Yakobo 3 - Nouveau Testament et Psaumes en Ndandi Version 1962

Eriitisya ryolulimi

¹ Abagala betu, ukwinywe sihabye bangi eribya abakangirirya, kusangwa mwasi ko twasyatswerwa kwilaba.

² Kusangwa itwe bosi tukatwikala mo bingi, noyu tetwikala omo kyakabuga ni mundu ahikene, iniakatoka eritegeka omubiri gosi.

³ Neryo twamahira ebyuma omo muno wesyofarasi isyatoka eritowa, tukasondola emibiri yasyo yosi.

⁴ Mulebaye amatu nago; nomwangabya manenemanene akakunawa nerihunga erikalire, akasondolibawa nengahya ngengenge eyo omutunganania akasonda erilolyabo.

⁵ Nolulimi ko luri lutya ni kitsuko kike lukayihalamba mo myatsi minene. Mulebaye ekisuki kinene kikahisibawa nomuliro muke!

⁶ Kandi olulimi ni muliro. Olulimi ni kihugo kyebibi omo bitsuko byetu, lo lukaheraya omubiri gosi, lukakaya eribyaho ryosi, kandi lukakibawa nekyuna kyomuliro.

⁷ Kusangwa emisindo yosi yesyonyama nesyonyonyu, esyonzoka nesyonyama syomo ngetsi, sikatoka eribegeribwa kandi syabiribegereribwa na bandu,

⁸ nikwa olulimi sihari omundu wangatoka eribegeryalo—ni kibi kite luhuka, iluswire nobuti obukaholaya.

⁹ Nalo lo tukahamo oMukama na Tata omuyisa, kandi nalo lo tukatakiramo abandu, abahangikawa omwisosa ryoMungu.

¹⁰ Omo buno buguma mukalwa eritsumala neritakira. Abagala betu, omwatsi oyu siatolere eribya atya.

¹¹ Kwe eyisoko ikahulukaya amagetsi agowene nebilabu erilwa omo kyuna kiguma kwehi?

¹² Abagala betu, omuti womutini angatoka eributa ebiguma byezeituni, kutse omuliki webinyu angatoka eributa mutini kwehi? Ritya amagetsi womunyu siangatoka erilwamo agowene.

Amenge awendata

¹³ Ni ndi owamenge noweriminya omukati-kati kenyu kwehi? Akanganaye emibiri yiwe nemibere yiwe yowene omo bolo bwamenge.

¹⁴ Nikwa mwamabya neritsura erikalihire neriyianza omo mitima yenyu, simuyihalambe neribiha omo kwenene.

¹⁵ Amenge aya si musindo owakalwa endata, nikwa ni we kihugo, ni wesyongumbu, ni weSatani.

¹⁶ Kusangwa ahari obuha neriyianza, hari erinegena nerikola ebibi byosi.

¹⁷ Nikwa amenge owakalwa endata owene, kandi ni wobuholo, ahehere, akowa erihanwa, uswire neriganyira ne mbuto yowene, ebitatikatika kutse eriteba.

¹⁸ Kandi ebiguma byeritunganene bikaherawa omo buholo nabo bakayira obuholo.