Yoane 17 - Nouveau Testament et Psaumes en Ndandi Version 1962

Erisaba ryaYesu

¹ Emyatsi eyi Yesu mwabugayo; nerilalamira elubula, mwabuga, ati, Tata, endambi yamahika; ukenge Mugala wawe, noMugala akukenge:

² ngoko wabirimuha ehamuli oko byosi ebiwite omubiri, iniaha engebe yerikota oko bosi wamuha.

³ Eyi ni ngebe yerikota, bakuminye we Mungu muguma wekwenene, noyo watuma, Yesu Kristo.

⁴ Monakukenga omu kihugo, inabiribuga mubiri wamba erikola.

⁵ Na lino Tata, unyikenge haguma nawe uwowene, nolukengerwa olo nabya nalo haguma nawe embere we kihugo eribya.

⁶ Monaminyikalya erina ryawe oko bandu abo wamba omo e kihugo: babya bawe, mowambabo; kandi babiriteya eKinywa kyawe.

⁷ Lino banasi ko myatsi yosi yahi eyo wamba ikalwa ukuwe:

⁸ kusangwa ebinywa ebyo wamba nabirihabyobo; babiriimyabyo, babiri minya kwenene ko nalwa ewawe, mobikirirya ko wanyituma.

⁹ Ngasabirabo: sindisabira e kihugo, nikwa ngasabira abo wamba; kusangwa ni bawe:

¹⁰ nemyatsi yosi yage ni yawe: nage ngakengawa omwisi syayo.

¹¹ Nage sinyiri kandi omo kihugo, naba bari omo kihugo, nage ngasa kuwe. Tata Ubu yirire, utegayebo omo rina ryage abo wamba, babye muguma, nga twi.

¹² Omugulu nabya nabo, monateyabo omo rina ryawe abo wamba: monalemberabo ndeke, mohatahera nomu guma, yono mugala werihera; erisaka ribererere.

¹³ Nikwa lino ngasa kuwe; nemyatsi eyi ngabugayo omo kihugo, ibatoka eriusulibwa nobutseme bwage omwisi wabo.

¹⁴ Nabirihabo eKinywa kyawe; ne kihugo mokyakwabo obusu, kusangwa sibe kihugo, nage ngoko nyite we kihugo.

¹⁵ Sindisaba nyiti ulu sayebo omo kihugo, nikwa utegayebo oko mubi.

¹⁶ Sibe kihugo, nage ngoko nyite we kihugo.

¹⁷ Uhigulebo babye babuyirire omo kwenene: eKinywa kyawe ni kwenene.

¹⁸ Ngoko wanyi­tuma omo kihugo, nage nabiritumabo omo kihugo.

¹⁹ Busana nomwatsi wabo ngayihigula, ibatoka erihigulwa omo kwenene.

²⁰ Kandi sindisaba busana naba ibobene, nikwa busana naba kanyikiriraya busana nekinywa kyabo;

²¹ abosi babye muguma; ngoko uwe Tata, uri omwisi wage, nage omwisi wawe, nabo batoke eribya omwisi wetu: e kihugo kikiriraye kwari ini we wanyituma.

²² Nolukengerwa olo wabirimba nabirihalobo; babye muguma ngoko turi muguma.

²³ Ingye omwisi wabo, nawe omwisi wage, bayirawe mo muguma kwenene; e kihugo kiminye kwari ni we wanyituma, wabirianzabo, ngoko wanyanza.

²⁴ Tata, abo wabirimba ngasonda aho nyiri nabo babyeho haguma nage, balangire olukengerwa lwage, olo wamba: ku sangwa wanyanza embere wekibanza kye kihugo.

²⁵ Tata ugutunganene, e kihugo mokitetakuminya, nikwa ingye naku minya; naba nabo mobaminya kwari ini we wanyituma;

²⁶ kandi monaminyisyabo erina ryawe, nasyaswaminyi swaryo; olwanzo olo wanyanza nalo lubye omwisi wabo, nage omwisi wabo.