1 Bakolinto 4 - Nouveau Testament en Ngombe 1961

¹ Iso bodi oko bakɔmɛli baMasiya, na babanei bangando jibo-mbamake jiNjambe; na moto akalɛ so, abwani bolɛ so oko boa.

² Mojɔ moboso mua mobwani na babanei, modi oko bo badae bato basoti mɛnɛ.

³ Mbi nakasamba na nu, isa na esambi ebato, pɛ mojɔ; na nitasambejaka mijɔ mimbi mɛnɛ.

⁴ Nongo nakalɛ bo naditi na mojɔ, nitalonga a mojɔ momina, cina bo Kumu yo mɛnɛ asambejaka mbi.

⁵ Oko boa, pɛ bosambejani oko ehole ebwanakini. Kumu akadoa, yo adi bomeja ngando jibombamake jimodidi a bohu, na adi boboloja ndungu jimilema mibato. A ehole emina, moto na moto adi bosɔ ndese ende ai Njambe.

⁶ Baninga, mbi nabali na nu ngando jimina o mondɛ, a mojɔ mosu na Apolo, bo okoeni na ekoaneli esu, na bo odaeni na lisuma a Misɔnɔ. Obwanitini bokumeja okina osu na bolona yona otongo.

⁷ Wɛ mɛnɛ oditi na bato batongo amɛci? Opeli ekina eka yena edi wɛ pɛ bosɔ? Oko boa, isa oesɔ oko bosɔ, osakumejaka mojɔ moye o moto yona oisɔ epeeli emina?

⁸ Ino ko ogolini. Okonjini makonja. Okweini a bokumu bonu no bɛnɛ, te nongo na sn. Posa embi edi oko bo odaeni bakumu soti, bo so bokumee na nu.

⁹ Mbi nalɛkɛ bo Njambe adejai so babwɛnji ngɔngɔ jibato basusu, o bato baya bahɛngɛmɛ a bogwa; mojɔ bo bodi o makou pɛ a mojɔ mongondo, na babwɛnji badiko, na bato pongono.

¹⁰ Iso bodi oko bigegele a mojɔ moMasiya. Ino ko odini na bowɛi a tei eMasiya! Iso bodi bayɛmbu; mo ko odini bapipo! Ino odini na ekumu; iso ko bosamboi.

¹¹ Iso bogwaka nja, na bodi na ekangola oko edɛye. Bodi mbundu, bodingoaka, bodi oko bakɛndɛli pɛ, pɛpɛ ngando.

¹² Bokɔkɔ elomu epipo na mɔmɔ masu bɛnɛ. Bato bakasinga so, iso bobajongoaka. Bakadingoja so, bodi oko bogo. Bakatangola so, iso bodi oko na ebaeli eepaeli.

¹³ Bodi oko bɔnɔ engondo; bodi edɛye oko leka lobodumba pɛ.

¹⁴ Nasɔneaka no ngando jiji, te a bokeja no sɔni, oko a boleha no o bana bambi baepaeli.

¹⁵ Nongo okadani na bakoja koto domi a tei eMasiya, sangwa’nu adi oko omɔci pɛ. Mojɔ bo mbi nabota no na Mwako Mopele a tei eMasiya.

¹⁶ Oko boa nangɔɔnɔkɔ no bo okoaneni na mbi.

¹⁷ A mojɔ momina, nalomei no Timoteo, mwana ’mbi oepaeli na lisuma a tei eKumu. Iyo adi bolɛjɛ no ekɔmɛli embi a tei eMasiya, yena ekojaka mbi a Menga masusu a bisika bisusu.

¹⁸ Bakina banu ko basakumejaka; balɛkɛ bo nitadoa ai no.

¹⁹ Kumu ko akajima, nitayeyoa a bodoa ai no; nasa ko najebe isa bato bamina baegbo badi na ngulu, isa badi oko na bibaeli pɛ.

²⁰ Mojɔ bo Bokumu boNjambe bodi mojɔ mongulu, te bibaeli.

²¹ Opalakani bo? Opalakani bo nadoe ai no na pimbo, isa na epaeli, na molema moyɛmbu?