Yakobo 2 - Nouveau Testament et Psaumes en Ndandi Version 1962

Olwanzo olute nerisombola

¹ Abagala betu, suhambe erikirirya ryoMukama wetu Yesu Kristo owolukengerwa nerisombola bandu.

² Kusangwa hamabya omundu oyu kingira omwihindana ryenyu amabya iniambite esyombuka syezahabu nesyongimba esyowenenga, kandi omundu mwera iniambite esyongimba esitowene naye amingira,

³ nenyu imukakenga oyo kambala esyongimba esyowenenga muti, Ikala ahowene hano; naho mukabwira omundu mwera muti, wimane harya, kutse wikale omwisi wekitumbi kyebisandu byage;

⁴ simukasombola abandu omukati-kati kenyu, imukabya abatsweri bamaringikania mabi kwehi?

⁵ Mowe, abagala betu banze. Mungu siaritayisoga abera be kihugo eribya abebindu omwikirirya nabari bomwandu bobwami obwalaga abamwanzire kwehi?

⁶ Nikwa inywemwabirihemula omundu mwera. Si bandu bebindu bakabe ndereraya neribakurira omwibugiro kwehi?

⁷ Sibo bakatsuma erina eryolukengerwa eryo mukahulawamo kwehi?

⁸ Mwamaberererya ebihano byobwami, ngoko amasako ati, Wanze mulikyenyu ngoko uyanzire, imwamakola ndeke.

⁹ Nikwa mwamasombola abandu, imwamakola ekibi, mwama singwa nebihano nga bakola nabi.

¹⁰ Kusangwa oyu kabika ebihano byosi nikwa amahalya omo kiguma iniabirihalya omo byosi.

¹¹ Kusangwa oyo wabuga ati, susingire, yowanabuga ati, Siwite. Neryo wamatindasingira ukita, wabirihalya omo bihano.

¹² Mubuge, mukole nga bakandisyatswera nebihano byeriyigenderya.

¹³ Kusangwa oyu tegenyera siendisyage nyerwa omwitswerwa; nikwa eriganyira lusingire olubanza.

Erikirirya rite nemibiri riholire

¹⁴ Kwe ni ndundi yahi, abagala betu, omundu amabuga ati Awite erikirirya isiawite emibiri kwehi? Erikirirya riwe ryangatoka erimulamya kwehi?

¹⁵ Omugala wetu kutse mwali wetu amabya endumbu kutse amabula ebyerirya byebiro byosi,

¹⁶ nikwa omuguma wakwinywe amamubwira ati, Ugende obuholo, usisimuke gugute, isiaritahabo ebyobwaga bwomubiri, endundi irihi kwehi?

¹⁷ Ritya erikirirya iryoryene eritawite emibiri iriholire.

¹⁸ Nikwa ogundi asyabuga ati, Uwe uwite erikirirya nage ngwite emibiri. Ungangaye erikirirya ryawe eritawite emibiri, nage ngandikukangya erikirirya ryage erikaminyikala omo mibiri yage.

¹⁹ Ukikiriraya uti Mungu ni muguma, ukakola ndeke. Nikwa nesyombinga sikikiriraya—sikatitimana.

²⁰ Una nzire erikangiriribwa, uwe mundu mukiru, kwerikirirya rite nemibiri ni rigumba kwehi?

²¹ Abrahamu tata wetu mwa tayirwa mutunganene omo mibiri ekiro ahereraya mugala Isaka aheriherera kwehi?

²² Kandi ukalangira erikirirya ko rya tulungana nemibiri yiwe, erikirirya riwe moryahikana omo mibiri yiwe,

²³ namasako mwabererera owakabuga ati, Abrahamu mwikirirya Mungu, moryaganzwa mo ritunganene; kandi mwahulwa mo mwira woMungu.

²⁴ Ulebaye ngoko mundu akatungananibawa omo mibiri butsira nerikirirya iryo ryene.

²⁵ Ritya Rahabu musingiri mwatatungananibwa nemi biri omugulu akokaya abakwenda nerikangyabo eyindi nzira kwehi?

²⁶ Kusangwa ngoko omubiri ate nekirimu iniaholire ritya erikirirya erite nemibiri iriholire.