Yoane 6 - Nouveau Testament et Psaumes en Ndandi Version 1962

Erirya rya 5000

¹ Enyuma wemyatsi eyi Yesu mwagenda eyisiria wengetsi ya Galilaya, ye ngetsi ye Tiberia.

² Nendeko nene moyamu kwama, kusangwa balola oko bitikotiko akolera abakoni.

³ Na Yesu mwahetukira oko kitwa, neyo mwikala nabiga buwe.

⁴ Nerilabwako (Pasaka), rye kiro kikulu kyabaYuda, ryabya hakuhi.

⁵ Neryo Yesu mwasumba ameso wuwe, nerilangira endeko nene ikamuhikako, mwabuga na Filipo, ati, Tukandi gula amandu hahi awaba bangarya kwehi?

⁶ Neryo mwabuga eki erimulengako: kusangwa iye abya asi ekyo angakola.

⁷ Filipo mwamusubirya, ati, Amandu wesyodinari amagana abiri siangatolerabo, nomo bangarya kakekake.

⁸ Omuguma woko biga buwe, iye Anderea, mugala wabo Simoni Petero, mwamubwira, ati,

⁹ Hano hari mulwana, oyu wite amando atano wekisusu, na mahere abiri: nikwa hino niki oko bandu bangaha kwehi?

¹⁰ Yesu mwabuga ati, Mwikalaye abandu. Neryo aho habya biti bingi. Neryo abalume mobikala, eriganza ryabo ryabya maelfu atano.

¹¹ Neryo Yesu mwimya amandu; neryo amabiha ewasingya, mwagabirabo oko babya bikere; mwakola atya na mahere ngoko babya banzire.

¹² Nomugulu bamabiuguta, mwabwira abiga buwe, ati, Mukumakume ebihandebihande ebyamasaka, neryo sihatale kindu.

¹³ Neryo mobakumakumabyo, mobusulya ebitiri ikumi nabibiri oko bihande byamando atano awekisusu, ebyasaka kwabo abarya.

¹⁴ Neryo omugulu abandu balola oko kitikotiko ekyo akola, mobabuga, bati, Kwenene oyu ni muminyereri oyu kasa omo kihugo.

¹⁵ Neryo Yesu amabiminya kobakasa bakasonda erimwimya erimuyira mo mwami, mwalwaho mwaya oko kitwa iyowene.

Yesu akalendera oko magetsi wengetsi

¹⁶ Nomwigolo-golo abiga biwe mobandagalira oko ngetsi;

¹⁷ mobingira omo bwato, ibakasoka engetsi bakaya eKaper nauma. Ibwamabihombera, na Yesu isiariahika kubo.

¹⁸ Ne ngetsi ikatsuka erigunga busana nerihunga inene ryabuhirira.

¹⁹ Neryo omugulu bamabigoya olulengo lwendambi nguma, mobalola oko Yesu iniakalendera endata oko ngetsi, iniakahika hakuhi nobwato. Mobubaha.

²⁰ Nikwa mwabuga nabo, ati, Ni ngye; simubahe.

²¹ Neryo mobaliga erimukokya omu bwato: neryo-neryo obwato mobwahika oko kitaka eyo babya bakaya.

Obundu bwelubula

²² Nengyakya endeko eyahangana eyisirya wengetsi mobala ngira isibari obundi bwato, ibono buguma, na Yesu isiaritingira mu bwato na biga buwe, nikwa abiga buwe ibamabigenda ibobene.

²³ Nikwa amato mwalwa Tiberia mwasa hakuhi naho barira amandu oMukama iniamabiha ewasingya.

²⁴ Neryo omugulu endeko yalangira Yesu isiari yo, kutse abiga buwe, mobingira omo mato, mobaya eKapernauma, erisonda-sonda Yesu.

²⁵ Nomugulu bamwegaya eyisirya oko ngetsi, moba mubulya, bati, Mukangi rirya, wasa hano omugulu wahi kwehi?

²⁶ Yesu mwasubiryabo, ati, Kundu, kundu, ngabuga nenyu, Mukanyisondaya, butsira erilola oko bitikotiko, nikwa ku sangwa mwarya oko mando, momuguta.

²⁷ Simukole busana nebyalya ebikahonda, nikwa nakaryo akakabyaho erihika oko ngebe yerikota, ako Mungala womundu asyabaha: kusangwa ni ye oyo Tata, ye Mungu, abirihira kwe kibohi.

²⁸ Neryo mobamubwira, bati, Tuyire tuti, imotwakola omubiri woMungu kwehi?

²⁹ Yesu mwasubirya mwabuga nabo, Oyu ni mubiri woMungu, mwikiriraye ukwoyo atuma.

³⁰ Neryo mobamu bulya, bati, Ukakola ekitikotiko kyahi, kwehi? Tulole kukyo, tukwikiriraye? Ukakolaki kwehi?

³¹ Abotata wetu mobarya mana omo mbwarara; ngoko byasakawa, Mwahabo erirya obundu bukalwa elubula.

³² Yesu mwabuga nabo, ati, Kundu, kundu, ngababwira kwatabya Musa yo wabaha obundu bwalwa elubula; nikwa ni Tata yukabaha obundu bwakwenene bukalwa elubula.

³³ Kusangwa obundu bwoMungu yoyu kandagala akalwa elubula, akaha e kihugo kyengebe.

³⁴ Neryo mobabuga naye, bati, OMukama, ebiro byosi utuhe obundu obu.

³⁵ Yesu mwabuga nabo, ati, Ingye ndi bundu bwengebe: oyu kasa kwingye siendisyakwa enzala na kera, noyu kanyikirirayako siendisyakwa enyota na kera.

³⁶ Nikwa monabuga nenyu, nyiti, Mwabirinyilolako, simwetikirirya.

³⁷ Abosi abo Tata akamba basyasa kwingye; noyu kasa kwingye sindiendisyamu higa na hake.

³⁸ Kusangwa sinandagala erilwa elubula, erikola erianza ryage, nikwa nandagala erikola erianza ryoyo wanyi tuma.

³⁹ Nerianza ryoyo wanyituma ryeri, sinyitalaye nomu guma oko bosi abirimba, nikwa nasyalubukyabo oko kiro kyenyuma.

⁴⁰ Kusangwa erianza ryaTata wage ryeri, oburi mundu oyu kalangira oMugala akamwikirirya, iniabana engebe yerikota; nage nasyamulubukya oko kiro kienyuma.

⁴¹ Neryo baYuda mobamusiningurira, kusangwa mwabuga, ati, Ingye indi bundu obwandagala erilwa elubula.

⁴² Bati, Oyu si Yesu, omugala wa Yosefu, nise wuwe nenyinya sitwasibo kwehi? Lino akabuga ati, kwehi? Ati, nandagala erilwa elubula.

⁴³ Yesu mwasubiryabo, ati, Simusiningule omukati kati kenyu.

⁴⁴ Sihari mundu wangambikako, Tata oyo wanyi tuma atariamuleta: nage nasyamulubukya ekiro kyenyuma.

⁴⁵ Kyasakawa na baminyereri, bati, Abosi basyakangiriribwa noMungu. Oburi mundu oyo wabiriowa Tata, iniamabikangi riribwa, akasa kwingye.

⁴⁶ Eutsira ibwambu hari mundu walolire ko Tata, yonoyo walwa oko Mungu, iye abirilola ku Tata.

⁴⁷ Kundu, kundu, ngabuga nenyu, Oyu kikiriraya ari nengebe yerikota.

⁴⁸ Ingye indi bundu bwengebe.

⁴⁹ Abotata wenyu mobarya mana omo mbwarara, mobahola.

⁵⁰ Obu ni bundu bwandagala erilwa elubula, omundu amarya kubo, iniatahola.

⁵¹ Ingye indi bundu obwengebe obwandagala erilwa elubula: omundu amarya obundu obu, asyakota na kera: ega, nobundu obo nasyaha ni mubiri wage, busana nengebe ye kihugo.

Obundu bwengebe

⁵² Neryo abaYuda mobakuba obuhaka omukati-kati kabo, bati, Omundu oyu angatoka ati erituha omubiri wuwe eriryago kwehi?

⁵³ Neryo Yesu mwabuga nabo, ati, Kundu, kundu, ngabuga nenyu, Mwamatindarya omubiri woMugala woMundu neripulya omusasi wuwe, simuwite engebe omwisi wenyu.

⁵⁴ Oyu karya omubiri wage neripulya omusasi wage ari nengebe yerikota; nage nasyamulubukya oko kiro kyenyuma.

⁵⁵ Ku sangwa omubiri wage ni karyo kekwenene, nomusasi wage ni pulya ryekwenene.

⁵⁶ Oyu karya omubiri wage neripulya omusasi wage akikala mwisi wage, nage ngikala omwisi wuwe.

⁵⁷ Ngoko Tata oyuri ho anyituma, nage indi ho busana na Tata; neryo oyu kanyirya, asyabyaho busana nage.

⁵⁸ Obu ni bundu bwandagala erilwa elubula: siriri nga botata wenyu ko barya, bahola; oyu karya obundu obu asyabyaho na kera.

⁵⁹ Emyatsi eyi abugirayo omu nyumba yerihindana, iniakaka ngiriraya eKapernauma.

Bangi bakasuba enyuma

⁶⁰ Neryo bangi boko biga biwe, omugulu bowa mobabuga, bati, eKinywa eki kikalire; nindi wangowakyo kwehi?

⁶¹ Nikwa Yesu eriminya omwisi wuwe kwabiga biwe basiningula busana neki, mwabulyabo ati, Eki kikaleka imwatwikala kwehi?

⁶² Nikwa niki mwamalola OMugala womundu akahetukira eyabya erimbere kwehi?

⁶³ Ni kirimu kikaha engebe; omubiri siariha endundi: ebinywa ebyo nabiribuga nenyu ni kirimu, ni ngebe.

⁶⁴ Nikwa hari bandi omukati-kati kenyu abatikirirye. Kusangwa Yesu abya asi na kera nga ni bahi abatikirirye, noyo wasyamuhotela.

⁶⁵ Neryo mwabuga, Busana nomwatsi oyu nabiribuga nenyu, Sihali mundu wangasa kwingye amatinda habwa na Tata.

Eritulago ryaPetero

⁶⁶ Busana neki bangi boko biga biwe mobasuba enyuma mobataswalendera naye.

⁶⁷ Neryo Yesu mwabulya erikumi nababiri ati, Nenyu mwanzire erigenda kwehi?

⁶⁸ Simoni Petero mwamusubirya, ati, OMukama, twasyaya kondi kwehi? uwe uwite ebinywa byengebe yerikota.

⁶⁹ Netu twabiriikirirya twabiriminya kuri oyu ubuyirire woMungu.

⁷⁰ Yesu mwa subiryabo, ati, Mondayisoga inywe erikumi na babiri, nomu guma okwinywe ni satani?

⁷¹ Nikwa ahula Yuda wa Simoni Iskariota, kusangwa iye iyukandisyamuhotela, abya owerikumi na babiri.