Yoane 15 - Nouveau Testament et Psaumes en Ndandi Version 1962

Endina yeBinyu nemitahi yabyo

¹ Ingye ndi ndina ya binyu ya kwenene, na Tata wage ni mulimiri.

² Emitahi yosi eyiri omwisi wage eyitebuta ebiguma, akalusayayo: nemitahi yosi eyikabuta ebiguma, akerayayo, iyatoka eributa ebiguma okwilaba.

³ Mwamabiera busana nekinywa ekyo nababwira.

⁴ Mwikale omwisi wage, nage omwisi wenyu. Ngomutahi siaritoka eributa ebiguma igowene, atikere omwisi wendina yebinyu; nenyu simwanga toka mutikere omwisi wage.

⁵ Ingye ndi ndina ya binyu, nenyu muri mitahi: oyo wikere omwisi wage, nage omwisi wuwe, yukabuta ebiguma bingi: kusangwa ate ingye simwa­ngatoka erikolaki.

⁶ Omundu oyu tikala omwisi wage, aka gusawa eyihya ngomutahi inioma; ibakumakumayo, ibagusayo oko muliro, iyahya.

⁷ Mwamikala omwisi wage, nebinywa byage ibikikala omwisi wenyu, musabe ekinduki mwanzire, kyasyakoleka busana nenyu.

⁸ Busana neki Tata wage akake ngawa, mubute ebiguma bingi; mutya mwasyabya abiga bage.

⁹ Ngoko Tata abirinyanza, nage nabiribanza: mwikale omo lwanzo lwage.

¹⁰ Mwamateya amahano wage, mwasikala omo lwanzo lwage; ngoko nage nabiriteya amahano waTata wage, nyikire omo lwanzo luwe.

¹¹ Nabiribuga emyatsi eyi nenyu, obutseme bwage bubye omwisi wenyu, kandi nobutseme bwenyu ibusulibwa.

¹² Eri ni hana ryage, mwanzane, ngoko nyibanzire.

¹³ Sihari mundu uwite olwanzo olulabire olu, omundu erisiga engebe yiwe busana nabira buwe.

¹⁴ Inywe muri bira bage, mwamakola emyatsi ngabahana.

Mwanzane

¹⁵ Sindibahula kandi mo bagombe; kusangwa omugombe siariminya ebyo Mukama wuwe akakola: nikwa ngabahula mo bira; kusangwa nabiribaminyisya emyatsi yosi eyo ngowa ku Tata wage.

¹⁶ Simwetayisoga ingye, nikwa ingye nayisoga inywe, neribahiraho, busana neribwambu mugende mubute ebiguma, nebiguma byenyu bikale: neryo ekinduki mwasya bulya Tata omo rina ryage, iniabahakyo.

¹⁷ Ngabahana emyatsi eyi, imwanzana.

¹⁸ E kihugo kyamabakwa obusu, imwaminya ko kyatsuka erinyikwa obusu embere weribakwabo.

¹⁹ Kumbe mubye be kihugo, kumbe e kihugo kyanzire abakyo: nikwa kusangwa simuri be kihugo, nikwa nayisoga inywe erilwa omo kihugo, kikaleka e kihugo ikyabakwa obusu.

²⁰ Mwibuke eKinywa nabuga nenyu nyiti, Omugombe siarilenga omukama wuwe. Bamabya babirinyendererya, nenyu basyabendererya; bamabya bateyirye ekinya kyage, nekyenyu basyateyakyo.

²¹ Nikwa emyatsi eyi basyabakola yoko busana nerihingana nerina ryage, kusangwa sibasi oyo wanyituma.

²² Kumbe nyitasa neribuga nabo, nga sibawite ekibi: nikwa lino sibawite eriyigana ekibi kyabo.

²³ Oyu kanyikwa obusu akakwa Tata wage obusu.

²⁴ Kumbe nyitekola omukati-kati kabo emibiri eyitekolawa nogundi mundu, nga sibawite ekibi: nikwa lino babirinyilolako babirinyikwa ekiniga ingye na Tata wage.

²⁵ Nikwa bikabya bitya, eKinywa kiberere kyasakawa omo bihano byabo, kiti, Banyikwa obusu bo buyira.

²⁶ Nikwa Embuyi asyabyasa, oyo nasyabatumira erilwa uku Tata, ye Kirimu kyakwenene, eki kalwa ewa Tata, akandisyatulago busana nage:

²⁷ nenyumukatulago, kusangwa eritsuka erimberembere imwabiribya haguma nage.