1 Pɛtɛlo 1 - Nouveau Testament en Ngombe 1961

¹ Mbi Pɛtɛlo, obwɛnji oYesu Masiya, ai bato bangabi baya banangana a Ponto, Galatia, Kapodokia, Asia, na Bitunia,

² ai bato bahɔ Njambe na mbuno ende mɛnɛ, bato bahɛngɛ yo na Mwembo bo badae na lisuma ai Yesu Masiya, na bo bamɛsɛme na makia mande. Yɛ monganji moNjambe na bowi bohɛe ai no bou mɛnɛ.

Eleho a Mojɔ Molingbangba

³ Ekumu ai Njambe Sange ’Kumu osu Yesu Masiya. Edi oko a mojɔ momonganji monde monɛnɛ bo so bobotama koko a boda na njingo ebomɔ, ema ebongɔ boYesu Masiya a bogwa,

⁴ na bo bosangoe lisango lia litabeha nongo, lisango lisɛnɔke lia litagwa, lia lihɛngɛmɛ ai no oho Diko.

⁵ Njambe abaneaka no na ngulu ende cina eejimeli, a mojɔ momohelo mosɛlingoa yo, mua modi boboloa a bohu a ehole esuka.

⁶ Sepani a mojɔ momina, nongo adingoaka no ehole ekue na minɔngɔ tungu na tungu.

⁷ Oko boa, bomeka boejimeli enu bôda na bosakoa, na ekumu, na lisuma, a bodoa boYesu Masiya. Mojɔ bo, isa bamekaka wɔlɔ na mosa, wɔlɔ eka ebobeha, esingaiti ejimeli enu yena enɔi wɔlɔ na yumu.

⁸ Ino omonɛkinini, omopalakani ko. Nongo adi no pɛ bomonɛ e dɛye, omojimakani, na osepakani a mojɔ monde na sepi pɛ njɛngi yena enɔi kɔpi emoto.

⁹ Suka eejimeli enu edi bo osɛni mohelo momiembo minu.

¹⁰ Batɔndɔi baya bapa biseko a mojɔ momonganji mua mohɛngɛmɛ ai no, baduka na batunda a mojɔ mobohela bomina.

¹¹ Yana apaka bo biseko a mojɔ momadingoa maMasiya, na ekumu yena edaka ecini ngɔngɔ, badaka na posa ebojeba moto omina na ehole elɛjɛkɛ Mwembo moMasiya a tei ebu.

¹² Mojɔ moboloa ko ai bo, bo ngando jisɔkɔ bo jidaka a mojɔ monu, te nongo a mojɔ mobu bɛnɛ. Na bato baya batɔndɔki no Mwako Mopele na ngulu eMwembo Mosɛnɔke mua mohula Diko, babolojai ngando jimina ai no. Babwɛnji-baDiko badi koko na posa bo bacingee ngando jimina.

Eleho a Mojɔ Mobosɛnɔ

¹³ A mojɔ momina, toma ngbimejani bocingea bonu; sangbi-ndeani; kinani njingo enu esusu edae a monganji moNjambe mua modoabi ai no yana aboloabi Masiya.

¹⁴ Dani bana balisuma; pɛ bogbokani na posa jibe, jia jidaka na nu a ehole elibumi linu.

¹⁵ Iyona obea no adi mosɛnɔke; oko boa toma dani basɛnɔke pongono a mida minu misusu.

¹⁶ Mosɔnɔmɔ bo, Ino ôdani basɛnɔke, mojɔ bo mbi nadi mosɛnɔke.

¹⁷ Iyo asambejaka moto na moto bongbebongbe cina ebikɔmɛli binde, na okamo’ngani o Sango, kinani mida minu misusu midae oko na bɔ a ehole emɔngɔ monu ya nase.

¹⁸ Ojebakani bo osikoamani a ngando jingasangasa jibasangwa’nu, te nongo na makonja mabo-beha o adi wɔlɔ na palata;

¹⁹ osikoamani oko na makia mayumu maMasiya, o makia mamwana-bata yona opeliti nongo litɔnɔ, pɛpɛ nongo ehuli.

²⁰ Iyo ahɛngɛmɛ a mojɔ momina oko ngondo epe-takini yoama, na adoa a masu masuka a mojɔ monu.

²¹ Ejimeli enu ai Njambe edi a njea ende. Na Njambe amongɔjɔ a bogwa, na amokumeja, bo ejimeli enu, na njingo enu, jidae oko ai yo.

²² Lisuma linu a mijɔ miSoti lisɛnojai milema minu, bo odaeni na epaeli esoti ai baninga; oko boa toma palanani na ngulu emilema minu.

²³ Obotamani koko na bobotama bobomɔ, te nongo na bobotama bobogwa, oko na ebaeli eNjambe yena edi mɔ, yena eyeyoaka oko na bosusu.

²⁴ Mojɔ bo, Bato basusu badi o njienjie; Ekumu emoto edi o ihlɛlɛ jinjienjie; Njienjie jiwɔsɔsɔkɔ, na fulɛlɛ jikwaka nase;

²⁵ Ebaeli eNjambe ko eyeyoaka oko na bosusu. Ebaeli emina edi oko Mwako Mopele mua motɔndɔmɔ ai no.