1 Bakolinto 15 - Nouveau Testament en Ngombe 1961

Bongɔ boBagwake

¹ Baninga, mbi napalaka bo nabale na nu a mojɔ moMwako Mopele motɔndɔ mbi no. Ojimani mwako momina, na odini bambihmake a mwako momina.

² Ohelani oko na mwako momina, okamobaneani bopele—omiti kɔni boa, ejimeli enu edi eka engasa.

³ Mojɔ bo mbi napa no mojɔ monɛnɛ mosɔ mbi, bo Masiya agwa a mojɔ mojibe jisu, o abalaka Misɔnɔ.

⁴ Bamopusea, na angɔ koko a busa bomasato, o abalaka Misɔnɔ.

⁵ Kepa amonɛ, na babwɛnji domi-na-babae pongono.

⁶ Ekina ehole etongo, baninga mikama mitano bamonɛ; bakina babu banɛnɛ badi oko busa bu, na bakina babu bagwa.

⁷ Yakobo amonɛ ngɔngɔ, na babwɛnji basusu pongono.

⁸ Suka mɛnɛ, asaboloja ai mbi pongono, mbi mwana obongoa.

⁹ Mojɔ bo mbi nadi ngɔngɔ jibabwɛnji basusu. Nabɔngiti bosɔ kombe eobwɛnji, mojɔ bo nadingoja Denga diNjambe.

¹⁰ Nadi adi mbi, oko a mojɔ momonganji moNjambe, na monganji monde ai mbi moinama. Mbi nakɔ elomu epipo, pɛpɛ nongo okina obu obwana na mbi a njea emina; mbi mɛnɛ ko naikɔ, oko monganji moNjambe mua modi ai mbi.

¹¹ Oko boa, mwako motɔndɔkɔ so basusu, isa mbi mɛnɛ, isa bo batongo, modi oko boa, na ojimani oko na mu.

¹² Atɔndɔkɔ so bo Masiya angɔ a bogwa, bakina banu babalaka bo bagwake batangɔ mojɔ moye?

¹³ Isa bagwake batangɔ, Masiya yo mɛnɛ aingɔ a bogwa.

¹⁴ Na isa Masiya aingɔ a bogwa, mwako motɔndɔkɔ so modi eka engasa, na ejimeli enu enami oko bonama.

¹⁵ Isa bagwake batangɔ, so bodi batati babokosea, mojɔ bo botataka bo Njambe angɔjɔ Masiya a bogwa.

¹⁶ Isa bagwake batangɔ, ka Masiya yo mɛnɛ aingɔ.

¹⁷ Isa Masiya aingɔ, ejimeli enu edi eka engasa, na odini oko a jibe jinu.

¹⁸ Na pongono, bato baya bagwa a tei eMasiya badimoa.

¹⁹ Isa njingo esu ai Masiya edi oko a mojɔ moehelo ye pɛ, bonɔi bato basusu na molɔbɔ.

²⁰ Masiya ko angɔ a tei ebagwake soti, o mbuma eboso ebaya bagwa.

²¹ Mojɔ bo bogwa bodoa na moto, na bongɔ bobagwake bodoa na moto pongono.

²² Basusu bagwaka na Adama; oko boa basusu bâsɔ bomɔ a tei eMasiya, moto na moto a libondo linde.

²³ Masiya adi o mbuma eboso, ngɔngɔ jinde oko baya badi bato bande a bodoa bonde.

²⁴ Ngɔngɔ jimina, suka emijɔ misusu edoabí. A ehole emina, oko amaka gbokeja makumu masusu, kpaci jisusu, ngulu esusu, asɔmbejabí bokumu ai Njambe Sango.

²⁵ Mojɔ bo yo adi boda na kpaci ebokumu, oko adi yo pɛ bopeta cingea bibota binde a diko disoki jinde jisusu.

²⁶ Soki yena egbokabí suka mɛnɛ edi oko bogwa.

²⁷ Mojɔ bo Njambe adumba ngando jisusu a cina jibibota binde. Abalaka yo bo ngando jisusu jidi a cina jibibota binde, edi bohu mɛnɛ bo yo mɛnɛ yona odumba ngando ji jisusu, acingiti na ngando jimina.

²⁸ Ngando jisusu jikada a cina ende, Mwana mɛnɛ adi bosuma yona odumba ngando jisusu a cina ende, bo Njambe adae ngando jisusu ai bato basusu.

²⁹ Emiti da boa, cina ebatisimo ebato a mojɔ mobagwake edi bo? Isa bagwake batangɔ, bato babatisamaka a mojɔ mobu cina eye?

³⁰ Na mbi napaka njupi bihole bisusu mojɔ moye?

³¹ Mbi nayɛli bogwa tu busa; nabalaka na nu boa baninga, mojɔ bo odini ekumu embi a tei eMasiya Yesu Kumu osu.

³² Isa bagwake batangɔ, mbi nana na tito babila a Ɛpɛsɔ na ngulu embi esusu mojɔ moye? Êsɔ mbi nde? Ekada boa, bopele bo boyake na bomwake, mojɔ bo bodi bogwapuma.

³³ Yɛ bosakoseani! Mambaci mabe mabejeka ekɔmɛli epele emoto.

³⁴ Sisoani, na dani na yongi epele. Yɛni bokɔ bobe. Natɔndɔkɔ no, a bokeja no sɔni, bo bakina banu batajebaka nongo Njambe.

³⁵ Okina moto ko adi bohɔjɔ bo, Bagwake badi bongɔ na ye? Mikuku mibu midi boda bo?

³⁶ Wɛ egegele! Ngua jinaka wɛ jimiti gwa, jitatɔ nongo.

³⁷ Na jia jinaka wɛ jidi oko ngua, isa jindongo, isa jiekina eka etongo, te nongo mokuku mua modi bomana ngɔngɔ.

³⁸ Njambe ko aepaka mokuku mopalaka yo, tu mongua oko na mokuku mua mobwani na mu.

³⁹ Mikuku misusu miditi amɛci. Mokina modi a mojɔ mobato, motongo a mojɔ motito, mokina motongo a mojɔ mombulu, na motongo koko a mɔjɔ moswi.

⁴⁰ Mikuku midiko midi, na mikuku minase. Ekumu emikuku midiko na ekumu emikuku minase bisangiti.

⁴¹ Ekumu emodika-busa na yena esonge bisangiti; na ekumu enjɔtɔ edi tungu etongo, mojɔ bo ekumu emonjɔtɔ omɔci na yena emonjɔtɔ otongo bisangiti.

⁴² Bongɔ bobagwake bodi koko boa; mokuku mosaka so ta kpɔtɔ modi mokuku mobopɔ; mua modi bongɔ a bogwa môtapɔ.

⁴³ Mo puseamaka, pɛpɛ nongo ekumu; modi bongɔ na ekumu. Mopuseamaka eka eyɛmbu, modi bongɔ oko na ndangasa.

⁴⁴ Mongua monaka so modi mokuku momoto; modi bongɔ oko mokuku momwembo.

⁴⁵ A mojɔ momina, mosɔnɔmɔ bo, Adama, moto oboso, adaka moto obomɔ. Adama osuka adi mwembo mua mopaka bomɔ.

⁴⁶ Mua momwembo moidaka boso; moto mɛnɛ boso, mwembo ko oko ngɔngɔ.

⁴⁷ Moto oboso ahula a kpɔtɔ, moto onase. Moto obabae ahula oho Diko.

⁴⁸ Bato banase badi oko na elimo emoto yona onase. Bato baDiko badi na elimo emoto oDiko.

⁴⁹ Adi so na elimo emoto onase, bodi boda koko na elimo emoto oDiko.

⁵⁰ Baninga, mbi natɔndɔkɔ no bo mini na makia mabwaniti bosangoa Bokumu boNjambe; na eka ebopɔ ebwaniti bosangoa yena edi na bosusu.

⁵¹ Hokeani! Nadi boboloja mojɔ mobombamake ai no. Iso basusu botahwɛ; iso basusu ko bokindoabí.

⁵² Bokindoabi so basusu bundumo, o bogbatimeja bomiso a mondule mosuka. Mojɔ bo mondule mohwiamabí, bagwake badi bongɔ na mikuku mia mibwaniti bopɔ, na so basusu bokindoabí.

⁵³ Mojɔ bo mokuku mu mobopɔ modi bolwa mokuku mua mobwamti bopɔ; na mokuku mu mobogwa, modi bolwa mokuku mua mobwaniti bogwa.

⁵⁴ Mokuku mobopɔ mokalwa mokuku mua mobwaniti bopɔ, na mokuku mobogwa mokalwa mokuku mua mobwaniti bogwa, ekenge yena esɔnɔmɔ edi bongama bo, Bogwa bogboki na lilonga.

⁵⁵ Wɛ bogwa, lilonga liwɛ lidi jɔ? Wɛ bogwa, ngɛngɛ ewɛ edi jɔ?

⁵⁶ Ngɛngɛ ebogwa edi bobe. Ngulu ebobe edi Mibeko.

⁵⁷ Yɛni bosakoe Njambe yona okɔkɔ bo so bogbokejae a mojɔ moKumu osu Yesu Masiya.

⁵⁸ A mojɔ momina, baninga bambi baepaeli, dani bambilimake, pɛ bombɛni nongo mweka; kɔmɛni Kumu na elomu enɛnɛ masu masusu, mojɔ bo ojebakani bo elomu enu ai Kumu êtanama nongo.