Yoane 7 - Nouveau Testament et Psaumes en Ndandi Version 1962

Yesu na bagala babo

¹ Nenyuma wemyatsi eyi Yesu mwalendera eGalilaya: ku sangwa siarisonda erilendera eYudea, kusangwa abaYuda basonda erimwita.

² Nekiro kinene kyabaYuda, ekiro kyama hema, kyabya hakuhi.

³ Neryo abagala babo mobamubwira, bati, Ulwe eno uye, eYudea, abiga bawe ibatoka erilangira emibiri ukakola.

⁴ Kusangwa sihali mundu ukakola ekindu bubi-sobiso, akasonda eriminyikala. Wamakola emyatsi eyi, uyiminyikalaye oko kihugo.

⁵ Kusangwa abagala babo nibya mobatamwikirirya.

⁶ Yesu mwabwirabo, ati, Endambi yage siriyahika; nikwa endambi yenyu ineho ebiro biosi.

⁷ E kihugo sikyangatoka eribakwa obusu; nikwa ingye kikangwa obusu, kusangwa ngatulago, kwe mibiri yakyo ni mibi.

⁸ Muhetukire oko kiro kikulu: sindinahetukira oko kiro kikulu; kusangwa endambi yage siriyaberwa.

⁹ Amabibwirabo emyatsi eyi, mwasigala eGalilaya.

¹⁰ Nikwa omugulu abagala babo bamabihetukira oko kiro kikulu ekyo, naye mwahetuka, butsira neriminyikala, nikwa bubi-sobiso.

¹¹ Neryo abaYuda mobamusonda-sonda oko kiro kikulu, bati, Arihi kwehi?

¹² Mohabya erisiningula inene omukati-kati kendeko busana naye; abandi bati. Ni mubuya; nabandi bati, Eyihi, akatalaya endeko.

¹³ Nikwa sihabya mundu oyo kamwahula neriminyikala busana neriubaha abaYuda.

Erikangirirya ryaYesu omo Hekalu

¹⁴ Nikwa omukati-kati kekiro kikulu ekyo Yesu mwahetukira omo hekalu, mwakangirirya.

¹⁵ AbaYuda nabo mobasweka, bati, Omundu oyu akaminya erisoma ati kwehi? isiaritiga na kera kwehi?

¹⁶ Neryo Yesu mwasubiryabo, ati, Erikangirirya ryage si ryage, ni ryoyo wanyituma.

¹⁷ Omundu amanza erikola erisonda riwe, asyaminya erikangirirya eryo, ngaryalwa oko Mungu, kutse nga ngabuga ingyowene.

¹⁸ Oyu kayahula iyowene akasonda-sonda olukengerwa luwe: nikwa oyukasonda-sonda lukengerwa loyo wamutuma, iye ni wakwenene, nebitatunganene sibiri omwisi wuwe.

¹⁹ Musa mwatabaha ebihano kwehi? nikwa sihari nomuguma kwinywe oyu kakola ebihano. Busana naki mukasonda-sonda erinyita kwehi?

²⁰ Endeko moyasubirya, iti, Uri ko mbinga: nindi akasonda erikwita kwehi?

²¹ Yesu mwasubirya mwabwirabo, ati, Monakola mubiri muguma, nenyu momwaswekerago.

²² Musa mwabaha eribana (isirya Musa, nikwa ni ryabotata wenyu); noko sabatu mukabanaya omundu.

²³ Omundu amabanibwa oko sabatu, ebihano byaMusa sibiponawe; mukanyihitanako, kusangwa nabirilamya mundu ndeke oko sabatu kwehi?

²⁴ Simutswere busana nerilangirwa, mutswere olubanza lutu nganene.

Abandi bakasonda eritsimba Yesu

²⁵ Neryo abandi bakubo beYerusalema mobabuga, Oyu siyoyo bakasonda eriita kwehi?

²⁶ Lebaya akabuga neriyiminyikalya, isibebuga naye. Ko barongani banasi kundu oyu kwari Kristo kwehi?

²⁷ Nikwa oyu tunasi ahalwa: nikwa omugulu Kristo asyasa sihari mundu wasyaminya ahalwa.

²⁸ Neryo Yesu mwatulago omo hekalu akakangirirya ati, Munyasi, mwasi naho nalwa; isinditasa busana nage, nikwa ayu wanyituma ni kwenene, inywe simumwasi.

²⁹ Ingye nyi mwasi; kusangwa nalwa kwiye, naye yo wanyituma.

³⁰ Neryo mobasonda-sonda erimutsimba: kandi mohatabya mundu wamuhira kwebyala kusangwa endambi yiwe siriyahika.

³¹ Ni kwa bangi ababyaho omo ndeko mobamwikirirya, bati, Kristo asyabya asa, asyakola ebitikotiko bingi kwilaba ebyo mundu oyu akakola kwehi?

³² AbaFarisayo mobowa endeko ika siningula emyatsi eyi busana naye; nabahereri bakulu na baFarisayo mobatuma abalima erimutsimba.

³³ Neryo Yesu mwabuga, ati, Hakisiya akatambi kake na ndi haguma nenyu, neryo ngaya okwoyo wanyituma.

³⁴ Mwasyanyisonda-sonda simwendisyanyibana: naho nyiri, simwangatoka eriasaho.

³⁵ Neryo abaYuda mobakania haguma omukati-kati kabo, bati, Omundu oyo asyaya hahi kwehi? ati sitwedi syamubana asyaya oko bapanzawa omukati-kati kabaGiriki, nerikangirirya abaGiriki kwehi?

³⁶ eKinywa eki ni kyahi ekyo akabuga, ati, Mwasyanyisonda-sonda, simwendisyanyibana; neyo nyiri, si mwangatoka eriasa kwehi?

Amagetsi wengebe

³⁷ Neryo oko kiro kyenyuma, ekilengire ebindi byekiro kikulu ekyo, Yesu mwahangana mwabirikira, ati. Omundu amakwa enyota, ase kwingye apulaye.

³⁸ Oyu kanyikirirayako, ngoko amasako abiribuga, erilwa omwisi wuwe esyonyusi syamagetsi wengebe syasyasenda.

³⁹ Nikwa ahula eki busana neKirimu, ekyo abakamwikiriraya bakandisyahabwa; kusangwa eKirimu isi kyekyahabwa; kusangwa Yesu abya isiariabana olukengerwa.

⁴⁰ Neryo abendeko, omugulu bowa ebinywa ebi, mobabuga, bati, Kwenene oyu ni muminyereri.

⁴¹ Abandi bati, Oyu ni Kristo. Nikwa abandi bati, Kwe niki, Kristo akalwa eGalilaya kwehi?

⁴² Amasako mwatabuga ko Kristo akalwa oko lubuto lwaDawidi, noko Betelehemu, omuyi Dawidi abyamo kwehi?

⁴³ Neryo erigabana moryabya omukati-kati kendeko busana naye.

⁴⁴ Nabandi ibakasonda erimutsimba; nikwa mohatabya mundu oyu kamuhira kwebyala.

⁴⁵ Neryo abalima mobahika oko bakuhane bakulu noko baFarisayo; mobabulyabo, bati, Busana naki simwetamuleta kwehi?

⁴⁶ Abalima mobasubiryabo, bati, Na kera sihalimundu ukabuga ngaye.

⁴⁷ Neryo abaFarisayo mobasubiryabo, bati, Nenyu nibya mwamatalibwa kwehi?

⁴⁸ Oko barongani nabaFarisayo hali oyo wabirimwikirirya kwehi?

⁴⁹ Nikwa endeko eyi eyitasi ebihano ni batakirwa.

⁵⁰ Nikodemo mwa buga nabo (oyu wasa kwiye erimbere, abya muguma wakubo) ati,

⁵¹ Ebihano byetu bikatswera omundu isibetatsuka erimowa neriminya ekyo akakola kwehi?

⁵² Mobamusubirya bati, Nawe uri wa Galilaya kwehi? Sonda-sonda ulebaye sihali omuminye reri wangalwa eGalilaya.

⁵³ Noburi mundu mwasuba ewuwe: