1 Bakolinto 3 - Nouveau Testament en Ngombe 1961

¹ Baninga, yana atɔndɔ mbi mwako, naihɔnɔ bobala na nu o bato baMwembo. Mojɔ bo odakani bato bamunu; oipaka botamani a tei eMasiya.

² Mbi nanungeja no mabɛi pɛ. Naibɔkɔ no na dia mɛnɛ, mojɔ bo oibwanani boyaka dia, na obwanakinini nongo edɛye, mojɔ bo odini oko bato bamunu.

Misoo a Denga diKolinto

³ Odini na likaka na misoo a tei enu; oko boa oditini bato bamunu? ekɔmɛli enu, te ekɔmɛli ebato bangondo?

⁴ Okina onu abalaka bo, Mbi moto oPaulo; na otongo abalaka bo, Mbi moto oApolo; oko boa oditini bato bangondo?

⁵ Apolo adi nda? Paulo adi nda? Badi oko bakɔmɛli baNjambe a bojimeja no, mojɔ bo Kumu apaka moto na moto elomu ende.

⁶ Mbi na’na ngua; Apolo amɛsɛ madiba; edi Njambe ko yona otɔjɔ ngua.

⁷ Oko boa, yona onaka ngua na yona omɛsɛkɛ madiba, badi oko ngasa mɛnɛ; yona otɔjɔkɔ ngua—oko Njambe pɛ.

⁸ Yona onaka ngua na yona omɛsɛkɛ madiba badi amɛci; na moto na moto adi bosɔ ndese yena ebwani na elomu ende.

⁹ Iso bodi bakɔmɛli baNjambe, na bokɔkɔ elomu na nde. Ino odini gbie eNjambe; odini eyoeli endako eNjambe.

¹⁰ Njambe akɔni monganji bo nadae moyoeli obowɛi. Natanda matai macina, na moto otongo ayoaka diko. Moto na moto yona oyoaka abwani bonganjama na eyoeli ende.

¹¹ Eyoeli-ecina edi oko Yesu Masiya; pɛpɛ nongo moto odi boyoa eyoeli-ecina etongo.

¹² Moto akayoa a diko dieyoeli emina na likonja, isa wɔlɔ, isa palata, isa na matai mayumu, isa na mele, isa na njienjie, isa na sobe, elomu emoto na moto edi boboloa a bohu,

¹³ mojɔ bo Busa bomina bobo-lojabí elomu emina a bohu. Eboloabí oko na mosa. Mosa momina modi bomeka elomu emoto na moto.

¹⁴ Moto akayoa diko dieyoeli ecina, na elomu ende ekayeyoa, moto omina adi bosɔ ndese.

¹⁵ Elomu emoto ko eka’ngoa, yo adi bodika ngasa; endele ko, yo mɛnɛ adi bohela, o moto yona ohelaka a mosa.

¹⁶ Ino otajebakani bo odini tempelo eNjambe, na bo Mwembo moNjambe modi a tei enu?

¹⁷ Moto akabeja tempelo eNjambe, Njambe adi bomobeja yo pongono. Mojɔ bo tempelo eNjambe edi esɛnɔke, na mo odini tempelo emina.

¹⁸ Moto abwaniti bosakosea. Okina onu akalɛ bo adi na bowɛi bongondo ye, yɛ apete da oko egegele, bo adae moto obowɛi soti.

¹⁹ Mojɔ bo bowɛi bongondo ye bodi oko yebe a miso maNjambe. Mosɔnɔmɔ bo, Iyo ataejaka bato babowɛi a poloso ebu bɛnɛ.

²⁰ Na mosɔnɔmɔ koko bo. Kumu ajebaka bo bilɛli bibato babowɛi bidi oko bilɛli bingasa.

²¹ A mojɔ momina, moto abwaniti bosakumeja na bato; mojɔ bo ngando jisusu jidi ai no,

²² isa Paulo, isa Apolo, isa Kepa, isa ngondo, isa bomɔ, isa bogwa, isa ehole ye, isa ehole yena ekɛkɛ adoe; jisusu jidi oko ai no;

²³ na ’no bɛnɛ odini ai Masiya, na Masiya ai Njambe.