Yakobo 4 - Nouveau Testament et Psaumes en Ndandi Version 1962

Muyihire hakuhi noMungu

¹ Niki kikaleta amalwa nerinegena omukati-kati kenyu kwehi? Si sye syongumbu syenyu esikalwira omo bitsuko byenyu kwehi?

² Mukasonda isimuwite; mukita. Kandi mukatsura, simwebanaki; neryo mukalwa nerihira amalwa. Simuwite kusangwa simwesaba.

³ Mukasaba, simuriangirira, kusangwa mukasaba nabi, nerihityabyo omo syongumbu syenyu.

⁴ Inywe abasingiri, simwasi obwira bwe kihugo ni buyigu bwoMungu kwehi? Neryo oyu kasonda eribya omwira we kihugo akayiyira mo nzigu yoMungu.

⁵ Kutse mukaganiraya muti amasako akabuga buyira, kwehi? ati, Akakwa olukando lwobuha oko kirimu ekyo ahira eriikala omwisi wetu.

⁶ Nikwa akaha olukogo olulabire kikaleka iniabuga ati, Mungu akalwa nabakayanza nikwa akaha olukogo oko bakayikehaya.

⁷ Neryo muyihire oko Mungu. Nikwa mulwe neSatani naye asyabasaga.

⁸ Muyilete hakuhi noMungu naye akandisegera hakuhi nenyu. Mweraye ebyala byenyu, inywe bakola nabi, mweraye emitima yenyu, inywe bandu bemitima ibiri.

⁹ Mwagalawe, mususumane, murire. Eriseka ryenyu rihinduke isusumana nobutseme bwenyu buhinduke bulige.

¹⁰ Muyikehaye embere syo Mukama naye akandisyabahamya.

OMukama amanza twasyabyaho

¹¹ Simunegulirane, abagala betu. Oyu kanegulira mugala wabo kutse akatswera omugala wabo, akanegulira ebihano kandi akatswera ebihano. Nikwa wamatswera ebihano, suri mukoli webihano nikwa omutsweri.

¹² Hari muguma oyu kahira ebihano yo mutsweri, yu katoka erilamya neriherya; nikwa uwe uwendi ukatswera mulikyenyu kwehi?

¹³ Mwase, inywe mukabuga muti, Munabwire kutse mungya twasyaya oko muyi murebe twasikalaho mututa, twasyatunda, neribana endundi;

¹⁴ isimwasi ebikandisyabya omungyakya. Engebe yenyu niki kwehi? Kusangwa muri luhohe olukami nyikala akatambi kake nakandi ilwakikukala.

¹⁵ Kumbe mutolere eribuga muti, OMukama amanza, twasyabyaho twasyakola eki kutse kirya.

¹⁶ Nikwa mukayipipa omo bulumelume bwenyu. Eriyipipa eri ryosi nibi.

¹⁷ Oyu wasi erikola kitunganene atekolakyo, ini kibi kwiye.