Yoane 14 - Nouveau Testament et Psaumes en Ndandi Version 1962

Erilaga ryaYesu uku bagombe buwe

¹ Simuleke emitima yenyu ikabya nobulige: mwikiriraye oko Mungu, nage munyikiriraye.

² Omunyumba ya Tata wage muri ngonde nyingi; bitebitya, nganamababwire; ku­sangwa ngaya kokotaya ho wenyu.

³ Namaya kokotya ho wenyu, nasyaswasa, inabatwala ewage; naho nyiri nenyu ho mwasyabya.

⁴ Neyo ngaya, munasi enzira.

⁵ Toma mwamu bwira, ati Mukama, sitwasi eyo ukaya; twasyaminya enzira yo tuti kwehi?

⁶ Yesu mwabuga naye ati, Ingye ndi nzira, nekwenene, nengebe: sihali mundu akahika uku Tata, ate kwingye.

⁷ Kumbe mulwe munyasi, ngamwabiriminya na Tata wage: neritsuka lino mumwasi, kandi mwabirimulolako.

⁸ Filipo mwabuga naye, ati. Mukama, utukangaye Tata, ekyo kikanditutolera.

⁹ Yesu mwamubwira, ati, Namabya nawe endambi yingaha, isuritanyiminya Filipo kwehi? Oyo wama nyilolako iniabirilola uku Tata; ni musindo wahi ukabuga, uti, Utukangaye Tata kwehi?

¹⁰ Siwikirirye ko ndi mwisi waTata, na Tata omwisi wage kwehi? Ebinywa ngabuga nenyu sindi buga busana nage ingyowene: nikwa Tata oyo wikere omwisi wage akakola emibiri yiwe.

¹¹ Unyikiriraye ko ndi omwisi wa Tata, na Tata omwisi wage: kutse unyikiriraye busana nemibiri iyoyene.

¹² Kundu, kundu, ngabuga nenyu, Oyu kanyikiriraya, emibiri ngakola asyakolayo; kandi asyakola eyilengire eyo; kusangwa ngagenda ku Tata.

¹³ Nekinduki mwasyabulya omo rina ryage, nasyakolakyo, Ise akengawe mu Mugala.

¹⁴ Mwa masaba ekindu kyahi omo rina ryage, nasyakolakyo.

¹⁵ Mwa manyanza mwasyateya amahano wage.

¹⁶ Nage nasyasaba Tata, naye asyabaha eyindi Mbuyi, iniabya nenyu kera na kera,

¹⁷ ye Kirimu kyekwenene: e kihugo sikyangatoka erimukokya; kusangwa sikimulolako, kutse erimuminya: inywe mumwasi; kusangwa ikere nenyu, kandi asyabya omwisi wenyu.

¹⁸ Si ndiendisyabasiga mo ngubi: nasyaswasa kwinywe.

¹⁹ Hakisiya katambi kake, ne kihugo ikitaswanyilolako; nikwa inywe muka nyilolako: kusangwa ndiho, nenyu mwasyabyaho.

²⁰ Oko kiro ekyo mwasyaminya ko ndi mwisi wa Tata, nenyu omwisi wage, nage omwisi wenyu.

²¹ Oyu wite amahano wage akategayago, yukanyanza: noyu kanyanza asyanzwa na Tata wage, nage nasyamwanza, nasyayikangya kwiye.

²² Yuda (oyute Iskariota) mwamubulya, ati, Mukama, byasyabya biti wasyayikangya kwitwe, uteyikangaya oko kihugo kwehi?

²³ Yesu mwamu subirya, ati, Omundu amanyanza, asyateya eKinywa kyage: na Tata wage asyamwanza, netu twasyasa kwiye, itwakokotya aheriikala ryetu haguma naye.

²⁴ Oyu tenyanza siaritegaya ebinywa byage: nekinywa ekyo mukowa si kyage, ni kyaTata oyo wanyituma.

Erilaga ryeKirimu Kibuyirire

²⁵ Emyatsi eyi nabiribuga nenyu, nyinikere haguma nenyu.

²⁶ Nikwa Embuyi kye Kirimu Kibuyirire, oyo Tata asyatuma omo rina ryage, iye akandisyabakangirirya emyatsi yosi, asya bibukya ebyosi nababwira.

²⁷ Obuholo ngabasigira; obuholo bwage ngabaha: butsira nge kihugo kikaha, ngabaha. Simuleke emitima yenyu ikabya nobulige, kutse simuleke ikubaha.

²⁸ Momowa ngoko nabuga nenyu, nyiti, Ngagenda, kandi nasyaswasa ukwinywe. Kumbe mulwe munyanzire, kumbe mwatsemire, kusangwa ngagenda ku Tata: kusangwa Tata andengire.

²⁹ Na lino nabiribabwira bitebyabya, neryo omu gulu byasyabya, imwikirirya.

³⁰ Sindibuga nenyu bingi kandi, kusangwa omusoki we kihugo akasa: naye siawite kindu omwisi wage;

³¹ nikwa e kihugo kiminye ko nyanzire Tata, neryo ngoko Tata anyitegeka, ko ngakola. Muhangane, tuye eyi.