Yoane 3 - Nouveau Testament et Psaumes en Ndandi Version 1962

Nikodemo

¹ Habya mundu wabaFarisayo akahulawa mo Nikodemo, omukama wabaYuda:

² naye mwasa mokiro okwiye mwa buga naye, ati, Mukangirirya, tunasi kuri mukangirirya alwa ewo Mungu; kusangwa sihari gundi wangatoka erikola ebitiko tiko ebi ukakola, Mungu ate haguma naye.

³ Yesu mwasubirya mwabuga naye, ati, Kwenene, kwenene, ngabuga nawe, nyiti, Omundu amatindabutwa buhya-buhya, isiangatoka erilola oko bwami bwoMungu.

⁴ Nikodemo mwabuga naye, ati, Ko mundu angatoka eributwa ati amabibya mukulu kwehi? Angatoka erisuba omo nda yanyinya wuwe gendo kabiri, neri swabutwa kwehi?

⁵ Yesu mwasubirya, ati, Kwenene, kwenene, ngabuga nawe, nyiti, Omundu amatindabutwa na magetsi ne Kirimu, siangatoka eriingira omo bwami bwoMungu.

⁶ Ekika butawa nomubiri ni mubiri; nekikabutawa ne Kirimu ni kirimu.

⁷ Susweke kusangwa ngabuga nawe, nyiti, Ritolere imwabutwa buhya-buhya.

⁸ Erihunga rikabuhirira aho ryanzire, nawe ukowa erihuha ryaryo, nikwa isiwasi eyo rikalwa, kutse eyo rikaya; kwari atya oburi mundu oyo kabutawa ne Kirimu.

⁹ Nikodemo mwasubirya mwabuga naye, ati, Ebi byangatoka eribya biti kwehi?

¹⁰ Yesu mwasubirya mwabuga naye, ati, Uri mukangirirya waIsraeli, isuriminya emyatsi eyi kwehi?

¹¹ Kwenene kwenene, ngabuga nawe nyiti, Tukabuga ebyo twasi, tukatula ebyo twabirilolako; kandi simuriangirira eritu lago ryetu.

¹² Namabya ngababwira emyatsi ye kihugo isimu rikiriraya, namababwira ebyelubula imwikirirya muti kwehi?

¹³ Na sihari mundu oyo wahetukira elubula, yo noyo wandagala alwa elubula, yo Mugala womundu, oyuri elubula.

¹⁴ Ngoko Musa asumbira endata enzoka omo mbwarara, ko riri ritya ritolere oMugala gomundu iniasumbirwa endata;

¹⁵ neryo mundundi amamwikirirya atoke eribya nengebe yerikota mwisi wuwe.

¹⁶ Kusangwa Mungu mwanza e kihugo kyatya, kyaleka iniaha Mugala mubutwa muguma wuwe, neryo mundundi amamwikirirya isiendisyahera, nikwa abane engebe yerikota.

¹⁷ Kusangwa Mungu mwatatuma Mugala omo kihugo eri tswera e kihugo; nikwa e kihugo kilamibawe busana naye.

¹⁸ Oyo kikiriraya kwiye siaritswerawa; nikwa oyo utetikirirya iniamabitswerwa, kusangwa siaritikirirya oko rina ryoMugala goMungu, mubutwa muguma.

¹⁹ Nolu ni lubanza kusangwa ekyakakala kyabiriasa omo kihugo, na bandu mobanza omwi rimya kwilaba ekyakakala; kusangwa emibiri yabo moyabya mibi.

²⁰ Kusangwa oburi mundu oyo kakola ebibi akakwa ekyakakala kyo busu, kandi siariasa oko kyakakala, emibiri yiwe ikasyaminyikalibwa.

²¹ Nikwa oyo kakola kwenene akasa oko kyakakala, emibiri yiwe iyaminyikala, ko ikakolawa oko Mungu.

Yoane akatulago busana na Yesu

²² Enyuma wemyatsi eyi Yesu na biga biwe mobasa mo kihugo kyaYudea; neyo mwasiba nabo, akabatisya.

²³ Na Yoane nibya abya akabatisya oko Ainoni hakuhi na Salimu, kusangwa ho habya magetsi mangi; kandi abandu mobasa, mobabatisibwa.

²⁴ Kusangwa Yoane isiariaguswa mo muliki.

²⁵ Neryo mohahuluka obuhaka omukati-kati kabiga baYoane nomuYuda oko mwatsi werierya.

²⁶ Neryo mobasa uku Yoane, mobabuga, bati, Mukangirirya, oyo wabya haguma nawe eyisirya weYorodani, oyo wabya ukahula, langira, yu kabatisaya, na bandu bosi bakamweya.

²⁷ Yoane mwasubirya, ati, Sihari mundu wangatoka eriangirira kindu, atariahabawakyo kikalwa elubula.

²⁸ Nenyu inywe bene mukatulago ko nabuga, nyiti, Sindi Kristo, nikwa natumawa embere siwe.

²⁹ Oyu wite muheruki ni iba womuheruki; nikwa mwira wiba womu heruki, oyo wimene akamowa, akatsema kutsibu busana nomulenge wiba womuheruki; neryo obutseme bwage obu bwamusula.

³⁰ Iye atolere iniabya munene, nikwa ingye inakeha.

³¹ Oyu kalwa endata alengire abosi; owe kihugo ni we kihugo, kandi akabuga ebye kihugo; oyu kalwa elubula alengire abosi.

³² Ebyabirilangira nebyabiriowa, byakatula; sihali mundu kaliga ebyakatula.

³³ Noyu kaliga eritulago riwe akahira eki bohi kweki, ati, Mungu ni kwenene.

³⁴ Kusangwa oyo Mungu abirituma akabuga ebinywa byoMungu, kusangwa siariha eKirimu molulengo;

³⁵ Ise anzire Mugala, abirimuha ebyosi omu byala biwe.

³⁶ Oyu kikiriraya ku Mugala awite engebe yerikota; nikwa oyu tiowa Mugala siendisyalola oko ngebe, nikwa eriagarirwa ryoMungu rimwikereko.