1 Bakolinto 13 - Nouveau Testament en Ngombe 1961

Epaeli

¹ Nongo nakabala na kɔpi jibato, isa jibabwɛnji-badiko, na napeliti epaeli, nadi oko doi dieboli, isa lisanga lia likɔkɔ ngɛ-ngɛ-ngɛ.

² Namiti da na epaeli, nadi eka engasa mɛnɛ; nongo nakatɔndɔ mwako, nongo nakacingea ngando jibombamake, nongo nakada na ejebeli esusu, nongo nakada na ejimeli enɛnɛ a bodongeja meno minɛnɛnɛ, pɛ mojɔ.

³ Namiti da na epaeli, nitabɔngɔ nongo mweka, nongo nakakaba leka lombi a bobɔkɔ bato babokwali, isa nakapa mokuku mombi a botumbama, pɛ mojɔ.

⁴ Epaeli edi na lingbangba; edi koko na likabo. Epaeli editi na likaka, na editi na egbo.

⁵ Epaeli editi na jala, na editi na ebaeli ebe. Epaeli editi na bolɛ a ngando jinde mɛnɛ pɛ, editi na misuba, na editi na kɛlɛ.

⁶ Epaeli etasepaka a mojɔ mobobe, esepaka oko a mojɔ mobopele pɛ.

⁷ Epaeli ehɔnɔkɔ ngando jisusu; ejimaka ngando jisusu; edi na njingo a tei engando jisusu, na edi na lingbangba a tei engando jisusu.

⁸ Epaeli epeliti nongo suka. Bitɔndɛli bidi bosia, na kɔpi jiyɛyɔ bogo; ejebeli edi bodimoa.

⁹ Mojɔ bo ejebeli esu edi oko ekenge pɛ, na etɔndɛli esu edi oko ekenge pɛ;

¹⁰ Mua mobɔngi kanga mosusu ko mokaboloa, mua modi oko ekenge pɛ môsia.

¹¹ Amaka mbi da yɛngɛ, nadaka na ebaeli eyɛngɛ, bolɛ bombi bodaka bolɛ boyɛngɛ, molema mombi modaka molema moyɛngɛ; ama mbi kandoa ko, nami kina oko ngando jibwɛngɛ.

¹² Bonjaka edɛye oko a talatala na ehindahindi; bô’nɛnɛ ko ngɔngɔ o bato baya bayɛlɛni. Edɛye, ejebeli embi edi oko ekenge pɛ; a busa bomina ko, nadi bojeba o ajebamaka mbi.

¹³ Edɛye ngando ji jisato jidikai, oko ejimeli, na njingo, na epaeli; yena enɔi jisusu ko edi oko epaeli.