1 Batɛsalɔnike 3 - Nouveau Testament en Ngombe 1961

Mɔngɔ moTimoteo a Tɛsalɔnike

¹ Mojɔ momina mogbasoa na su oko bogbasoa. A mojɔ momina, bojima bo mbi nadikae a Atena mbi buki.

² Na boloma mwangwa’su Timoteo, mokɔmɛli oNjambe, a elomu eMwako Mopele moMasiya. Bomoloma bo ambilimejae no a ejimeli enu, na a boleha no,

³ bo pɛpɛ nongo okina onu ombɛ a mojɔ mominɔngɔ mi. Ojebakani no bɛnɛ bo minɔngɔ midi oko libondo lisu.

⁴ Iso botomba botɔndɔ no eyou, yana adaka so a tei enu, bo bodi bonɛ minɔngɔ; na ojebakani e dɛye bo modi oko boa.

⁵ A mojɔ momina, naihɔnɔ bo’mba koko, na naloma bo najebe mojɔ moejimeli enu. Nadaka na mokakwano bo Momeki asaka meka no, na elomu esu esaka nama.

⁶ Timoteo ko adongi oho ai no na amei ya. Na yo atɔndɔi so mwako mopele moejimeli enu, na epaeli enu. Ajebejai so koko bo odini na bolɛ bopele ai so masu masusu, na bo odini na posa a bonɛnɛ na su, o adi so na posa a bonɛnɛ na nu.

⁷ A mojɔ momina baninga, nongo adi so na minɔngɔ na jɔɔlɔ so bɛnɛ, ejimeli enu esejai mokakwano mosu a mojɔ monu.

⁸ Mojɔ bo, adi no bambilimake a tei eKumu, o so boheli.

⁹ Iso bodi bosakoa Njambe na ye, a mojɔ monu? Cina bo bosepaka na enanga a mojɔ monu a boso boNjambe.

¹⁰ Na bongɔɔnɔkɔ na bingi enɛnɛ na bulu na moi, bo bonɛnɛe na nu, a bobɔngeja ejimeli enu isa etaki na eka.

¹¹ Yɛ Njambe Sangwa’su yo mɛnɛ, na Kumu osu Yesu, bapɛ so njea ai no.

¹² Yɛ Kumu ahɛjɛe epaeli enu egbasoake mɛnɛ, moto ai mina’nde moto, na ai bato basusu, o apalaka so no.

¹³ Yɛ ambilimejae milema minu bo midae misɛnɔke, pɛpɛ nongo litɔnɔ, a boso boNjambe Sangwa’su, a bodoa boKumu osu Yesu na basɛnɔke bande basusu.