Yoane 4 - Nouveau Testament et Psaumes en Ndandi Version 1962

Omukali waSamaria

¹ Neryo omugulu oMukama aminya kwa baFarisayo bamowa ko Yesu akayira neribatisya abiga bangi kwilaba Yoane

² (nikwa Yesu iyute batisaya, nikwa abiga biwe),

³ mwalwa eYudea, mwaya kandi eGalilaya.

⁴ Neryo abya atolere inialaba Samaria.

⁵ Neryo mwahika oko muyi waSamaria, owakahulawa mo Sukara, hakuhi nekihande kyekitaka Yakobo aha mugala wuwe Yosefu.

⁶ Ho habya eyisoko yaYakobo, neryo Yesu inialuhire busana nolugendo luwe, mwikala atya oko yisoko. Yabya nga ndambi yendatu.

⁷ Omukali weSamaria mwasa asyateha magetsi. Yesu mwabuga naye, ati, Omba weripulya.

⁸ Kusangwa abiga biwe ibayire oko muyi neriyagula karyo.

⁹ Omukali weSamaria mwabuga naye, ati, Niki kikaleka uwe muYuda, iwanyibulya oweripulya nage ndi mukali waSamaria kwehi? (Kusangwa baYuda baponene na banyaSamaria).

¹⁰ Yesu mwasubirya mwabuga naye, ati, Kumbe wasi erihitya ryoMungu, noyu kabuga nawe, ati, Omba weripulya; kumbe wabirimubulya, naye iniakuha amagetsi wengebe.

¹¹ Omukali mwabuga naye, ati, Mukama, suwite ekyeritehamo, nekitehero ni kiri; wameya magetsi wengebe gohi kwehi?

¹² Uwe uri mukulu kwilaba tata wetu Yakobo kwehi? Yo watuha ekitehero eki, mwapulya kukyo, na bagala biwe, nesyonde siwe.

¹³ Yesu mwabuga naye, ati, Oyu kapulaya magetsi aya akaswakwa enyota,

¹⁴ nikwa mundundi oyu kapulaya amagetsi nasyamuha siendisyakwa nyota kera na kera: nikwa amagetsi ayo nasya muha asyabya omwisi wuwe eyisoko ya magetsi owakakununuka erihika oko ngebe yerikota.

¹⁵ Omukali mwabuga naye, ati, Mukama, omba magetsi ayo, neryo sindiendisyaswakwa enyota, kutse ndasyaswasa eno neriteha.

¹⁶ Yesu mwabuga naye, ati, Genda, ubirikire ibawe, mwase eno.

¹⁷ Omukali mwasubirya mwabuga naye, ati, Singwite ibage. Yesu mwabuga naye, ati, Wamabuga ndeke uti suwite ibawe;

¹⁸ kusangwa wabya na bibawe batano, noyuri naye sibawe; kweki wabiribuga kwenene.

¹⁹ Omukali mwabuga, ati, OMukama, namalebya kuri mumi nyereri.

²⁰ Abotata wetu bagenda bakasaba oko kitwa eki; nenyu muti eYerusalema yitolere erisabirwa.

²¹ Yesu mwabuga naye, ati, Mukali, unyikiriraye, omugulu akasa, omugulu mutesyasaba Tata oko kitwa eki kutse eYerusalema.

²² Inywe mukasaba oyo mutasi; itwe tukasaba oyo twasi, kusangwa erilama rikalwa oko baYuda.

²³ Nikwa omugulu akasa, na lino ane, omugulu abasabi bakwenene basyasaba Tata omu kirimu nekundu, kusangwa Tata akasonda abari batya eribya abasabi buwe.

²⁴ Mungu ni Kirimu nabakamusaba batolere ibamu saba omu kirimu nekundu.

²⁵ Omukali mwabuga naye, ati, Nyasi Mesia asyasa (oyu kahulawa mo Kristo); omugulu asyabya abiasa, asyatutulira emyatsi yosi.

²⁶ Yesu mwabuga naye, ati, Ingye ngabuga nawe ni ye.

²⁷ Neryo abiga biwe mobasa. Mobasweka kusangwa abya akabuga nomukali, nikwa sihabya mundu akabuga, ati, Uka sondaki kwehi? kutse, Niki kikaleka iwakama naye kwehi?

²⁸ Neryo omukali mwasiga erirega riwe, mwaya oko muyi, mwabuga na bandu,

²⁹ ati, Mwase, mulebaye omundu oyu amambwira ebyo nakola ebyosi. Kwoyo si Kristo kwehi?

³⁰ Nabo mobalwa omo muyi, mobasa kwiye.

³¹ Omu ndambi eyo abiga mobamuhatikana, bati, Mukangirirya, urye.

³² Ni kwa mwabuga nabo ati, Ngwite akaryo kerirya ako mutasi.

³³ Neryo abiga mobabulania, bati, Hari mundu wamamuletere akaryo kwehi?

³⁴ Yesu mwabuga nabo, ati, Akaryo kage rye erikola erisonda ryoyo wanyituma, neribuga omubiri wuwe.

³⁵ Simwebuga, muti, Hakisiya emikera ini, erigesa iryahika kwehi? Lebaya, ngababwira, nyiti, Musumbe ameso wenyu, mulebaye amarima amabihenia atolere okwigeswa.

³⁶ Noyu kagesa akimaya oluhembo, akahindanaya ebiguma oko ngebe yerikota, oyu kabiba noyu kagesa batseme haguma.

³⁷ Ku­sangwa ebi ko biri bitya kwenene, Omuguma akabiba nogundi iniagesa.

³⁸ Nabatuma erigesa aho mutakola; abandi moba hinga, nenyu mukingira omo mibiri yabo.

³⁹ AbanyaSamaria bangi boko muyi oyo mobamwikirirya busana nekinywa kyomukali, Oyu watulago, ati, Amambwira ebyosi ebyo nakola.

⁴⁰ Neryo omugulu abanyaSamaria basa kwiye, mobamuhatikana eriikala haguma nabo; naye mwikalayo ebiro bibire.

⁴¹ Nabandi bangi mobikirirya busana nekinywa kiwe.

⁴² Mobabwira mukali, bati, Lino twamikirirya, sitwiki riraya busana neribuga ryawe: kusangwa itwe twamabiowa itwebene, tunasi kwoyu ni kwenene Mulamya we kihugo.

⁴³ Nenyuma webiro bibiri mwalwayo mwaya eGalilaya.

⁴⁴ Kusangwa Yesu iyowene mwatulago, ati, Omuminyereri siarisikibawa omu kihugo kiwe.

⁴⁵ Neryo omugulu asa eGalilaya, BanyaGalilaya mobamukokya, ibabirilangira emyatsi yosi akola eYerusalema omo kiro kikulu, kusangwa nabo bayayo omo kiro kikulu.

Yesu akalamaya mwana womwami

⁴⁶ Neryo mwasa kandi oko Kana ya Galilaya, aha bindurira amagetsi mo binyu. NeKapernauma habya omutabali muguma womwami, omugala wuwe inialwere.

⁴⁷ Omugulu owa ko Yesu amalwa Yudea amahika Galilaya, mwayamuhatikana andagale ayalamaye mugala wuwe, kusangwa abya hakuhi nerihola.

⁴⁸ Yesu mwamubwira, ati, Kumbe mutarilola oko bitikotiko nebyeriswekera, simwangikirirya na hake.

⁴⁹ Omu tabali womwami mwabuga naye, ati, OMukama, wandagale mwana wage ateahola.

⁵⁰ Yesu mwamubwira, ati, Genda, mugala wawe aneho. Nomundu oyo mwikirirya eKinywa Yesu amubwira, mwagenda.

⁵¹ Omugulu andagala, abagombe buwe mobahindana naye, mobamubwira, bati, Mugala wawe aneho.

⁵² Nikwa mwabulyabo endambi atsuka erilama, nabo moba buga naye, bati, Muligolo oko ndambi sirinda erihuhana moryamuleka.

⁵³ Kwekyo ise wuwe mwaminya ko yabya iyendambi eyo Yesu abuga naye, ati, Omugala wawe aneho; neryo mwikirirya, nenyumba yiwe yosi.

⁵⁴ Eki ni kitikotiko kya kabiri ekyo Yesu akola, akalwa eYudea ahika eGali laya.