1 Batɛsalɔnike 2 - Nouveau Testament en Ngombe 1961

Elomu ePaulo a Tɛsalɔnike

¹ Baninga, ojebakani no bɛnɛ bo mɔngɔ mokɛ so ai no moidaloa nongo.

² Nongo ama so dingoa na ama so samboa a Pilipoi, bomi hɛ oko na eci eNjambe, o ajebaka no, a botɔndɔ no Mwako Mopele moNjambe o bila mɛnɛ.

³ Eleho esu editi na bokosea, isa bosɔtɔ, isa epulu.

⁴ Iso botɔndɔkɔ mwako a bokumeja Njambe yona onjaka milema misu, te a bosepeja bato; mojɔ bo Njambe yo mɛnɛ ajima bo akine Mwako Mopele a mɔmɔ masu.

⁵ Ojebakani no bɛnɛ bo boitombea no na bibaeli bisu. Na boimeka bodiha likonja na poloso; Njambe yo mɛnɛ adi monjɛnɛki osu.

⁶ Boipala bo bato bakumejae so, isa no bɛnɛ, isa bato batongo. Nongo adaka so babwɛnji baMasiya, boipala bo bodae muna ai no.

⁷ Bodaka na bo yɛmbu mɛnɛ a tei enu, o ekɔmɛli emwali yona obimbaka bana bande lipaapoko.

⁸ Oko boa, adaka so na epaeli enɛnɛ ai no, bodaka na posa a bopa no milema misu bɛnɛ, te Mwako Mopele moNjambe pɛ, mojɔ bo bodaka na nu ngɛnjɔ.

⁹ Baninga, otabosakani elomu na monɔngɔ mosu. Yana atɔndɔkɔ so Mwako Mopele moNjambe a tei enu, bokɔkɔ elomu mabulu na mei bo botada nongo muna ai no.

¹⁰ Ekɔmɛli esu a tei enu baejimeli edaka esɛnɔke na bojo, pɛpɛ nongo mojɔ; ino bɛnɛ odini banjɛnɛki bamojɔ momina, na Njambe pongono.

¹¹ Ojebakani bo bodaka na nu basusu o adi sange ebana na bana bande. Boleha no moto na moto, bopingeja milema minu, na bongɔɔnɔ no

¹² bo okumejaeni Njambe na mida minu, oko Njambe yona obea no a Bokumu bonde na ekumu ende.

¹³ Yana asɔ no bwɛnji ai so, oko Ebaeli eNjambe, oesɔni o Ebaeli eNjambe mɛnɛ, te ebaeli ebato. Iso bosakoaka Njambe bihole bisusu a mojɔ momina. Mojɔ bo edi Ebaeli eNjambe soti, yena ekɔkɔ elomu a tei enu baya bajimaka.

¹⁴ Baninga, odakani bakoaneli baMenga maNjambe a tei eMasiya oho a Yuda; mojɔ bo ino o’sɔni minɔngɔ ai bato balikota linu bɛnɛ, o asɔ bo ai BaYuda.

¹⁵ Mojɔ bo BaYuda bawa Kumu Yesu, na bawa batɔndɔi, na babengana so; bakejaka Njambe kɛlɛ, na badi na bato basusu soki.

¹⁶ Batandanejaka so bo bosaka tɔndɔ bapakano Mwako Mopele bo bahele. Oko boa balume—jaka mwɛngi mojibe jibu bihole bisusu. Likundu ko liNjambe limei oko ai bo.

¹⁷ Baninga, adaka so na nu bohali ekina ehole, te a molema oko a mokuku, bodaka na posa enɛnɛ mɛnɛ a bo’nɛnɛ na nu.

¹⁸ Bokana bo bodoe ai no—mbi Paulo nakenga bihole bmɛnɛ—Satana ko adipa so njea.

¹⁹ Njingo esu, na ekumu esu, na likongo lisu lisepi nda, a boso boKumu osu Yesu a bodoa bonde? te no?

²⁰ Mojɔ bo ino odini ekumu esu na sepi esu.