Yoane 19 - Nouveau Testament et Psaumes en Ndandi Version 1962

Embita yemisaki-saki

¹ Neryo Pilato mwimya Yesu, mwamuswirya emikoba.

² Na basoda mobaluka emisaki-saki mo mbita, mobahirayo oko mutwe wuwe, mobamwambalya olukimba lwomunyama;

³ mobamuhikako, bakabuga bati, We yoyo, Omwami wabaYuda neryo mobamuswirya ebikundi.

⁴ Pilato mwahuluka kandi, mwabuga nabo, ati, Lebaya, ngabaletera ye, muminye ko ndetamubana ko kibi ekyangamwitisya.

⁵ Neryo Yesu mwa huluka, inianambite embita yemisaki-saki nolukimba lwomu nyama. Pilato mwabwirabo, ati, Mulebaye, omundu yoyu.

⁶ Neryo omugulu abahereri bakulu nabalima babere bamulo lako, mobabugira igumaguma, bati, Umubambe oko muti, umubambe oko muti; Pilato mwabuga nabo ati, mumwimaye imwebene, mumubambe oko muti: kusangwa ingye sindita mubana kwekibi ekyerimwitira.

⁷ AbaYuda mobamusubirya bati, Itwe tuwite erihano, busana nerihano eryo atolere iniakwa, kusangwe mwayiyira mo Mugala woMungu.

⁸ Pilato omugulu owa ekinywe eki, mubaha kwilaba aho;

⁹ mwingira kandi omwibugiro, mwabulya Yesu, ati, Walwahi kwehi? Nikwa Yesu mwatamusubirya.

¹⁰ Pilato mwamubulya, ati, Ukanyibya bukutu kwehi? siwasi ko ndi na maka erikubohola, kandi ko ndi na maka werikubamba oko muti kwehi?

¹¹ Yesu mwa musubirya, ati, Siwangabya na maka busana nage na hake, utaryahabawago akalwa endata: kikaleka oyo wanyihotela ukuwe iniabya nebibi kwilaba.

Eritswera Yesu

¹² Eritsuka oko ndambi eyo Pilato mwasonda erimubohola: nikwa baYuda mobabugira igumaguma, bati, Wamabohola mundu oyu, isukiri mwira waKaisari: oburi mundu ukayiyira mo mwami akagana Kaisari.

¹³ Pilato abere abiowa ebinywa ebi, mwaleta Yesu ye yihya, mwikala oko kitumbi kyeritswera ahakahulawa mo Kibuga kyaMabwe, nikwa omo KiEbrania, ni Gabata.

¹⁴ Nikwa kyabya kiro kyErikokotya ryErilabwako: ryabya ngendambi yeritungi. Neryo mwabuga nabaYuda, Mulebaye, Omwami wenyu!

¹⁵ Nabo mobabugira iguma guma, bati, Umulusayeho, umulusayeho, umubambe oko muti! Pilato mwabuga nabo, ati, Nyibambe Omwami wenyu oko muti kwehi? Abahereri bakulu mobasubirya bati, Situwite omwami ni na Kaisari.

¹⁶ Kwa muhabo atya abambawe oko muti.

Musasalaba wa Kalvari

¹⁷ Neryo mobimya Yesu: naye mwahuluka, inianayihekere omusalaba, mwahika ahakahulawa aherihanga, ahakahulawa omo KiEbrania Golgota:

¹⁸ ho bamubamba oko muti nabandi babiri haguma naye, oko lundi luhande omuguma noko lundi ogundi na Yesu aho katikati.

¹⁹ Pilato mwasaka erimi nyisya eri mwahiraryo oko musalaba. Hasakawa hati, YESU WANAZARETI, OMWAMI WA BAYUDA.

²⁰ Neryo abangi boko baYuda mobabya bakalebya amasako ayo, kusangwa aho Yesu abambawa oko muti habya hakuhi nomuyi: kyasakawa omo kiEbrania, nomo kiRoma, nomo kiGiriki.

²¹ Abahereri bakulu babaYuda mobabwira Pilato, bati, Susake, Omwami wabaYuda; nikwa, uti, abuga ati, Indi Mwami wabaYuda.

²² Pilato mwasubiryabo, ati, Ekyo nabirisaka, inabirisaka.

Esyongimba syaYesu

²³ Neryo abasoda, ababamba Yesu oko muti, mobaheka esyongimba siwe mobagabasyo mo magabo ani, oko buri musoda erigabo; nekanzu nibya: nekanzu eyo yabya butsira mulando, inilukire ehosi eritsuka endata.

²⁴ Kyaleka ibabwi rana, bati, Situtuleyo, nikwa tukange obukanga busana nayo, nga ikandibya yandi: erisaka ribererere, erikabuga, riti, Mobagaba esyongimba syage omukati-kati kabo, Mobakanga obukanga busana nekanzu yage.

Yoane na Maria

²⁵ Abasoda mobakola batya, nikwa habya himene hakuhi nomusalaba wa Yesu, nyinya, na mwali wabo nyinya, ye Maria muka Kleopa, na Maria Magdalene.

²⁶ Neryo omugulu Yesu alangira koyo wuwe, nomwiga oyo abya anzire inianimene hakuhi, mwabwira nyinya, ati, Mukali, lebaya mugala wawe!

²⁷ Neryo mwabwira omwiga oyo, ati, Lebaya, koyo wawe! Neritsuka oko ndambi eyo omwiga oyo mwamutwala ewuwe.

Erihola ryaYesu

²⁸ Enyuma waho Yesu, inianasi emyatsi yosi iyamabihwa, erisaka ribererere, mwabuga ati, Ngwire nyota.

²⁹ Neryo habya hahirirwe erirega ryoswire siki: neryo mobahira embu huma iyoswire nesiki mobahirayo oko hisopo, mobahirayo oko buno buwe.

³⁰ Neryo Yesu abere abiimya siki, mwabuga ati, Byamahwa: munamya omutwe wuwe, mwaha ekirimu kiwe kyo lugendo.

Eritumo omo kikuba kyaYesu

³¹ Neryo abaYuda, kusangwa kyaba ekiro kyErikokotya, emibiri sibye oko musalaba omo kiro kyasabatu (kusangwa ekiro kyasabatu ekyo kyabya kikulu), mobabulya Pilato amagulu wabo abunangawe, balusibawe ho.

³² Neryo basoda mobasa, mobabuna amagulu womundu werimbere, na wogundi oyo abambawa oko muti haguma naye:

³³ nikwa omugulu bahika oko Yesu, mobalebya iniamabihola, mobatabuna amagulu wuwe:

³⁴ nikwa muguma wokobasoda mwatsimita omolukanga luwe omwitumo, neryo-neryo omusasi namagetsi mo byalwamo.

³⁵ Noyo walangira yukatulago, neritulago riwe ni kwenene: kandi anasi kwakabuga kwenene, imwikirirya.

³⁶ Ku sangwa emyatsi eyi moyabya erisaka ribererere, riti, Erikuha riwe siryendisyabunwa.

³⁷ Nakandi erindi erisaka riti, Basya lola ukwoyo batsimita.

Erila Yesu

³⁸ Nenyuma wemyatsi eyi Yosefu wArimatea, abya omwiga wa Yesu, nikwa omo bubi-sobiso busana neriubaha baYuda, mwasaba Pilato ehamuli yeritwala omubiri wa Yesu: Pilato mwamuha hamuli, Neryo mwasa mwatwala omubiri wuwe.

³⁹ Neryo Nikodemo naye mwasa, oyo wamuhikako erimbere omo kiro, iniakaleta eritulungana ryamanemane na uvumba nge miheke ibiri.

⁴⁰ Neryo mobimya omubiri wa Yesu, moba sengago omo myenda haguma na manukato owakakumba ndeke ngemitsye yabaYuda omugulu werita.

⁴¹ Nikwa aho bamu bamba habya eririma; nomwirima eryo habya eyisinda nyihya nyihya eyiteyatatabwa mo mundu.

⁴² Naho hobahira Yesu, kusangwa kyabya kiro kyErikokotya kyabaYuda (kandi eyisinda eyo yabya hakuhi).