bihole bisusu a bosalongeja; mosɔnibejani na ebaeli e yɛmbu elisuma.

¹⁶ Yɛni boda na lindo a milema minu; oko boa, nongo bakatɔkɔlɔ no, baya bakɔkɔ boa badi bosamboa, cina eekɔmɛli enu epele a tei eMasiya.

¹⁷ Na bodingoa a mojɔ mobopele, na bodingoa a mojɔ mobobe, boditigoa a mojɔ mobopele bonɔi na bopele, isa bolulea boNjambe bodi boa.

Ekoaneli eYesu Masiya

¹⁸ Mojɔ bo Masiya yo mɛnɛ agwa ehole emɔci a mojɔ mojibe, yona obodongo a mojɔ mobato babe, bo abatee so na Njambe. Agwa a mokuku, ahela ko a mwembo.

¹⁹ Na akɛ a mwembo bo alehe miembo a blɔkɔ,

²⁰ oko miembo mia midaka na lipanga ehelehele, yana adaka Njambe na lingbangba a ehole eyoaka Noa masua; na bato bomwambe a tei emasua bahela a madiba, oko bato baleka pɛ.

²¹ Madiba mamina madi embete ebatisimo; batisimo emina editi a bodongeja mbindo a mokuku; edi oko mojimo momolema mopele ai Njambe, na ehelejaka no e dɛye cina ebongɔ boYesu Masiya a bogwa.

²² Iyo akɛ oho Diko, na adi a ebɔ ebami eNjambe; na babwɛnji baDiko na bakumu na bato bakpaci bamosumaka.