Yoane 8 - Nouveau Testament et Psaumes en Ndandi Version 1962

Omukali musingiri

¹ Nikwa Yesu mwaya oko kitwa kya Mizeituni.

² Nomo ngyakyangyakya mwatsinduka kandi omo hekalu, nabandu bosi mobasa ahali; Neryo mwikala, mwakangiriryabo.

³ Na basaki na baFarisayo mobamuletera mukali oyo weyibawa omwiteta; neryo mobamuhira omukati-kati,

⁴ mobamubwira, bati, Mukangirirya, omukali oyu ariatsimbawa akateta.

⁵ Omu bihano Musa atutegeka ati itwita oyu ringoyu omo mabwe: nawe ukabugaki busana naye kwehi?

⁶ Babuga eki, erimu lengako, imobatoka erimuhandikirira. Nikwa Yesu munama mwasaka nomunwe wuwe oko kitaka.

⁷ Nikwa omugulu bamamuhatikana erimubulya, munamuka, mwabuga nabo, ati, Oyu te nebibi omukati-kati kenyu, atsuke erimugusa kwe ribwe.

⁸ Nakandi munama, mwasaka momunwe oko kitaka.

⁹ Nabo mugulu bowakyo, mobahuluka muguma muguma, eritsuka oko mukulu erihika oko wenyuma: na Yesu mwasigala iyowene, nomukali, aho abya katikati omo.

¹⁰ Neryo Yesu munamuka, mwabuga naye, ati, Mukali, barihi kwehi? sihalwe mundu nomuguma wamakutswera lubi kwehi?

¹¹ Naye mwabuga, Sihalwe mundu, Mukama. Na Yesu mwabuga, ati, Nage sindikutswera lubi: genda; susyeswakola ekibi kandi.

Yesu ekyakakala kye kihugo

¹² Nakandi Yesu mwabuga nabo, ati, Ingye indi ekyakakala kye kihugo: oyu kangwama siendisyagendera omo mwirimya, nikwa asyabya nekyakakala kyengebe.

¹³ AbaFarisayo moba mubwira, bati, Ukatulago busana nawe; eritulago ryawe si kwenene.

¹⁴ Yesu mwasubirya mwabwirabo, ati, Nomo nanga tulago busana nage, eritulago ryage ni kwenene; kusangwa nyasi eyo nalwa, neyo ngaya; nikwa inywe simwasi eyo nalwa, kutse eyo ngaya.

¹⁵ Inywe mukatswera omusindo womubiri; ingye sinditswera mundu nomuguma.

¹⁶ Nibya namatswera, eritswera ryage ni kwenene; kusangwa sindi ingyowene, indi na Tata oyo wanyituma.

¹⁷ Nibya omo bihano byenyu bisa kire, biti, eritulago ryabandu babiri ni kwenene.

¹⁸ Ingye indi oyu katulago busana nage, na Tata oyo wanyituma akatulago busana nage.

¹⁹ Neryo mobamubulya, bati Tata wawe ari hahi kwehi? Yesu mwasubirya, Simunyasi, na Tata simumwasi: kumbe mulwe munyasi, nga mwasi na Tata nibya.

²⁰ Ebinywa ebi abugirabyo omu ngonde yeribikamo esyofaranka iniaka kangiriraya omo hekalu: mohatabya mundu ukamutsimba; kusangwa endambi yiwe isiriyahika.

²¹ Neryo kandi mwabuga nabo, ati, Ngagenda, mwasyansondya, mwasyahola omobibi byenyu: eyo ngaya, simwangatoka eriasayo.

²² Neryo abaYuda mobabuga, bati, Akandisyayita kwehi? kwakabuga, ati, Eyo ngaya, simwangatoka eriasayo.

²³ Neryo mwabuga nabo, ati, Inywe muri beyikwa; ingye indi wendata: inywe muri be kihugo eki; ingye sindi we kihugo eki.

²⁴ Kikaleka inabuga nenyu, nyiti, Mwasyahola omo bibi byenyu: kusangwa mwamatindiki rirya ko nyiri ininaye, mwasyahola omo bibi byenyu.

²⁵ Neryo mobabuga naye, bati, Uwendi kwehi? Yesu mwabwirabo, ati, Ngoko nababwira erimbere.

²⁶ Nyiri na myatsi mingi eriba bwira neritswera busana nenyu: nikwa oyo wanyituma ni kwenene; nemyatsi eyo ngowa kwiye, yo ngabuga oko kihugo.

²⁷ Nabo mobataminya ngakabuga busana nIse.

²⁸ Neryo Yesu mwabuga, ati, Omugulu mwasyasumba Mugala womundu, imwasyaminya kwari ini nangye, kondekola kindu ingyowene, nikwa ngoko Tata akanyikangiriraya, ko ngabuga emyatsi eyi.

²⁹ Noyo wanyituma ane haguma nage; siaritanziga ingyowene; kusangwa ngakola ebiro byosi emyatsi eyikamutsemesaya.

³⁰ Abere anemobuga emyatsi eyi, abangi mobamwikirirya.

Eriboholwa kwenene

³¹ Neryo Yesu mwabuga nabaYuda abamwikiriraya, ati, Mwamabya omo kinywa kyage, imuri biga bage kundu;

³² mwasyaminya omwatsi wakwenene, nomwatsi wakwenene asyababohola.

³³ Mobamusubirya, bati, Turi lubuto lwa Abrahamu, sitwetabya mo muliki womundu nomuguma na kera: niki kyukabuga, uti, Mwasyaboholwa kwehi?

³⁴ Yesu mwasubiryabo, ati, Kundu, kundu, ngabuga nenyu, Omundundi oyu kakola ebibi ni mukobe webibi.

³⁵ Nomukobesiarikala omo nyumba ebiro byosi: omugala yukikala ebiro byosi.

³⁶ Neryo omugala amababohola, imwamaboholwa kundu.

³⁷ Nyasi ko muri olubuto lwa Abrahamu; nikwamukasonda-sonda erinyita, kusangwa eKinywa kyage sikiwite mwanya omwisi wenyu.

³⁸ Ngabuga emyatsi eyo nabirilolako uku Tata: nenyu mukakola emyatsi eyo mowa uku tata wenyu.

³⁹ Mobasubirya mobabuga naye, bati, Tata wetu ni Abrahamu. Yesu mwabwirabo ati, Mwamabya bana baAbrahamu, imwa kola emibiri ya Abrahamu.

⁴⁰ Nikwa lino mukasonda-sonda erinyita, ingye mundu nabiribabwira omwatsi wa kwenene, ebyo nowa oko Mungu: Abrahamu mwatakola atya.

⁴¹ Muka kola emibiri yatata wenyu. Mobabuga naye, bati, Sitwabutawa omwiteta; tuwite Tata muguma yo Mungu.

⁴² Yesu mwabuga nabo, ati, Kumbe Mungu abya Tata wenyu, nga munyanzire: kusangwa nahuluka ingalwa oko Mungu; mondasa busana nage, nikwa iye anyituma.

⁴³ Busana naki simweminya mubuge wage kwehi? Kusangwa simwetoka eriowa eKinywa kyage.

⁴⁴ Inywe muri batata wenyu Satani, nesyongumbu syatata wenyu syo mwanzire erikola. Iye abya mwiti eritsuka na kera, isialihangana omwisi womwatsi wakwenene, kusangwa sihali mwatsi wa kwenene omwisi wuwe. Omugulu akabuga mabihi, iniakabuga biwe iyowene: kusangwa ni mubihi, nise wa mabihi.

⁴⁵ Nikwa kusangwa ngababwira ebyekwenene, simwenyikiriraya.

⁴⁶ Nindi kwinywe oyu kanzinga busana nebibi kwehi? Namabuga ebyekwenene, niki kikaleka muta nyikirirya kwehi?

⁴⁷ OwoMungu akowa ebinywa byoMungu: busana nomwatsi oyu simuriowa, kusangwa simuri boMungu.

⁴⁸ AbaYuda mobasubirya mobamubwira, bati, Sitwetabuga ndeke kuri munyaSamariya, kuri ko mbinga kwehi?

⁴⁹ Yesu mwasubirya, ati, Sindi ko mbinga; nikwa ngasikaya Tata wage, nenyu simurinyisikaya.

⁵⁰ Nikwa sindisonda-sonda oluke ngerwa lwage: hari muguma oyu kasonda-sondalo naye asyabya mutsweri.

⁵¹ Kundu, kundu, ngabuga nenyu, Omundu ama bika eKinywa kyage, siendisyalola oko luholo na kera.

⁵² Aba­Yuda mobamubwira, bati, Lino tunasi kuri kwembinga. Abrahamu mwahola, nabanabi; nawe, uti, Omundu amabika eKinywa kyage, isiendisyagerya oko luholo na kera.

⁵³ Uri mukulu uku tata wetu Abrahamu oyo wahola kwehi? nabanabi mobahola: ukayiyira mondi kwehi?

⁵⁴ Yesu mwasubirya, ati, Namayiha erikengwa, olukengerwa lwage ni buyira: ni Tata oyu kamba erikengwa; oyo mukahula, muti ni Mungu wenyu;

⁵⁵ nenyu simuritamuminya: nikwa ingye nyimwasi; namabuga, nyiti, Smyimwasi, inabya omubihi, nga nywe: nikwa nyimwasi, ngabika nekinywa kiwe.

⁵⁶ Tata wenyu Abrahamu mwatsema erilola oko kiro kyage; mwalangirakyo, mwatsema.

⁵⁷ Neryo abaYuda, mobabuga naye, bati, Ka suriwabuga emituta ama kumi atano, nawe wabirilola uku Abrahamu kwehi?

⁵⁸ Yesu mwabuga nabo, ati, Kundu, kundu, ngabuga nenyu, Kera Abrahamu ateabutwa, inyine.

⁵⁹ Neryo mobatola mabwe erimugusagoko: nikwa Yesu mwayibisa, mwalwa omo hekalu.