Yoane 10 - Nouveau Testament et Psaumes en Ndandi Version 1962

Omulisya owene

¹ A Kundu, kundu, ngabuga nenyu, Oyu tingira omo lukyo lwekiyite kyesyombuli, nikwa akasamba handi, ni murahi nomunyeyi.

² Nikwa oyu kingira omo lukyo ni mulisya wesyombuli.

³ Omuteya akamukingulira, nesyombuli sikowa omulenge wuwe: naye akabirikira esyombuli siwe omo mena wasyo, akasondolerasyo eyihya.

⁴ Omugulu amabihira esyosi siwe syeyihya, akasondolerasyo embere, nesyombuli sikamu kwama: kusangwa sinasi omulenge wuwe.

⁵ Nomugeni sisye mukwama, nikwa sikamusaga: kusangwa sisyasi omulenge wabageni.

⁶ Yesu mwatwirabo omusyo oyu: nikwa mobata minya nga ni myatsi yahi eyabuga nabo.

Yesu ni luyi

⁷ Neryo Yesu mwabuga nabo kandi, ati, Kundu, kundu, ngabuga nenyu, Ingye ndi luyi lwesyombuli.

⁸ Abosi abasa embere syage ni barahi na banyeyi: nikwa esyombuli mosito wabo.

⁹ Ingye ndi luyi; omundu amingira kwingye, asyalama, asingira, asyahuluka, asyabana ekyerirya.

¹⁰ Omurahi siariasa busana nekindi, ryeneriba, neriita, neriherya: ingye nasa iba bana engebe, ibabanayo nyingi.

¹¹ Ingye ndi mulisya gowene: omulisya gowene akaha engebe yiwe busana nesyombuli siwe.

¹² Omuhingi isi mulisya, esyombuli isi siwe, akalangira embwa yomoli ikasa, iniasiga esyombuli, iniatibita, nembwa yomoli, iyapurasyo neripanzasyo.

¹³ Akatibita kusangwa ni muhingi, isi aritsomana esyombuli.

¹⁴ Ingye ndi mulisya gowene; nyasi esyage, nesyage sinanyasi,

¹⁵ ngoko Tata anyasi, nage nyasi Tata; nakandi ngasiga engebe yage busana nesyombuli syage.

¹⁶ Nesindi syombuli ngwitesyo, esite syomo kiyite eki: nyitolere inaletasyo, kandi syasyowa omulenge wage; syasyabya ekiha ngulo kiguma, nomulisya muguma.

¹⁷ Neryo Tata anyanzire, kusangwa ngasiga engebe yage, inatoka erimyayo kandi.

¹⁸ Sihari oyu wanganyisagulayo, nikwa ngasigayo ingyowene. Ngwite amaka werisigayo, nakandi ngwite amaka weriswimyayo. Erihana eri ngimaya uku Tata wage.

¹⁹ Neryo erigabana moryabyako kandi omukati-kati kaba Yuda busana nebinywa ebi.

²⁰ Abangi abakubo mobabuga, bati, Ari kombinga, ni musire; mukamowa busana naki?

²¹ Abandi bati, Ebi si binywa byoyuri kwembinga. Embinga yangatoka erilibula ameso wendimatime kwehi?

Yesu nIse ni muguma

²² Kyabya kiro kinene eYerusalema Kyeriha oko Mungu:

²³ kyabya omugulu weritsuku; na Yesu abya akalendera omo hekalu omo ndambi yabya ya Solomono.

²⁴ AbaYuda moba mutimbako, mobamubulya, bati, Endambi ingahi ukatuganga gangaya kwehi? Wamabya uri Kristo, utubwire ndeke.

²⁵ Yesu mwasubiryabo, ati, Monababwira, simwetikirirya; emibiri ngakola omo rina ryaTata wage, yikatulago busana nage.

²⁶ Nikwa simurikiriraya, kusangwa simuri mbuli syage.

²⁷ Esyombuli syage sikowa omulenge wage, nage nyasisyo, nasyo sikangwama:

²⁸ Nage ngahasyo engebe yerikota; nasyo sisyendisyahera na kera, nakandi sihari oyo wasyapurasyo omo byala byage.

²⁹ Tata wage, oyo wambasyo, alengire abosi; sihari oyo wangatoka eripurasyo omo byala bya Tata.

³⁰ Ingye na Tata turi muguma.

³¹ Kandi abaYuda mobatola mabwe erimuhumago.

³² Yesu mwasubiryabo, ati, Emibiri mingi yowene yalwa oko Tata nabakangaya; omubiri wahi ukweyo owakaleka imwanyiswirya mabwe kwehi?

³³ AbaYuda mobamusubirya, bati, Busana nomubiri owene sitwangakuswirya mabwe, nikwa busana neritsuma; kandi uwe uri mundu, uka yiyira mo Mungu.

³⁴ Yesu mwasubiryabo, ati, Sikisakire omo bihano byenyu, biti, Ngabuga muri miungu kwehi?

³⁵ Nikwa abere ahulabo mo miungu, abahika kwekinywa kyoMungu (nerisaka siryangaponwa),

³⁶ mukamwahula oyo Tata abirihi gula noyo atuma omo kihugo, muti, Ukatsuma: kusangwa nabuga, nyiti, Indi Mugala woMungu kwehi?

³⁷ Namabya ndekola emibiri yaTata, simunyikiriraye.

³⁸ Nikwa namako layo, nomo mwangabya butsira erikirirya, mwikiriraye emibiri: busana neriminya ndeke neriowa, Tata ari omwisi wage, nage omwisi wa Tata.

³⁹ Kandi mobasonda-sonda erimutsimba: neryo mwalwa omo byala byabo.

⁴⁰ Mwaya kandi eyisirya weYorodani aho Yoane abatisiraya erimbere; mwabyaho.

⁴¹ Nabandu bangi mobamuhikako; bati, Yoane siaritakola ekitikotiko: nikwa emyatsi yosi Yoane ahula busana nomundu oyu yabya yakwenene.

⁴² Nabangi moba mwikirirya eyo.