1 Batɛsalɔnike 1 - Nouveau Testament en Ngombe 1961

¹ Paulo na Sakwano na Timoteo a Denga diBaTɛsalɔnike dia didi a a tei eNjambe Sango na Kumu Yesu Masiya. Yɛ monganji moNjambe na bowi bodae na nu.

Ejimeli eBaTɛsalɔnike

² Iso bosakoaka Njambe bihole bisusu a mojɔ monu, na bota-bosaka no nongo mweka a ma’nga masu.

³ Mojɔ bo bolɛkɛ elomu eejimeli enu, elomu enu eepaeli, na njingo enu yena etambɛkɛ, ai Kumu osu Yesu Masiya, a boso boNjambe Sangwa’su.

⁴ Baninga, Njambe adi na nu ngɛnjɔ, na so bojebaka bo yo ahɔ no.

⁵ Mwako Mopele mosu moidoa ai no na kɔpi pɛ; modoa na ngulu, na Mwembo Mosɛnɔke, na ejimeli enɛnɛ. Ojebakani ekɔmɛli yena edaka na su a tei enu a mojɔ monu.

⁶ Okoanani na su, na Masiya pongono, yana asɔ no Ebaeli a minɔngɔ minɛnɛ, na osepani na sepi eMwembo Mosɛnɔke.

⁷ Oko boa onejani ekoaneli ai bato basusu baejimeli a Makedonia na a Akaya.

⁸ Mojɔ bo onanganejani Mwako Mopele moKumu, te a Makedoma na a Akaya pɛ; bato bajebaka mojɔ moejimeli enu a bisika bisusu, so bɛnɛ pɛ bobatɔndɔ.

⁹ Bato bamina babalaka a mojɔ mobodoa bosu ai no, bo o’sɔni so bopele, na bo okwani bosakoa bobilimo, na ohekoani ai Njambe, a bokɔmɛ Njambe osoti na obomɔ,

¹⁰ na a bo’mba bohula boMwana’nde oho Diko yona ongɔjɔ yo a bogwa, oko Yesu yona ohelejaka so a likundu lia likɛkɛ adoe.